| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၄. ဂိလာနသုတ္တဝဏ္ဏနာ
4. Gilānasuttavaṇṇanā
၁၀၅၀. စတုတ္ထေ န ခော ပနေတန္တိ န ခော အမ္ဟေဟိ ဧတံ။ သပ္ပညော ဥပာသကောတိ သောတာပန္နော အဓိပ္ပေတော။ အသ္သာသနီယေဟိ ဓမ္မေဟီတိ အသ္သာသကရေဟိ ဓမ္မေဟိ။ အသ္သာသတာယသ္မာတိ အသ္သာသတု အာယသ္မာ။ မာရိသောတိ မရဏပဋိဗဒ္ဓော။ မရဏဓမ္မောတိ မရဏသဘာဝော။ အဓိမောစေဟီတိ ဌပေဟိ။ အဓိမောစိတန္တိ ဌပိတံ။ ဧဝံ ဝိမုတ္တစိတ္တသ္သာတိ ဧဝံ အရဟတ္တဖလဝိမုတ္တိယာ ဝိမုတ္တစိတ္တသ္သ။ ယဒိဒံ ဝိမုတ္တိယာ ဝိမုတ္တန္တိ ယံ ဣဒံ ဝိမုတ္တိံ အာရဗ္ဘ ဝိမုတ္တိယာ နာနာကရဏံ ဝတ္တဗ္ဗံ သိယာ, န တံ ဝဒာမိ။ ဘိက္ခုသင္ဃသ္သ ဟိ စေတိယင္ဂဏဗောဓိယင္ဂဏဝတ္တေသု စေဝ အသီတိက္ခန္ဓကဝတ္တေသု စာတိ အာဂမနီယဂုဏေသု ပမာဏံ နာမ နတ္ထိ, ပဋိဝိဒ္ဓေ ပန မဂ္ဂေ ဝာ ဖလေ ဝာ ဥပာသကာနဉ္စ ဘိက္ခူနဉ္စ နာနာကရဏံ နတ္ထိ။
1050. Catutthe na kho panetanti na kho amhehi etaṃ. Sappañño upāsakoti sotāpanno adhippeto. Assāsanīyehi dhammehīti assāsakarehi dhammehi. Assāsatāyasmāti assāsatu āyasmā. Mārisoti maraṇapaṭibaddho. Maraṇadhammoti maraṇasabhāvo. Adhimocehīti ṭhapehi. Adhimocitanti ṭhapitaṃ. Evaṃvimuttacittassāti evaṃ arahattaphalavimuttiyā vimuttacittassa. Yadidaṃ vimuttiyā vimuttanti yaṃ idaṃ vimuttiṃ ārabbha vimuttiyā nānākaraṇaṃ vattabbaṃ siyā, na taṃ vadāmi. Bhikkhusaṅghassa hi cetiyaṅgaṇabodhiyaṅgaṇavattesu ceva asītikkhandhakavattesu cāti āgamanīyaguṇesu pamāṇaṃ nāma natthi, paṭividdhe pana magge vā phale vā upāsakānañca bhikkhūnañca nānākaraṇaṃ natthi.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. ဂိလာနသုတ္တံ • 4. Gilānasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄. ဂိလာနသုတ္တဝဏ္ဏနာ • 4. Gilānasuttavaṇṇanā
