| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၁၀. ဂိလာနဒသ္သနသုတ္တဝဏ္ဏနာ
10. Gilānadassanasuttavaṇṇanā
၃၅၂. ဒသမေ အာရာမဒေဝတာတိ ပုပ္ဖာရာမဖလာရာမေသု အဓိဝတ္ထာ ဒေဝတာ။ ဝနဒေဝတာတိ ဝနသဏ္ဍေသု အဓိဝတ္ထာ ဒေဝတာ။ ရုက္ခဒေဝတာတိ မတ္တရာဇကာလေ ဝေသ္သဝဏော စ ဒေဝတာတိ ဧဝံ တေသု တေသု ရုက္ခေသု အဓိဝတ္ထာ ဒေဝတာ။ ဩသဓိတိဏဝနပ္ပတီသူတိ ဟရီတကာမလကီအာဒီသု မုဉ္ဇပဗ္ဗဇာဒီသု ဝနဇေဋ္ဌရုက္ခေသု စ အဓိဝတ္ထာ ဒေဝတာ။ သံဂမ္မာတိ သန္နိပတိတ္ဝာ။ သမာဂမ္မာတိ တတော တတော သမာဂန္တ္ဝာ။ ပဏိဓေဟီတိ ပတ္ထနာဝသေန ဌပေဟိ။ ဣဇ္ဈိသ္သတိ သီလဝတော စေတောပဏိဓီတိ သမိဇ္ဈိသ္သတိ သီလဝန္တသ္သ စိတ္တပတ္ထနာ။ ဓမ္မိကောတိ ဒသကုသလဓမ္မသမန္နာဂတော အဂတိဂမနရဟိတော။ ဓမ္မရာဇာတိ တသ္သေဝ ဝေဝစနံ, ဓမ္မေန ဝာ လဒ္ဓရဇ္ဇတ္တာ ဓမ္မရာဇာ။ တသ္မာတိ ‘‘ယသ္မာ တေန ဟိ, အယ္ယပုတ္တ, အမ္ဟေပိ ဩဝဒာဟီ’’တိ ဝဒထ, တသ္မာ။ အပ္ပဋိဝိဘတ္တန္တိ ‘‘ဣဒံ ဘိက္ခူနံ ဒသ္သာမ, ဣဒံ အတ္တနာ ဘုဉ္ဇိသ္သာမာ’’တိ ဧဝံ အဝိဘတ္တံ ဘိက္ခူဟိ သဒ္ဓိံ သာဓာရဏမေဝ ဘဝိသ္သတီတိ။
352. Dasame ārāmadevatāti pupphārāmaphalārāmesu adhivatthā devatā. Vanadevatāti vanasaṇḍesu adhivatthā devatā. Rukkhadevatāti mattarājakāle vessavaṇo ca devatāti evaṃ tesu tesu rukkhesu adhivatthā devatā. Osadhitiṇavanappatīsūti harītakāmalakīādīsu muñjapabbajādīsu vanajeṭṭharukkhesu ca adhivatthā devatā. Saṃgammāti sannipatitvā. Samāgammāti tato tato samāgantvā. Paṇidhehīti patthanāvasena ṭhapehi. Ijjhissati sīlavato cetopaṇidhīti samijjhissati sīlavantassa cittapatthanā. Dhammikoti dasakusaladhammasamannāgato agatigamanarahito. Dhammarājāti tasseva vevacanaṃ, dhammena vā laddharajjattā dhammarājā. Tasmāti ‘‘yasmā tena hi, ayyaputta, amhepi ovadāhī’’ti vadatha, tasmā. Appaṭivibhattanti ‘‘idaṃ bhikkhūnaṃ dassāma, idaṃ attanā bhuñjissāmā’’ti evaṃ avibhattaṃ bhikkhūhi saddhiṃ sādhāraṇameva bhavissatīti.
စိတ္တသံယုတ္တဝဏ္ဏနာ နိဋ္ဌိတာ။
Cittasaṃyuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. ဂိလာနဒသ္သနသုတ္တံ • 10. Gilānadassanasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၀. ဂိလာနဒသ္သနသုတ္တဝဏ္ဏနာ • 10. Gilānadassanasuttavaṇṇanā
