| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
3. கி³ஹிபப்³ப³ஜிதஸம்மாபடிபத்திபஞ்ஹோ
3. Gihipabbajitasammāpaṭipattipañho
[3] ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா ‘கி³ஹினோ வாஹங், பி⁴க்க²வே, பப்³ப³ஜிதஸ்ஸ வா ஸம்மாபடிபத்திங் வண்ணேமி, கி³ஹீ வா பி⁴க்க²வே பப்³ப³ஜிதோ வா ஸம்மாபடிபன்னோ ஸம்மாபடிபத்தாதி⁴கரணஹேது ஆராத⁴கோ ஹோதி ஞாயங் த⁴ம்மங் குஸல’’ந்தி. யதி³, ப⁴ந்தே நாக³ஸேன, கி³ஹீ ஓதா³தவஸனோ காமபோ⁴கீ³ புத்ததா³ரஸம்பா³த⁴ஸயனங் அஜ்ஜா²வஸந்தோ காஸிகசந்த³னங் பச்சனுபொ⁴ந்தோ மாலாக³ந்த⁴விலேபனங் தா⁴ரெந்தோ ஜாதரூபரஜதங் ஸாதி³யந்தோ மணிகுண்ட³ல 1 விசித்தமோளிப³த்³தோ⁴ ஸம்மாபடிபன்னோ ஆராத⁴கோ ஹோதி ஞாயங் த⁴ம்மங் குஸலங், பப்³ப³ஜிதோபி ப⁴ண்டு³காஸாவவத்த²வஸனோ பரபிண்ட³மஜ்ஜு²பக³தோ சதூஸு ஸீலக்க²ந்தே⁴ஸு ஸம்மாபரிபூரகாரீ தி³யட்³டே⁴ஸு ஸிக்கா²பத³ஸதேஸு ஸமாதா³ய வத்தந்தோ தேரஸஸு து⁴தகு³ணேஸு அனவஸேஸங் வத்தந்தோ ஸம்மாபடிபன்னோ ஆராத⁴கோ ஹோதி ஞாயங் த⁴ம்மங் குஸலங். தத்த², ப⁴ந்தே, கோ விஸேஸோ கி³ஹினோ வா பப்³ப³ஜிதஸ்ஸ வா? அப²லங் ஹோதி தபோகம்மங், நிரத்த²கா பப்³ப³ஜ்ஜா. வஞ்ஜா² ஸிக்கா²பத³கோ³பனா, மோக⁴ங் து⁴தகு³ணஸமாதா³னங், கிங் தத்த² து³க்க²மனுசிண்ணேன, நனு நாம ஸுகே²னேவ ஸுக²ங் அதி⁴க³ந்தப்³ப³’’ந்தி.
[3] ‘‘Bhante nāgasena, bhāsitampetaṃ bhagavatā ‘gihino vāhaṃ, bhikkhave, pabbajitassa vā sammāpaṭipattiṃ vaṇṇemi, gihī vā bhikkhave pabbajito vā sammāpaṭipanno sammāpaṭipattādhikaraṇahetu ārādhako hoti ñāyaṃ dhammaṃ kusala’’nti. Yadi, bhante nāgasena, gihī odātavasano kāmabhogī puttadārasambādhasayanaṃ ajjhāvasanto kāsikacandanaṃ paccanubhonto mālāgandhavilepanaṃ dhārento jātarūparajataṃ sādiyanto maṇikuṇḍala 2 vicittamoḷibaddho sammāpaṭipanno ārādhako hoti ñāyaṃ dhammaṃ kusalaṃ, pabbajitopi bhaṇḍukāsāvavatthavasano parapiṇḍamajjhupagato catūsu sīlakkhandhesu sammāparipūrakārī diyaḍḍhesu sikkhāpadasatesu samādāya vattanto terasasu dhutaguṇesu anavasesaṃ vattanto sammāpaṭipanno ārādhako hoti ñāyaṃ dhammaṃ kusalaṃ. Tattha, bhante, ko viseso gihino vā pabbajitassa vā? Aphalaṃ hoti tapokammaṃ, niratthakā pabbajjā. Vañjhā sikkhāpadagopanā, moghaṃ dhutaguṇasamādānaṃ, kiṃ tattha dukkhamanuciṇṇena, nanu nāma sukheneva sukhaṃ adhigantabba’’nti.
‘‘பா⁴ஸிதம்பேதங், மஹாராஜ, ப⁴க³வதா ‘கி³ஹினோ வாஹங், பி⁴க்க²வே, பப்³ப³ஜிதஸ்ஸ வா ஸம்மாபடிபத்திங் வண்ணேமி, கி³ஹீ வா, பி⁴க்க²வே, பப்³ப³ஜிதோ வா ஸம்மாபடிபன்னோ ஸம்மாபடிபத்தாதி⁴கரணஹேது ஆராத⁴கோ ஹோதி ஞாயங் த⁴ம்மங் குஸல’’ந்தி. ஏவமேதங், மஹாராஜ, ஸம்மாபடிபன்னோவ ஸெட்டோ², பப்³ப³ஜிதோபி, மஹாராஜ, ‘பப்³ப³ஜிதொம்ஹீ’தி ந ஸம்மா படிபஜ்ஜெய்ய, அத² கோ² ஸோ ஆரகாவ ஸாமஞ்ஞா, ஆரகாவ ப்³ரஹ்மஞ்ஞா, பகே³வ கி³ஹீ ஓதா³தவஸனோ. கி³ஹீபி, மஹாராஜ, ஸம்மாபடிபன்னோ ஆராத⁴கோ ஹோதி ஞாயங் த⁴ம்மங் குஸலங், பப்³ப³ஜிதோபி, மஹாராஜ, ஸம்மாபடிபன்னோ ஆராத⁴கோ ஹோதி ஞாயங் த⁴ம்மங் குஸலங்.
‘‘Bhāsitampetaṃ, mahārāja, bhagavatā ‘gihino vāhaṃ, bhikkhave, pabbajitassa vā sammāpaṭipattiṃ vaṇṇemi, gihī vā, bhikkhave, pabbajito vā sammāpaṭipanno sammāpaṭipattādhikaraṇahetu ārādhako hoti ñāyaṃ dhammaṃ kusala’’nti. Evametaṃ, mahārāja, sammāpaṭipannova seṭṭho, pabbajitopi, mahārāja, ‘pabbajitomhī’ti na sammā paṭipajjeyya, atha kho so ārakāva sāmaññā, ārakāva brahmaññā, pageva gihī odātavasano. Gihīpi, mahārāja, sammāpaṭipanno ārādhako hoti ñāyaṃ dhammaṃ kusalaṃ, pabbajitopi, mahārāja, sammāpaṭipanno ārādhako hoti ñāyaṃ dhammaṃ kusalaṃ.
‘‘அபி ச கோ², மஹாராஜ, பப்³ப³ஜிதோவ ஸாமஞ்ஞஸ்ஸ இஸ்ஸரோ அதி⁴பதி; பப்³ப³ஜ்ஜா, மஹாராஜ, ப³ஹுகு³ணா அனேககு³ணா அப்பமாணகு³ணா, ந ஸக்கா பப்³ப³ஜ்ஜாய கு³ணங் பரிமாணங் காதுங்.
‘‘Api ca kho, mahārāja, pabbajitova sāmaññassa issaro adhipati; pabbajjā, mahārāja, bahuguṇā anekaguṇā appamāṇaguṇā, na sakkā pabbajjāya guṇaṃ parimāṇaṃ kātuṃ.
‘‘யதா², மஹாராஜ, காமத³த³ஸ்ஸ மணிரதனஸ்ஸ ந ஸக்கா த⁴னேன அக்³கோ⁴ பரிமாணங் காதுங் ‘எத்தகங் மணிரதனஸ்ஸ மூல’ந்தி, ஏவமேவ கோ², மஹாராஜ, பப்³ப³ஜ்ஜா ப³ஹுகு³ணா அனேககு³ணா அப்பமாணகு³ணா, ந ஸக்கா பப்³ப³ஜ்ஜாய கு³ணங் பரிமாணங் காதுங்.
‘‘Yathā, mahārāja, kāmadadassa maṇiratanassa na sakkā dhanena aggho parimāṇaṃ kātuṃ ‘ettakaṃ maṇiratanassa mūla’nti, evameva kho, mahārāja, pabbajjā bahuguṇā anekaguṇā appamāṇaguṇā, na sakkā pabbajjāya guṇaṃ parimāṇaṃ kātuṃ.
‘‘யதா² வா பன, மஹாராஜ, மஹாஸமுத்³தே³ ஊமியோ ந ஸக்கா பரிமாணங் காதுங் ‘எத்தகா மஹாஸமுத்³தே³ ஊமியோ’தி, ஏவமேவ கோ², மஹாராஜ, பப்³ப³ஜ்ஜா ப³ஹுகு³ணா அனேககு³ணா அப்பமாணகு³ணா, ந ஸக்கா பப்³ப³ஜ்ஜாய கு³ணங் பரிமாணங் காதுங்.
‘‘Yathā vā pana, mahārāja, mahāsamudde ūmiyo na sakkā parimāṇaṃ kātuṃ ‘ettakā mahāsamudde ūmiyo’ti, evameva kho, mahārāja, pabbajjā bahuguṇā anekaguṇā appamāṇaguṇā, na sakkā pabbajjāya guṇaṃ parimāṇaṃ kātuṃ.
‘‘பப்³ப³ஜிதஸ்ஸ, மஹாராஜ, யங் கிஞ்சி கரணீயங், ஸப்³ப³ங் தங் கி²ப்பமேவ ஸமிஜ்ஜ²தி நோ சிரரத்தாய. கிங் காரணா? பப்³ப³ஜிதோ, மஹாராஜ, அப்பிச்சோ² ஹோதி ஸந்துட்டோ² பவிவித்தோ அஸங்ஸட்டோ² ஆரத்³த⁴வீரியோ நிராலயோ அனிகேதோ பரிபுண்ணஸீலோ ஸல்லேகி²தாசாரோ து⁴தப்படிபத்திகுஸலோ ஹோதி, தங் காரணா பப்³ப³ஜிதஸ்ஸ யங் கிஞ்சி கரணீயங், ஸப்³ப³ங் தங் கி²ப்பமேவ ஸமிஜ்ஜ²தி நோ சிரரத்தாய. யதா², மஹாராஜ, நிக்³க³ண்டி²ஸமஸுதோ⁴தஉஜுவிமலனாராசோ ஸுஸஜ்ஜிதோ ஸம்மா வஹதி, ஏவமேவ கோ², மஹாராஜ, பப்³ப³ஜிதஸ்ஸ யங் கிஞ்சி கரணீயங், ஸப்³ப³ங் தங் கி²ப்பமேவ ஸமிஜ்ஜ²தி நோ சிரரத்தாயா’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Pabbajitassa, mahārāja, yaṃ kiñci karaṇīyaṃ, sabbaṃ taṃ khippameva samijjhati no cirarattāya. Kiṃ kāraṇā? Pabbajito, mahārāja, appiccho hoti santuṭṭho pavivitto asaṃsaṭṭho āraddhavīriyo nirālayo aniketo paripuṇṇasīlo sallekhitācāro dhutappaṭipattikusalo hoti, taṃ kāraṇā pabbajitassa yaṃ kiñci karaṇīyaṃ, sabbaṃ taṃ khippameva samijjhati no cirarattāya. Yathā, mahārāja, niggaṇṭhisamasudhotaujuvimalanārāco susajjito sammā vahati, evameva kho, mahārāja, pabbajitassa yaṃ kiñci karaṇīyaṃ, sabbaṃ taṃ khippameva samijjhati no cirarattāyā’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
கி³ஹிபப்³ப³ஜிதஸம்மாபடிபத்திபஞ்ஹோ ததியோ.
Gihipabbajitasammāpaṭipattipañho tatiyo.
Footnotes:
