| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၆. ဃောသိတသုတ္တဝဏ္ဏနာ
6. Ghositasuttavaṇṇanā
၁၂၉. ရူပာ စ မနာပာတိ နီလာဒိဘေဒာ ရူပဓမ္မာ စ မနသာ မနုညာ ပိယရူပာ သံဝိဇ္ဇန္တိ, ဣဒဉ္စ သုခဝေဒနီယသ္သ ဖသ္သသ္သ သဘာဝဒသ္သနတ္ထံ။ ဧဝံ ‘‘ရူပာ စ မနာပာ ဥပေက္ခာဝေဒနိယာ’’တိ ဧတ္ထာပိ ယထာရဟံ ဝတ္တဗ္ဗံ။ စက္ခုဝိညာဏ။ပေ.။ ဖသ္သန္တိ ဝုတ္တံ။ ဥပနိသ္သယကောဋိယာ ဟိ စက္ခုဝိညာဏသမ္ပယုတ္တဖသ္သော သုခဝေဒနီယော, န သဟဇာတကောဋိယာ။ တေနာဟ – ‘‘ဧကံ ဖသ္သံ ပဋိစ္စ ဇဝနဝသေန သုခဝေဒနာ ဥပ္ပဇ္ဇတီ’’တိ။ သေသပဒေသူတိ ‘‘သံဝိဇ္ဇတိ ခော, ဂဟပတိ, သောတဓာတူ’’တိ အာဂတေသု ပဉ္စသု ကောဋ္ဌာသေသု။
129.Rūpā ca manāpāti nīlādibhedā rūpadhammā ca manasā manuññā piyarūpā saṃvijjanti, idañca sukhavedanīyassa phassassa sabhāvadassanatthaṃ. Evaṃ ‘‘rūpā ca manāpā upekkhāvedaniyā’’ti etthāpi yathārahaṃ vattabbaṃ. Cakkhuviññāṇa…pe… phassanti vuttaṃ. Upanissayakoṭiyā hi cakkhuviññāṇasampayuttaphasso sukhavedanīyo, na sahajātakoṭiyā. Tenāha – ‘‘ekaṃ phassaṃ paṭicca javanavasena sukhavedanā uppajjatī’’ti. Sesapadesūti ‘‘saṃvijjati kho, gahapati, sotadhātū’’ti āgatesu pañcasu koṭṭhāsesu.
တေဝီသတိ ဓာတုယော ကထိတာ ဆန္နံ ဒ္ဝာရာနံ ဝသေန ဝိဘဇ္ဇဂဟဏေန။ ဝတ္ထုနိသ္သိတန္တိ ဟဒယဝတ္ထုနိသ္သိတံ။ ပဉ္စဒ္ဝာရေ ဝီသတိ, မနောဒ္ဝာရေ တိသ္သော ဧဝံ တေဝီသတိ။
Tevīsatidhātuyo kathitā channaṃ dvārānaṃ vasena vibhajjagahaṇena. Vatthunissitanti hadayavatthunissitaṃ. Pañcadvāre vīsati, manodvāre tisso evaṃ tevīsati.
ဃောသိတသုတ္တဝဏ္ဏနာ နိဋ္ဌိတာ။
Ghositasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၆. ဃောသိတသုတ္တံ • 6. Ghositasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၆. ဃောသိတသုတ္တဝဏ္ဏနာ • 6. Ghositasuttavaṇṇanā
