| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
१०. घटीकारसुत्तं
10. Ghaṭīkārasuttaṃ
५०.
50.
‘‘अविहं उपपन्नासे, विमुत्ता सत्त भिक्खवो।
‘‘Avihaṃ upapannāse, vimuttā satta bhikkhavo;
रागदोसपरिक्खीणा, तिण्णा लोके विसत्तिक’’न्ति॥
Rāgadosaparikkhīṇā, tiṇṇā loke visattika’’nti.
‘‘के च ते अतरुं पङ्कं 1, मच्चुधेय्यं सुदुत्तरं।
‘‘Ke ca te ataruṃ paṅkaṃ 2, maccudheyyaṃ suduttaraṃ;
के हित्वा मानुसं देहं, दिब्बयोगं उपच्चगु’’न्ति॥
Ke hitvā mānusaṃ dehaṃ, dibbayogaṃ upaccagu’’nti.
‘‘उपको पलगण्डो च, पुक्कुसाति च ते तयो।
‘‘Upako palagaṇḍo ca, pukkusāti ca te tayo;
ते हित्वा मानुसं देहं, दिब्बयोगं उपच्चगु’’न्ति॥
Te hitvā mānusaṃ dehaṃ, dibbayogaṃ upaccagu’’nti.
‘‘कुसली भाससी तेसं, मारपासप्पहायिनं।
‘‘Kusalī bhāsasī tesaṃ, mārapāsappahāyinaṃ;
कस्स ते धम्ममञ्ञाय, अच्छिदुं भवबन्धन’’न्ति॥
Kassa te dhammamaññāya, acchiduṃ bhavabandhana’’nti.
‘‘न अञ्ञत्र भगवता, नाञ्ञत्र तव सासना।
‘‘Na aññatra bhagavatā, nāññatra tava sāsanā;
यस्स ते धम्ममञ्ञाय, अच्छिदुं भवबन्धनं॥
Yassa te dhammamaññāya, acchiduṃ bhavabandhanaṃ.
‘‘यत्थ नामञ्च रूपञ्च, असेसं उपरुज्झति।
‘‘Yattha nāmañca rūpañca, asesaṃ uparujjhati;
तं ते धम्मं इधञ्ञाय, अच्छिदुं भवबन्धन’’न्ति॥
Taṃ te dhammaṃ idhaññāya, acchiduṃ bhavabandhana’’nti.
‘‘गम्भीरं भाससी वाचं, दुब्बिजानं सुदुब्बुधं।
‘‘Gambhīraṃ bhāsasī vācaṃ, dubbijānaṃ sudubbudhaṃ;
कस्स त्वं धम्ममञ्ञाय, वाचं भाससि ईदिस’’न्ति॥
Kassa tvaṃ dhammamaññāya, vācaṃ bhāsasi īdisa’’nti.
मातापेत्तिभरो आसिं, कस्सपस्स उपासको॥
Mātāpettibharo āsiṃ, kassapassa upāsako.
‘‘विरतो मेथुना धम्मा, ब्रह्मचारी निरामिसो।
‘‘Virato methunā dhammā, brahmacārī nirāmiso;
अहुवा ते सगामेय्यो, अहुवा ते पुरे सखा॥
Ahuvā te sagāmeyyo, ahuvā te pure sakhā.
‘‘सोहमेते पजानामि, विमुत्ते सत्त भिक्खवो।
‘‘Sohamete pajānāmi, vimutte satta bhikkhavo;
रागदोसपरिक्खीणे, तिण्णे लोके विसत्तिक’’न्ति॥
Rāgadosaparikkhīṇe, tiṇṇe loke visattika’’nti.
‘‘एवमेतं तदा आसि, यथा भाससि भग्गव।
‘‘Evametaṃ tadā āsi, yathā bhāsasi bhaggava;
कुम्भकारो पुरे आसि, वेकळिङ्गे घटीकरो।
Kumbhakāro pure āsi, vekaḷiṅge ghaṭīkaro;
मातापेत्तिभरो आसि, कस्सपस्स उपासको॥
Mātāpettibharo āsi, kassapassa upāsako.
‘‘विरतो मेथुना धम्मा, ब्रह्मचारी निरामिसो।
‘‘Virato methunā dhammā, brahmacārī nirāmiso;
अहुवा मे सगामेय्यो, अहुवा मे पुरे सखा’’ति॥
Ahuvā me sagāmeyyo, ahuvā me pure sakhā’’ti.
‘‘एवमेतं पुराणानं, सहायानं अहु सङ्गमो।
‘‘Evametaṃ purāṇānaṃ, sahāyānaṃ ahu saṅgamo;
उभिन्नं भावितत्तानं, सरीरन्तिमधारिन’’न्ति॥
Ubhinnaṃ bhāvitattānaṃ, sarīrantimadhārina’’nti.
आदित्तवग्गो पञ्चमो।
Ādittavaggo pañcamo.
तस्सुद्दानं –
Tassuddānaṃ –
आदित्तं किंददं अन्नं, एकमूलअनोमियं।
Ādittaṃ kiṃdadaṃ annaṃ, ekamūlaanomiyaṃ;
अच्छरावनरोपजेतं, मच्छरेन घटीकरोति॥
Accharāvanaropajetaṃ, maccharena ghaṭīkaroti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १०. घटीकारसुत्तवण्णना • 10. Ghaṭīkārasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १०. घटीकारसुत्तवण्णना • 10. Ghaṭīkārasuttavaṇṇanā
