| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
7. க⁴டிகாரபஞ்ஹோ
7. Ghaṭikārapañho
7. ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா ‘க⁴டிகாரஸ்ஸ கும்ப⁴காரஸ்ஸ ஆவேஸனங் ஸப்³ப³ங் தேமாஸங் ஆகாஸச்ச²த³னங் அட்டா²ஸி, ந தே³வோதிவஸ்ஸீ’தி. புன ச ப⁴ணிதங் ‘கஸ்ஸபஸ்ஸ ததா²க³தஸ்ஸ 1 குடி ஓவஸ்ஸதீ’தி. கிஸ்ஸ பன, ப⁴ந்தே நாக³ஸேன, ததா²க³தஸ்ஸ ஏவமுஸ்ஸன்னகுஸலமூலஸ்ஸ 2 குடி ஓவஸ்ஸதி, ததா²க³தஸ்ஸ நாம ஸோ ஆனுபா⁴வோ இச்சி²தப்³போ³? யதி³, ப⁴ந்தே நாக³ஸேன, க⁴டிகாரஸ்ஸ கும்ப⁴காரஸ்ஸ ஆவேஸனங் அனோவஸ்ஸங் ஆகாஸச்ச²த³னங் அஹோஸி, தேன ஹி ‘ததா²க³தஸ்ஸ குடி ஓவஸ்ஸதீ’தி யங் வசனங், தங் மிச்சா². யதி³ ததா²க³தஸ்ஸ குடி ஓவஸ்ஸதி, தேன ஹி ‘க⁴டிகாரஸ்ஸ கும்ப⁴காரஸ்ஸ ஆவேஸனங் அனோவஸ்ஸகங் அஹோஸி ஆகாஸச்ச²த³ன’ந்தி தம்பி வசனங் மிச்சா². அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
7. ‘‘Bhante nāgasena, bhāsitampetaṃ bhagavatā ‘ghaṭikārassa kumbhakārassa āvesanaṃ sabbaṃ temāsaṃ ākāsacchadanaṃ aṭṭhāsi, na devotivassī’ti. Puna ca bhaṇitaṃ ‘kassapassa tathāgatassa 3 kuṭi ovassatī’ti. Kissa pana, bhante nāgasena, tathāgatassa evamussannakusalamūlassa 4 kuṭi ovassati, tathāgatassa nāma so ānubhāvo icchitabbo? Yadi, bhante nāgasena, ghaṭikārassa kumbhakārassa āvesanaṃ anovassaṃ ākāsacchadanaṃ ahosi, tena hi ‘tathāgatassa kuṭi ovassatī’ti yaṃ vacanaṃ, taṃ micchā. Yadi tathāgatassa kuṭi ovassati, tena hi ‘ghaṭikārassa kumbhakārassa āvesanaṃ anovassakaṃ ahosi ākāsacchadana’nti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘பா⁴ஸிதம்பேதங், மஹாராஜ, ப⁴க³வதா ‘க⁴டிகாரஸ்ஸ கும்ப⁴காரஸ்ஸ ஆவேஸனங் ஸப்³ப³ங் தேமாஸங் ஆகாஸச்ச²த³னங் அட்டா²ஸி, ந தே³வோதிவஸ்ஸீ’தி. ப⁴ணிதஞ்ச ‘கஸ்ஸபஸ்ஸ ததா²க³தஸ்ஸ குடி ஓவஸ்ஸதீ’தி. க⁴டிகாரோ, மஹாராஜ, கும்ப⁴காரோ ஸீலவா கல்யாணத⁴ம்மோ உஸ்ஸன்னகுஸலமூலோ அந்தே⁴ ஜிண்ணே மாதாபிதரோ போஸேதி, தஸ்ஸ அஸம்முகா² அனாபுச்சா²யேவஸ்ஸ க⁴ரே திணங் ஹரித்வா ப⁴க³வதோ குடிங் சா²தே³ஸுங், ஸோ தேன திணஹரணேன அகம்பிதங் அஸஞ்சலிதங் ஸுஸண்டி²தங் விபுலமஸமங் பீதிங் படிலப⁴தி, பி⁴ய்யோ ஸோமனஸ்ஸஞ்ச அதுலங் உப்பாதே³ஸி ‘அஹோ வத மே ப⁴க³வா லோகுத்தமோ ஸுவிஸ்ஸத்தோ²’தி, தேன தஸ்ஸ தி³ட்ட²த⁴ம்மிகோ விபாகோ நிப்³ப³த்தோ. ந ஹி, மஹாராஜ, ததா²க³தோ தாவதகேன விகாரேன சலதி.
‘‘Bhāsitampetaṃ, mahārāja, bhagavatā ‘ghaṭikārassa kumbhakārassa āvesanaṃ sabbaṃ temāsaṃ ākāsacchadanaṃ aṭṭhāsi, na devotivassī’ti. Bhaṇitañca ‘kassapassa tathāgatassa kuṭi ovassatī’ti. Ghaṭikāro, mahārāja, kumbhakāro sīlavā kalyāṇadhammo ussannakusalamūlo andhe jiṇṇe mātāpitaro poseti, tassa asammukhā anāpucchāyevassa ghare tiṇaṃ haritvā bhagavato kuṭiṃ chādesuṃ, so tena tiṇaharaṇena akampitaṃ asañcalitaṃ susaṇṭhitaṃ vipulamasamaṃ pītiṃ paṭilabhati, bhiyyo somanassañca atulaṃ uppādesi ‘aho vata me bhagavā lokuttamo suvissattho’ti, tena tassa diṭṭhadhammiko vipāko nibbatto. Na hi, mahārāja, tathāgato tāvatakena vikārena calati.
‘‘யதா², மஹாராஜ, ஸினேரு கி³ரிராஜா அனேகஸதஸஹஸ்ஸவாதஸம்பஹாரேனபி ந கம்பதி ந சலதி, மஹோத³தி⁴ வரப்பவரஸாக³ரோ அனேகஸதனஹுதமஹாக³ங்கா³ஸதஸஹஸ்ஸேஹிபி ந பூரதி ந விகாரமாபஜ்ஜதி, ஏவமேவ கோ², மஹாராஜ, ததா²க³தோ ந தாவதகேன விகாரேன சலதி.
‘‘Yathā, mahārāja, sineru girirājā anekasatasahassavātasampahārenapi na kampati na calati, mahodadhi varappavarasāgaro anekasatanahutamahāgaṅgāsatasahassehipi na pūrati na vikāramāpajjati, evameva kho, mahārāja, tathāgato na tāvatakena vikārena calati.
‘‘யங் பன, மஹாராஜ, ததா²க³தஸ்ஸ குடி ஓவஸ்ஸதி, தங் மஹதோ ஜனகாயஸ்ஸ அனுகம்பாய. த்³வேமே, மஹாராஜ, அத்த²வஸே ஸம்பஸ்ஸமானா ததா²க³தா ஸயங் நிம்மிதங் பச்சயங் நப்படிஸேவந்தி, ‘அயங் அக்³க³த³க்கி²ணெய்யோ ஸத்தா²’தி ப⁴க³வதோ பச்சயங் த³த்வா தே³வமனுஸ்ஸா ஸப்³ப³து³க்³க³திதோ பரிமுச்சிஸ்ஸந்தீதி, த³ஸ்ஸெத்வா வுத்திங் பரியேஸந்தீதி ‘மா அஞ்ஞே உபவதெ³ய்யு’ந்தி. இமே த்³வே அத்த²வஸே ஸம்பஸ்ஸமானா ததா²க³தா ஸயங் நிம்மிதங் பச்சயங் நப்படிஸேவந்தி. யதி³, மஹாராஜ, ஸக்கோ வா தங் குடிங் அனோவஸ்ஸங் கரெய்ய ப்³ரஹ்மா வா ஸயங் வா, ஸாவஜ்ஜங் ப⁴வெய்ய தங் யேவ கரணங் 5 ஸதோ³ஸங் ஸனிக்³க³ஹங், இமே விபூ⁴தங் 6 கத்வா லோகங் ஸம்மோஹெந்தி அதி⁴கதங் கரொந்தீதி, தஸ்மா தங் கரணங் வஜ்ஜனீயங். ந, மஹாராஜ, ததா²க³தா வத்து²ங் யாசந்தி, தாய அவத்து²யாசனாய அபரிபா⁴ஸியா ப⁴வந்தீ’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Yaṃ pana, mahārāja, tathāgatassa kuṭi ovassati, taṃ mahato janakāyassa anukampāya. Dveme, mahārāja, atthavase sampassamānā tathāgatā sayaṃ nimmitaṃ paccayaṃ nappaṭisevanti, ‘ayaṃ aggadakkhiṇeyyo satthā’ti bhagavato paccayaṃ datvā devamanussā sabbaduggatito parimuccissantīti, dassetvā vuttiṃ pariyesantīti ‘mā aññe upavadeyyu’nti. Ime dve atthavase sampassamānā tathāgatā sayaṃ nimmitaṃ paccayaṃ nappaṭisevanti. Yadi, mahārāja, sakko vā taṃ kuṭiṃ anovassaṃ kareyya brahmā vā sayaṃ vā, sāvajjaṃ bhaveyya taṃ yeva karaṇaṃ 7 sadosaṃ saniggahaṃ, ime vibhūtaṃ 8 katvā lokaṃ sammohenti adhikataṃ karontīti, tasmā taṃ karaṇaṃ vajjanīyaṃ. Na, mahārāja, tathāgatā vatthuṃ yācanti, tāya avatthuyācanāya aparibhāsiyā bhavantī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
க⁴டிகாரபஞ்ஹோ ஸத்தமோ.
Ghaṭikārapañho sattamo.
Footnotes:
