| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೪. ಘರಕಪೋತಙ್ಗಪಞ್ಹೋ
4. Gharakapotaṅgapañho
೪. ‘‘ಭನ್ತೇ ನಾಗಸೇನ, ‘ಘರಕಪೋತಸ್ಸ ಏಕಂ ಅಙ್ಗಂ ಗಹೇತಬ್ಬ’ನ್ತಿ ಯಂ ವದೇಸಿ, ಕತಮಂ ತಂ ಏಕಂ ಅಙ್ಗಂ ಗಹೇತಬ್ಬ’’ನ್ತಿ? ‘‘ಯಥಾ, ಮಹಾರಾಜ, ಘರಕಪೋತೋ ಪರಗೇಹೇ ವಸಮಾನೋ ನ ತೇಸಂ ಕಿಞ್ಚಿ ಭಣ್ಡಸ್ಸ ನಿಮಿತ್ತಂ ಗಣ್ಹಾತಿ, ಮಜ್ಝತ್ತೋ ವಸತಿ ಸಞ್ಞಾಬಹುಲೋ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಪರಕುಲಂ ಉಪಗತೇನ ತಸ್ಮಿಂ ಕುಲೇ ಇತ್ಥೀನಂ ವಾ ಪುರಿಸಾನಂ ವಾ ಮಞ್ಚೇ ವಾ ಪೀಠೇ ವಾ ವತ್ಥೇ ವಾ ಅಲಙ್ಕಾರೇ ವಾ ಉಪಭೋಗೇ ವಾ ಪರಿಭೋಗೇ ವಾ ಭೋಜನವಿಕತೀಸು ವಾ ನ ನಿಮಿತ್ತಂ ಗಹೇತಬ್ಬಂ, ಮಜ್ಝತ್ತೇನ ಭವಿತಬ್ಬಂ, ಸಮಣಸಞ್ಞಾ ಪಚ್ಚುಪಟ್ಠಪೇತಬ್ಬಾ। ಇದಂ, ಮಹಾರಾಜ, ಘರಕಪೋತಸ್ಸ ಏಕಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಭಗವತಾ ದೇವಾತಿದೇವೇನ ಚೂಳನಾರದಜಾತಕೇ –
4. ‘‘Bhante nāgasena, ‘gharakapotassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, gharakapoto paragehe vasamāno na tesaṃ kiñci bhaṇḍassa nimittaṃ gaṇhāti, majjhatto vasati saññābahulo, evameva kho, mahārāja, yoginā yogāvacarena parakulaṃ upagatena tasmiṃ kule itthīnaṃ vā purisānaṃ vā mañce vā pīṭhe vā vatthe vā alaṅkāre vā upabhoge vā paribhoge vā bhojanavikatīsu vā na nimittaṃ gahetabbaṃ, majjhattena bhavitabbaṃ, samaṇasaññā paccupaṭṭhapetabbā. Idaṃ, mahārāja, gharakapotassa ekaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena cūḷanāradajātake –
ಮಿತಂ ಖಾದೇ ಮಿತಂ ಭುಞ್ಜೇ, ನ ಚ ರೂಪೇ ಮನಂ ಕರೇ’’’ತಿ॥
Mitaṃ khāde mitaṃ bhuñje, na ca rūpe manaṃ kare’’’ti.
ಘರಕಪೋತಙ್ಗಪಞ್ಹೋ ಚತುತ್ಥೋ।
Gharakapotaṅgapañho catuttho.
Footnotes:
