| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
க³ந்தா²ரம்ப⁴கதா²வண்ணனா
Ganthārambhakathāvaṇṇanā
(க) எத்தா²ஹ – கதமா கு²த்³த³ஸிக்கா², கத²ங் ஸிக்கி²தப்³பா³, கஸ்மா ஸிக்கி²தப்³பா³, கே ஸிக்க²ந்தி, கே ஸிக்கி²தஸிக்கா²தி? வுச்சதே – அதி⁴ஸீலஅதி⁴சித்தஅதி⁴பஞ்ஞாவஸேன திஸ்ஸோ ஸிக்கா², க³ந்த²வஸேனெத்த² ஸங்கி²பித்வா வுத்தத்தா தத்³தீ³பனோ க³ந்தோ² ‘‘கு²த்³த³ஸிக்கா²’’தி வுச்சதி, அத² வா ‘‘கு²த்³த³ங் அனேலகங் மது⁴படல’’ந்திஆதீ³னி விய ஸிக்கா²காமானங் மது⁴ரதாய கு²த்³தா³ ச தா ஸிக்கா² சாதி கு²த்³த³ஸிக்கா², அத² வா ‘‘கு²த்³த³புத்தம்ஹி ஸமண போஸ ம’’ந்திஆதீ³ஸு விய ப³ஹுவித⁴த்தாபி கு²த்³தா³ ச தா ஸிக்கி²தப்³ப³தோ ஸிக்கா² சாதி கு²த்³த³ஸிக்கா². அதி⁴ஸீலஸிக்கா² பனெத்த² சாரித்தவாரித்தவஸேன து³வித⁴ம்பி ஸீலங் யதா²னுஸிட்ட²ங் படிபஜ்ஜமானேன தப்படிபக்கே² கிலேஸே தத³ங்க³ப்பஹானவஸேன பஜஹந்தேன ஸிக்கி²தப்³பா³, அதி⁴சித்தஸிக்கா² பன யதா²வுத்தேஸு ஆரம்மணேஸு அபி⁴யோக³கரணவஸேன ஜா²னப்படிபக்கா²னங் நீவரணக³ணானங் விக்க²ம்ப⁴னப்பஹானங் குருமானேன ஸிக்கி²தப்³பா³, அதி⁴பஞ்ஞாஸிக்கா² பன யதா²னுரூபங் ஸமுச்சே²த³வஸேன ஸானுஸயே கிலேஸே ஸமுச்சி²ந்த³ந்தேன ஸிக்கி²தப்³பா³.
(Ka) etthāha – katamā khuddasikkhā, kathaṃ sikkhitabbā, kasmā sikkhitabbā, ke sikkhanti, ke sikkhitasikkhāti? Vuccate – adhisīlaadhicittaadhipaññāvasena tisso sikkhā, ganthavasenettha saṅkhipitvā vuttattā taddīpano gantho ‘‘khuddasikkhā’’ti vuccati, atha vā ‘‘khuddaṃ anelakaṃ madhupaṭala’’ntiādīni viya sikkhākāmānaṃ madhuratāya khuddā ca tā sikkhā cāti khuddasikkhā, atha vā ‘‘khuddaputtamhi samaṇa posa ma’’ntiādīsu viya bahuvidhattāpi khuddā ca tā sikkhitabbato sikkhā cāti khuddasikkhā. Adhisīlasikkhā panettha cārittavārittavasena duvidhampi sīlaṃ yathānusiṭṭhaṃ paṭipajjamānena tappaṭipakkhe kilese tadaṅgappahānavasena pajahantena sikkhitabbā, adhicittasikkhā pana yathāvuttesu ārammaṇesu abhiyogakaraṇavasena jhānappaṭipakkhānaṃ nīvaraṇagaṇānaṃ vikkhambhanappahānaṃ kurumānena sikkhitabbā, adhipaññāsikkhā pana yathānurūpaṃ samucchedavasena sānusaye kilese samucchindantena sikkhitabbā.
கஸ்மா ஸிக்கி²தப்³பா³தி எத்த² –
Kasmā sikkhitabbāti ettha –
ஜாதிஆதீ³ஹி து³க்கே²ஹி, அனேகேஹி உபத்³து³தங்;
Jātiādīhi dukkhehi, anekehi upaddutaṃ;
க²ந்த⁴லோகங் ஜஹித்வான, பத்துங் கே²மங் புரங் ஸிவங்.
Khandhalokaṃ jahitvāna, pattuṃ khemaṃ puraṃ sivaṃ.
கல்யாணபுது²ஜ்ஜனேன ஸஹ ஸத்த ஸெக்கா² ஸிக்க²ந்தி. அரஹந்தோ ஸிக்கி²தஸிக்கா².
Kalyāṇaputhujjanena saha satta sekkhā sikkhanti. Arahanto sikkhitasikkhā.
யே வீதமோஹா முனிபுங்க³வஸ்ஸ;
Ye vītamohā munipuṅgavassa;
ஸிஸ்ஸேஸு அக்³கா³ முனினா பஸத்தா²;
Sissesu aggā muninā pasatthā;
தே தீஸு ஸிக்கா²ஸு ஸமத்தஸிக்கா²;
Te tīsu sikkhāsu samattasikkhā;
ததோ பரே கேன ஸமத்தஸிக்கா²தி.
Tato pare kena samattasikkhāti.
ஆதி³தோதி எத்த² ஆதி³ம்ஹியேவாதி அத்தோ², ஆதி³தோ பட்டா²யாதி வா. உபஸம்பன்னேன ச உபஸம்பன்னாய ச ஸிக்கி²தப்³ப³ங் உபஸம்பன்னஸிக்கி²தப்³ப³ங். ஸஹ மாதிகாய ஸமாதிகங். புப்³பே³ வுத்தப்பகாரங் கு²த்³த³ஸிக்க²ங் பவக்கா²மி ஆத³ரேன, பகாரேன வா வக்கா²மி ரதனத்தயங் வந்தி³த்வாதி அத்தோ². அபிச தே²ரோ ஆதி³தோதி வசனேன ஸத்³தா⁴பப்³ப³ஜிதானங் குலபுத்தானங் ஆலஸியதோ³ஸேன அப்படிபஜ்ஜந்தானங் அஞ்ஞாணதோ³ஸேன அஞ்ஞதா² படிபஜ்ஜந்தானங் ஸங்வேக³ங் ஜனேதி. கத²ங்? அதிது³ல்லப⁴ங் க²ணஸமவாயங் படிலபி⁴த்வா தங்க²ணங் ந குஸீதேன வா நிரத்த²ககதா²பஸுதேன வா வீதினாமேதப்³ப³ங், கிங் காதப்³ப³ங்? ஆதி³தோ பட்டா²ய நிரந்தரமேவ தீஸு ஸிக்கா²ஸு ஆத³ரோ ஜனேதப்³போ³தி. எத்தா²ஹ – கிங் தங் ரதனத்தயங் நாம, யங் வந்தி³த்வா தே²ரோ கு²த்³த³ஸிக்க²ங் பவக்க²தீதி? வுச்சதே – பு³த்³த⁴ரதனங் த⁴ம்மரதனங் ஸங்க⁴ரதனந்தி இமானி தீணி ரதனானி. தானி ஹி ரதிஜனநட்டே²ன ‘‘ரதனானீ’’தி வுச்சந்தி. அபிச –
Āditoti ettha ādimhiyevāti attho, ādito paṭṭhāyāti vā. Upasampannena ca upasampannāya ca sikkhitabbaṃ upasampannasikkhitabbaṃ. Saha mātikāya samātikaṃ. Pubbe vuttappakāraṃ khuddasikkhaṃ pavakkhāmi ādarena, pakārena vā vakkhāmi ratanattayaṃ vanditvāti attho. Apica thero āditoti vacanena saddhāpabbajitānaṃ kulaputtānaṃ ālasiyadosena appaṭipajjantānaṃ aññāṇadosena aññathā paṭipajjantānaṃ saṃvegaṃ janeti. Kathaṃ? Atidullabhaṃ khaṇasamavāyaṃ paṭilabhitvā taṅkhaṇaṃ na kusītena vā niratthakakathāpasutena vā vītināmetabbaṃ, kiṃ kātabbaṃ? Ādito paṭṭhāya nirantarameva tīsu sikkhāsu ādaro janetabboti. Etthāha – kiṃ taṃ ratanattayaṃ nāma, yaṃ vanditvā thero khuddasikkhaṃ pavakkhatīti? Vuccate – buddharatanaṃ dhammaratanaṃ saṅgharatananti imāni tīṇi ratanāni. Tāni hi ratijananaṭṭhena ‘‘ratanānī’’ti vuccanti. Apica –
‘‘சித்தீகதங் மஹக்³க⁴ஞ்ச, அதுலங் து³ல்லப⁴த³ஸ்ஸனங்;
‘‘Cittīkataṃ mahagghañca, atulaṃ dullabhadassanaṃ;
அனோமஸத்தபரிபோ⁴க³ங், ரதனங் தேன வுச்சதீ’’தி. (தீ³॰ நீ॰ அட்ட²॰ 2.33; ஸங்॰ நி॰ அட்ட²॰ 3.5.223; கு²॰ பா॰ அட்ட²॰ 6.3; ஸு॰ நி॰ அட்ட²॰ 1.226; மஹானி॰ அட்ட²॰ 50; உதா³॰ அட்ட²॰ 45) –
Anomasattaparibhogaṃ, ratanaṃ tena vuccatī’’ti. (dī. nī. aṭṭha. 2.33; saṃ. ni. aṭṭha. 3.5.223; khu. pā. aṭṭha. 6.3; su. ni. aṭṭha. 1.226; mahāni. aṭṭha. 50; udā. aṭṭha. 45) –
இமிஸ்ஸா கா³தா²ய வஸேன ரதனத்தோ² வேதி³தப்³போ³.
Imissā gāthāya vasena ratanattho veditabbo.
