| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
க³ந்தா²ரம்ப⁴கதா²வண்ணனா
Ganthārambhakathāvaṇṇanā
விப்பஸன்னேனாதி விவித⁴ப்பஸன்னேன. கத²ங்? ‘‘இதிபி ஸோ…பே॰… பு³த்³தோ⁴ ப⁴க³வா, ஸ்வாக்கா²தோ…பே॰… விஞ்ஞூஹி, ஸுப்படிபன்னோ…பே॰… லோகஸ்ஸா’’தி (அ॰ நி॰ 5.10) ஏவமாதி³னா. ‘‘சேதஸா’’தி வுத்தத்தா தீஸு வந்த³னாஸு சேதோவந்த³னா அதி⁴ப்பேதா. தன்னின்னதாதி³வஸேன காயாதீ³ஹி பணாமகரணங் வந்த³னா, கு³ணவஸேன மனஸாபி ததா²வ கரணங் மானங், பச்சயப்படிபத்தியாதீ³ஹி பூஜாகரணங் பூஜா, பச்சயாதீ³னங் அபி⁴ஸங்க²ரணங் ஸக்கச்ச கரணங் ஸக்காரோ, தேஸங். பா⁴ஜனந்தி ஆதா⁴ரோ, அதி⁴கரணங் வா.
Vippasannenāti vividhappasannena. Kathaṃ? ‘‘Itipi so…pe… buddho bhagavā, svākkhāto…pe… viññūhi, suppaṭipanno…pe… lokassā’’ti (a. ni. 5.10) evamādinā. ‘‘Cetasā’’ti vuttattā tīsu vandanāsu cetovandanā adhippetā. Tanninnatādivasena kāyādīhi paṇāmakaraṇaṃ vandanā, guṇavasena manasāpi tathāva karaṇaṃ mānaṃ, paccayappaṭipattiyādīhi pūjākaraṇaṃ pūjā, paccayādīnaṃ abhisaṅkharaṇaṃ sakkacca karaṇaṃ sakkāro, tesaṃ. Bhājananti ādhāro, adhikaraṇaṃ vā.
தே²ரா மஹாகஸ்ஸபாத³யோ, தேஸங் வங்ஸோதி தே²ரவங்ஸோ, ஆக³மாதி⁴க³மஸம்பதா³ய தஸ்ஸ வங்ஸஸ்ஸ பதீ³பபூ⁴தாதி தே²ரவங்ஸப்பதீ³பா, தேஸங் தே²ரவங்ஸப்பதீ³பானங். அஸங்ஹீரத்தா தி²ரானங். வினயக்கமேதி வினயபிடகே, ஆரம்பா⁴னுரூபவசனமேதங். ஸுத்தாபி⁴த⁴ம்மேஸுபி தே தி²ரா ஏவ. ‘‘பு³த்³த⁴ங் த⁴ம்மஞ்ச ஸங்க⁴ஞ்ச புப்³பா³சரியஸீஹானஞ்சா’’தி அவத்வா கஸ்மா விஸுங் வுத்தந்தி சே? பயோஜனவிஸேஸத³ஸ்ஸனத்த²ங். வத்து²த்தயஸ்ஸ ஹி பணாமகரணஸ்ஸ அந்தராயனிவாரணங் பயோஜனங் அத்தனோ நிஸ்ஸயபூ⁴தானங் ஆசரியானங் பணாமகரணஸ்ஸ உபகாரஞ்ஞுதாத³ஸ்ஸனங். தேன பு³த்³த⁴ஞ்ச த⁴ம்மஞ்ச ஸங்க⁴ஞ்ச வந்தி³த்வா, ச-ஸத்³தே³ன புப்³பா³சரியஸீஹானஞ்ச நமோ கத்வாதி யோஜனா. அத² வா ‘‘வந்தி³த்வா’’தி சேதோவந்த³னங் த³ஸ்ஸெத்வா ததோ ‘‘நமோ கத்வா’’தி வாசாவந்த³னா, ‘‘கதஞ்ஜலீ’’தி காயவந்த³னாபி த³ஸ்ஸிதாதி யோஜேதப்³ப³ங்.
Therā mahākassapādayo, tesaṃ vaṃsoti theravaṃso, āgamādhigamasampadāya tassa vaṃsassa padīpabhūtāti theravaṃsappadīpā, tesaṃ theravaṃsappadīpānaṃ. Asaṃhīrattā thirānaṃ. Vinayakkameti vinayapiṭake, ārambhānurūpavacanametaṃ. Suttābhidhammesupi te thirā eva. ‘‘Buddhaṃ dhammañca saṅghañca pubbācariyasīhānañcā’’ti avatvā kasmā visuṃ vuttanti ce? Payojanavisesadassanatthaṃ. Vatthuttayassa hi paṇāmakaraṇassa antarāyanivāraṇaṃ payojanaṃ attano nissayabhūtānaṃ ācariyānaṃ paṇāmakaraṇassa upakāraññutādassanaṃ. Tena buddhañca dhammañca saṅghañca vanditvā, ca-saddena pubbācariyasīhānañca namo katvāti yojanā. Atha vā ‘‘vanditvā’’ti cetovandanaṃ dassetvā tato ‘‘namo katvā’’ti vācāvandanā, ‘‘katañjalī’’ti kāyavandanāpi dassitāti yojetabbaṃ.
இதா³னி அபி⁴தா⁴னப்பயோஜனங் த³ஸ்ஸேதுங் ‘‘பாமொக்க²’’ந்திஆதி³மாஹ. தத்த² பாமொக்க²ந்தி பதா⁴னங். ஸீலஞ்ஹி ஸப்³பே³ஸங் குஸலத⁴ம்மானங் பதா⁴னங் ஆதி³பா⁴வதோ. யதா² ச ஸத்தானங் க²ஜ்ஜபோ⁴ஜ்ஜலெய்யபெய்யவஸேன சதுப்³பி³தோ⁴பி ஆஹாரோ முகே²ன பவிஸித்வா அங்க³மங்கா³னி ப²ரதி, ஏவங் யோகி³னோபி சாதுபூ⁴மகங் குஸலங் ஸீலமுகே²ன பவிஸித்வா அத்த²ஸித்³தி⁴ங் ஸம்பாதே³தி. தேன வுத்தங் ‘‘முக²’’ந்திஆதி³. அத² வா முக²ந்தி உபாயோ, தேன மொக்க²ப்பவேஸாய நிப்³பா³னஸச்சி²கிரியாய முக²ங் உபாயோதி அத்தோ². மஹேஸினா யங் பாதிமொக்க²ங் பகாஸிதந்தி ஸம்ப³ந்தோ⁴. மஹந்தே ஸீலாதி³க்க²ந்தே⁴ ஏஸி க³வேஸீதி மஹேஸி.
Idāni abhidhānappayojanaṃ dassetuṃ ‘‘pāmokkha’’ntiādimāha. Tattha pāmokkhanti padhānaṃ. Sīlañhi sabbesaṃ kusaladhammānaṃ padhānaṃ ādibhāvato. Yathā ca sattānaṃ khajjabhojjaleyyapeyyavasena catubbidhopi āhāro mukhena pavisitvā aṅgamaṅgāni pharati, evaṃ yoginopi cātubhūmakaṃ kusalaṃ sīlamukhena pavisitvā atthasiddhiṃ sampādeti. Tena vuttaṃ ‘‘mukha’’ntiādi. Atha vā mukhanti upāyo, tena mokkhappavesāya nibbānasacchikiriyāya mukhaṃ upāyoti attho. Mahesinā yaṃ pātimokkhaṃ pakāsitanti sambandho. Mahante sīlādikkhandhe esi gavesīti mahesi.
ஸூரதேன நிவாதேனாதி ‘‘தத்த² கதமங் ஸோரச்சங்? யோ காயிகோ அவீதிக்கமோ’’திஆதி³னா (த⁴॰ ஸ॰ 1349) ஸூரதேன, நீசவுத்தினா மானுத்³த⁴ச்சவஸேன அத்தானங் அனுக்கி²பனபா⁴வேன நிவாதேன. வினயாசாரயுத்தேன சாரித்தவாரித்தேஹி யுத்தேன. ‘‘ஸோணத்தே²ரேன யாசிதோ’’தி அவத்வா ‘‘ஸூரதேனா’’திஆதி³ கஸ்மா வுத்தங், கிங் து³ஸ்ஸீலேன வா து³ட்டே²ன வா அலஜ்ஜினா வா யாசிதேன வண்ணனா காதுங் ந வட்டதீதி சே? ந ந வட்டதி. தே²ரஸ்ஸ வசனங் படிக்கி²பிதுங் ந ஸக்கா, ஏவரூபகு³ணோ தே²ரோவ, யாசனவஸேன கத்தப்³போ³ ஆத³ரேனாதி த³ஸ்ஸேதுங் வுத்தங்.
Sūratena nivātenāti ‘‘tattha katamaṃ soraccaṃ? Yo kāyiko avītikkamo’’tiādinā (dha. sa. 1349) sūratena, nīcavuttinā mānuddhaccavasena attānaṃ anukkhipanabhāvena nivātena. Vinayācārayuttena cārittavārittehi yuttena. ‘‘Soṇattherena yācito’’ti avatvā ‘‘sūratenā’’tiādi kasmā vuttaṃ, kiṃ dussīlena vā duṭṭhena vā alajjinā vā yācitena vaṇṇanā kātuṃ na vaṭṭatīti ce? Na na vaṭṭati. Therassa vacanaṃ paṭikkhipituṃ na sakkā, evarūpaguṇo therova, yācanavasena kattabbo ādarenāti dassetuṃ vuttaṃ.
நாமேனாதி அத்தனோ கு³ணனாமேன. ஸத்³த³லக்க²ணஸுப⁴தோ, வினிச்ச²யஸுப⁴தோ, விஞ்ஞெய்யஸுப⁴தோ ச ஸுப⁴ங்.
Nāmenāti attano guṇanāmena. Saddalakkhaṇasubhato, vinicchayasubhato, viññeyyasubhato ca subhaṃ.
க³ந்தா²ரம்ப⁴கதா²வண்ணனா நிட்டி²தா.
Ganthārambhakathāvaṇṇanā niṭṭhitā.
