| Library / Tipiṭaka / ತಿಪಿಟಕ • Tipiṭaka / ವಿನಯಸಙ್ಗಹ-ಅಟ್ಠಕಥಾ • Vinayasaṅgaha-aṭṭhakathā |
॥ ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ॥
Namo tassa bhagavato arahato sammāsambuddhassa
ವಿನಯಪಿಟಕೇ
Vinayapiṭake
ವಿನಯಸಙ್ಗಹ-ಅಟ್ಠಕಥಾ
Vinayasaṅgaha-aṭṭhakathā
ಗನ್ಥಾರಮ್ಭಕಥಾ
Ganthārambhakathā
ವತ್ಥುತ್ತಯಂ ನಮಸ್ಸಿತ್ವಾ, ಸರಣಂ ಸಬ್ಬಪಾಣಿನಂ।
Vatthuttayaṃ namassitvā, saraṇaṃ sabbapāṇinaṃ;
ವಿನಯೇ ಪಾಟವತ್ಥಾಯ, ಯೋಗಾವಚರಭಿಕ್ಖುನಂ॥
Vinaye pāṭavatthāya, yogāvacarabhikkhunaṃ.
ವಿಪ್ಪಕಿಣ್ಣಮನೇಕತ್ಥ, ಪಾಳಿಮುತ್ತವಿನಿಚ್ಛಯಂ।
Vippakiṇṇamanekattha, pāḷimuttavinicchayaṃ;
ಸಮಾಹರಿತ್ವಾ ಏಕತ್ಥ, ದಸ್ಸಯಿಸ್ಸಮನಾಕುಲಂ॥
Samāharitvā ekattha, dassayissamanākulaṃ.
ತತ್ರಾಯಂ ಮಾತಿಕಾ –
Tatrāyaṃ mātikā –
‘‘ದಿವಾಸೇಯ್ಯಾ ಪರಿಕ್ಖಾರೋ, ಭೇಸಜ್ಜಕರಣಮ್ಪಿ ಚ।
‘‘Divāseyyā parikkhāro, bhesajjakaraṇampi ca;
ಪರಿತ್ತಂ ಪಟಿಸನ್ಥಾರೋ, ವಿಞ್ಞತ್ತಿ ಕುಲಸಙ್ಗಹೋ॥
Parittaṃ paṭisanthāro, viññatti kulasaṅgaho.
‘‘ಮಚ್ಛಮಂಸಂ ಅನಾಮಾಸಂ, ಅಧಿಟ್ಠಾನವಿಕಪ್ಪನಂ।
‘‘Macchamaṃsaṃ anāmāsaṃ, adhiṭṭhānavikappanaṃ;
ಚೀವರೇನವಿನಾವಾಸೋ, ಭಣ್ಡಸ್ಸ ಪಟಿಸಾಮನಂ॥
Cīvarenavināvāso, bhaṇḍassa paṭisāmanaṃ.
‘‘ಕಯವಿಕ್ಕಯಸಮಾಪತ್ತಿ, ರೂಪಿಯಾದಿಪಟಿಗ್ಗಹೋ।
‘‘Kayavikkayasamāpatti, rūpiyādipaṭiggaho;
ದಾನವಿಸ್ಸಾಸಗ್ಗಾಹೇಹಿ, ಲಾಭಸ್ಸ ಪರಿಣಾಮನಂ॥
Dānavissāsaggāhehi, lābhassa pariṇāmanaṃ.
‘‘ಪಥವೀ ಭೂತಗಾಮೋ ಚ, ದುವಿಧಂ ಸಹಸೇಯ್ಯಕಂ।
‘‘Pathavī bhūtagāmo ca, duvidhaṃ sahaseyyakaṃ;
ವಿಹಾರೇ ಸಙ್ಘಿಕೇ ಸೇಯ್ಯಂ, ಸನ್ಥರಿತ್ವಾನ ಪಕ್ಕಮೋ॥
Vihāre saṅghike seyyaṃ, santharitvāna pakkamo.
‘‘ಕಾಲಿಕಾನಿಪಿ ಚತ್ತಾರಿ, ಕಪ್ಪಿಯಾ ಚತುಭೂಮಿಯೋ।
‘‘Kālikānipi cattāri, kappiyā catubhūmiyo;
ಖಾದನೀಯಾದಿಪಟಿಗ್ಗಾಹೋ, ಪಟಿಕ್ಖೇಪಪವಾರಣಾ॥
Khādanīyādipaṭiggāho, paṭikkhepapavāraṇā.
‘‘ಪಬ್ಬಜ್ಜಾ ನಿಸ್ಸಯೋ ಸೀಮಾ, ಉಪೋಸಥಪವಾರಣಂ।
‘‘Pabbajjā nissayo sīmā, uposathapavāraṇaṃ;
ವಸ್ಸೂಪನಾಯಿಕಾ ವತ್ತಂ, ಚತುಪಚ್ಚಯಭಾಜನಂ॥
Vassūpanāyikā vattaṃ, catupaccayabhājanaṃ.
‘‘ಕಥಿನಂ ಗರುಭಣ್ಡಾನಿ, ಚೋದನಾದಿವಿನಿಚ್ಛಯೋ।
‘‘Kathinaṃ garubhaṇḍāni, codanādivinicchayo;
ಗರುಕಾಪತ್ತಿವುಟ್ಠಾನಂ, ಕಮ್ಮಾಕಮ್ಮಂ ಪಕಿಣ್ಣಕ’’ನ್ತಿ॥
Garukāpattivuṭṭhānaṃ, kammākammaṃ pakiṇṇaka’’nti.
