| Library / Tipiṭaka / តិបិដក • Tipiṭaka / សុត្តនិបាត-អដ្ឋកថា • Suttanipāta-aṭṭhakathā |
។ នមោ តស្ស ភគវតោ អរហតោ សម្មាសម្ពុទ្ធស្ស។
Namo tassa bhagavato arahato sammāsambuddhassa
ខុទ្ទកនិកាយេ
Khuddakanikāye
សុត្តនិបាត-អដ្ឋកថា
Suttanipāta-aṭṭhakathā
(បឋមោ ភាគោ)
(Paṭhamo bhāgo)
គន្ថារម្ភកថា
Ganthārambhakathā
ឧត្តមំ វន្ទនេយ្យានំ, វន្ទិត្វា រតនត្តយំ;
Uttamaṃ vandaneyyānaṃ, vanditvā ratanattayaṃ;
យោ ខុទ្ទកនិកាយម្ហិ, ខុទ្ទាចារប្បហាយិនា។
Yo khuddakanikāyamhi, khuddācārappahāyinā.
ទេសិតោ លោកនាថេន, លោកនិស្សរណេសិនា;
Desito lokanāthena, lokanissaraṇesinā;
តស្ស សុត្តនិបាតស្ស, ករិស្សាមត្ថវណ្ណនំ។
Tassa suttanipātassa, karissāmatthavaṇṇanaṃ.
អយំ សុត្តនិបាតោ ច, ខុទ្ទកេស្វេវ ឱគធោ;
Ayaṃ suttanipāto ca, khuddakesveva ogadho;
យស្មា តស្មា ឥមស្សាបិ, ករិស្សាមត្ថវណ្ណនំ។
Yasmā tasmā imassāpi, karissāmatthavaṇṇanaṃ.
គាថាសតសមាកិណ្ណោ, គេយ្យព្យាករណង្កិតោ;
Gāthāsatasamākiṇṇo, geyyabyākaraṇaṅkito;
កស្មា សុត្តនិបាតោតិ, សង្ខមេស គតោតិ ចេ។
Kasmā suttanipātoti, saṅkhamesa gatoti ce.
សុវុត្តតោ សវនតោ, អត្ថានំ សុដ្ឋុ តាណតោ;
Suvuttato savanato, atthānaṃ suṭṭhu tāṇato;
សូចនា សូទនា ចេវ, យស្មា សុត្តំ បវុច្ចតិ។
Sūcanā sūdanā ceva, yasmā suttaṃ pavuccati.
តថារូបានិ សុត្តានិ, និបាតេត្វា តតោ តតោ;
Tathārūpāni suttāni, nipātetvā tato tato;
សមូហតោ អយំ តស្មា, សង្ខមេវមុបាគតោ។
Samūhato ayaṃ tasmā, saṅkhamevamupāgato.
សព្ពានិ ចាបិ សុត្តានិ, បមាណន្តេន តាទិនោ;
Sabbāni cāpi suttāni, pamāṇantena tādino;
វចនានិ អយំ តេសំ, និបាតោ ច យតោ តតោ។
Vacanāni ayaṃ tesaṃ, nipāto ca yato tato.
អញ្ញសង្ខានិមិត្តានំ, វិសេសានមភាវតោ;
Aññasaṅkhānimittānaṃ, visesānamabhāvato;
សង្ខំ សុត្តនិបាតោតិ, ឯវមេវ សមជ្ឈគាតិ។
Saṅkhaṃ suttanipātoti, evameva samajjhagāti.
