| Library / Tipiṭaka / ติปิฎก • Tipiṭaka / กงฺขาวิตรณี-อภินว-ฎีกา • Kaṅkhāvitaraṇī-abhinava-ṭīkā |
ฯ นโม ตสฺส ภควโต อรหโต สมฺมาสมฺพุทฺธสฺสฯ
Namo tassa bhagavato arahato sammāsambuddhassa
กงฺขาวิตรณี-อภินวฎีกา
Kaṅkhāvitaraṇī-abhinavaṭīkā
คนฺถารมฺภกถา
Ganthārambhakathā
ติโลกติลกํ พุทฺธํ, วเนฺท สุทฺธคุณากรํ;
Tilokatilakaṃ buddhaṃ, vande suddhaguṇākaraṃ;
กรุณาสีตลีภูต-หทยํ มหิโตทยํฯ
Karuṇāsītalībhūta-hadayaṃ mahitodayaṃ.
เตนาปิ ธมฺมราเชน, โลเกกาจริเยน โย;
Tenāpi dhammarājena, lokekācariyena yo;
ปูชิโต ตญฺจ สทฺธมฺมํ, วเนฺท คมฺภีรมุตฺตมํฯ
Pūjito tañca saddhammaṃ, vande gambhīramuttamaṃ.
มุนินฺทจนฺทสทฺธมฺม-รํสีหิ วิมเลหิ โย;
Munindacandasaddhamma-raṃsīhi vimalehi yo;
โพธิโตหํ สทา วเนฺท, ตํ สงฺฆํ กุมุทากรํฯ
Bodhitohaṃ sadā vande, taṃ saṅghaṃ kumudākaraṃ.
วินเย นยคมฺภีเร, สพฺพถา ปารทสฺสินา;
Vinaye nayagambhīre, sabbathā pāradassinā;
วาทินา ทุตฺตราคาธ-สพฺพสตฺถมหณฺณเวฯ
Vādinā duttarāgādha-sabbasatthamahaṇṇave.
ยา กตา พุทฺธโฆเสน, เถเรน ถิรเจตสา;
Yā katā buddhaghosena, therena thiracetasā;
กงฺขาวิตรณี นาม, มาติกฎฺฐกถา สุภาฯ
Kaṅkhāvitaraṇī nāma, mātikaṭṭhakathā subhā.
ถิราเนกคุโณเฆน, เถเรน วินยญฺญุนา;
Thirānekaguṇoghena, therena vinayaññunā;
กลฺยาณาจารยุเตฺตน, ธีมตา มุนิสูนุนา;
Kalyāṇācārayuttena, dhīmatā munisūnunā;
วินยฎฺฐิติกาเมน, สุเมเธนาภิยาจิโตฯ
Vinayaṭṭhitikāmena, sumedhenābhiyācito.
ตมหํ วณฺณยิสฺสามิ, สุวิสุทฺธมนากุลํ;
Tamahaṃ vaṇṇayissāmi, suvisuddhamanākulaṃ;
สาธโว ตํ นิสาเมถ, สกฺกจฺจํ มม ภาสโตติฯ
Sādhavo taṃ nisāmetha, sakkaccaṃ mama bhāsatoti.
