| Library / Tipiṭaka / ติปิฎก • Tipiṭaka / สุตฺตนิปาต-อฎฺฐกถา • Suttanipāta-aṭṭhakathā |
ฯ นโม ตสฺส ภควโต อรหโต สมฺมาสมฺพุทฺธสฺสฯ
Namo tassa bhagavato arahato sammāsambuddhassa
ขุทฺทกนิกาเย
Khuddakanikāye
สุตฺตนิปาต-อฎฺฐกถา
Suttanipāta-aṭṭhakathā
(ปฐโม ภาโค)
(Paṭhamo bhāgo)
คนฺถารมฺภกถา
Ganthārambhakathā
อุตฺตมํ วนฺทเนยฺยานํ, วนฺทิตฺวา รตนตฺตยํ;
Uttamaṃ vandaneyyānaṃ, vanditvā ratanattayaṃ;
โย ขุทฺทกนิกายมฺหิ, ขุทฺทาจารปฺปหายินาฯ
Yo khuddakanikāyamhi, khuddācārappahāyinā.
เทสิโต โลกนาเถน, โลกนิสฺสรเณสินา;
Desito lokanāthena, lokanissaraṇesinā;
ตสฺส สุตฺตนิปาตสฺส, กริสฺสามตฺถวณฺณนํฯ
Tassa suttanipātassa, karissāmatthavaṇṇanaṃ.
อยํ สุตฺตนิปาโต จ, ขุทฺทเกเสฺวว โอคโธ;
Ayaṃ suttanipāto ca, khuddakesveva ogadho;
ยสฺมา ตสฺมา อิมสฺสาปิ, กริสฺสามตฺถวณฺณนํฯ
Yasmā tasmā imassāpi, karissāmatthavaṇṇanaṃ.
คาถาสตสมากิโณฺณ, เคยฺยพฺยากรณงฺกิโต;
Gāthāsatasamākiṇṇo, geyyabyākaraṇaṅkito;
กสฺมา สุตฺตนิปาโตติ, สงฺขเมส คโตติ เจฯ
Kasmā suttanipātoti, saṅkhamesa gatoti ce.
สุวุตฺตโต สวนโต, อตฺถานํ สุฎฺฐุ ตาณโต;
Suvuttato savanato, atthānaṃ suṭṭhu tāṇato;
สูจนา สูทนา เจว, ยสฺมา สุตฺตํ ปวุจฺจติฯ
Sūcanā sūdanā ceva, yasmā suttaṃ pavuccati.
ตถารูปานิ สุตฺตานิ, นิปาเตตฺวา ตโต ตโต;
Tathārūpāni suttāni, nipātetvā tato tato;
สมูหโต อยํ ตสฺมา, สงฺขเมวมุปาคโตฯ
Samūhato ayaṃ tasmā, saṅkhamevamupāgato.
สพฺพานิ จาปิ สุตฺตานิ, ปมาณเนฺตน ตาทิโน;
Sabbāni cāpi suttāni, pamāṇantena tādino;
วจนานิ อยํ เตสํ, นิปาโต จ ยโต ตโตฯ
Vacanāni ayaṃ tesaṃ, nipāto ca yato tato.
อญฺญสงฺขานิมิตฺตานํ, วิเสสานมภาวโต;
Aññasaṅkhānimittānaṃ, visesānamabhāvato;
สงฺขํ สุตฺตนิปาโตติ, เอวเมว สมชฺฌคาติฯ
Saṅkhaṃ suttanipātoti, evameva samajjhagāti.
