| Library / Tipiṭaka / तिपिटक • Tipiṭaka / विनयविनिच्छय-उत्तरविनिच्छय • Vinayavinicchaya-uttaravinicchaya |
॥ नमो तस्स भगवतो अरहतो सम्मासम्बुद्धस्स॥
Namo tassa bhagavato arahato sammāsambuddhassa
विनयविनिच्छयो
Vinayavinicchayo
गन्थारम्भकथा
Ganthārambhakathā
१.
1.
वन्दित्वा सिरसा सेट्ठं, बुद्धमप्पटिपुग्गलं।
Vanditvā sirasā seṭṭhaṃ, buddhamappaṭipuggalaṃ;
भवाभावकरं धम्मं, गणञ्चेव निरङ्गणं॥
Bhavābhāvakaraṃ dhammaṃ, gaṇañceva niraṅgaṇaṃ.
२.
2.
भिक्खूनं भिक्खुनीनञ्च, हितत्थाय समाहितो।
Bhikkhūnaṃ bhikkhunīnañca, hitatthāya samāhito;
पवक्खामि समासेन, विनयस्सविनिच्छयं॥
Pavakkhāmi samāsena, vinayassavinicchayaṃ.
३.
3.
अनाकुलमसंकिण्णं, मधुरत्थपदक्कमं।
Anākulamasaṃkiṇṇaṃ, madhuratthapadakkamaṃ;
पटुभावकरं एतं, परमं विनयक्कमे॥
Paṭubhāvakaraṃ etaṃ, paramaṃ vinayakkame.
४.
4.
अपारं ओतरन्तानं, सारं विनयसागरं।
Apāraṃ otarantānaṃ, sāraṃ vinayasāgaraṃ;
भिक्खूनं भिक्खुनीनञ्च, नावाभूतं मनोरमं॥
Bhikkhūnaṃ bhikkhunīnañca, nāvābhūtaṃ manoramaṃ.
५.
5.
तस्मा विनयनूपायं, विनयस्सविनिच्छयं।
Tasmā vinayanūpāyaṃ, vinayassavinicchayaṃ;
अविक्खित्तेन चित्तेन, वदतो मे निबोधथ॥
Avikkhittena cittena, vadato me nibodhatha.
