| Library / Tipiṭaka / तिपिटक • Tipiṭaka / विनयसङ्गह-अट्ठकथा • Vinayasaṅgaha-aṭṭhakathā |
॥ नमो तस्स भगवतो अरहतो सम्मासम्बुद्धस्स॥
Namo tassa bhagavato arahato sammāsambuddhassa
विनयपिटके
Vinayapiṭake
विनयसङ्गह-अट्ठकथा
Vinayasaṅgaha-aṭṭhakathā
गन्थारम्भकथा
Ganthārambhakathā
वत्थुत्तयं नमस्सित्वा, सरणं सब्बपाणिनं।
Vatthuttayaṃ namassitvā, saraṇaṃ sabbapāṇinaṃ;
विनये पाटवत्थाय, योगावचरभिक्खुनं॥
Vinaye pāṭavatthāya, yogāvacarabhikkhunaṃ.
विप्पकिण्णमनेकत्थ, पाळिमुत्तविनिच्छयं।
Vippakiṇṇamanekattha, pāḷimuttavinicchayaṃ;
समाहरित्वा एकत्थ, दस्सयिस्समनाकुलं॥
Samāharitvā ekattha, dassayissamanākulaṃ.
तत्रायं मातिका –
Tatrāyaṃ mātikā –
‘‘दिवासेय्या परिक्खारो, भेसज्जकरणम्पि च।
‘‘Divāseyyā parikkhāro, bhesajjakaraṇampi ca;
परित्तं पटिसन्थारो, विञ्ञत्ति कुलसङ्गहो॥
Parittaṃ paṭisanthāro, viññatti kulasaṅgaho.
‘‘मच्छमंसं अनामासं, अधिट्ठानविकप्पनं।
‘‘Macchamaṃsaṃ anāmāsaṃ, adhiṭṭhānavikappanaṃ;
चीवरेनविनावासो, भण्डस्स पटिसामनं॥
Cīvarenavināvāso, bhaṇḍassa paṭisāmanaṃ.
‘‘कयविक्कयसमापत्ति, रूपियादिपटिग्गहो।
‘‘Kayavikkayasamāpatti, rūpiyādipaṭiggaho;
दानविस्सासग्गाहेहि, लाभस्स परिणामनं॥
Dānavissāsaggāhehi, lābhassa pariṇāmanaṃ.
‘‘पथवी भूतगामो च, दुविधं सहसेय्यकं।
‘‘Pathavī bhūtagāmo ca, duvidhaṃ sahaseyyakaṃ;
विहारे सङ्घिके सेय्यं, सन्थरित्वान पक्कमो॥
Vihāre saṅghike seyyaṃ, santharitvāna pakkamo.
‘‘कालिकानिपि चत्तारि, कप्पिया चतुभूमियो।
‘‘Kālikānipi cattāri, kappiyā catubhūmiyo;
खादनीयादिपटिग्गाहो, पटिक्खेपपवारणा॥
Khādanīyādipaṭiggāho, paṭikkhepapavāraṇā.
‘‘पब्बज्जा निस्सयो सीमा, उपोसथपवारणं।
‘‘Pabbajjā nissayo sīmā, uposathapavāraṇaṃ;
वस्सूपनायिका वत्तं, चतुपच्चयभाजनं॥
Vassūpanāyikā vattaṃ, catupaccayabhājanaṃ.
‘‘कथिनं गरुभण्डानि, चोदनादिविनिच्छयो।
‘‘Kathinaṃ garubhaṇḍāni, codanādivinicchayo;
गरुकापत्तिवुट्ठानं, कम्माकम्मं पकिण्णक’’न्ति॥
Garukāpattivuṭṭhānaṃ, kammākammaṃ pakiṇṇaka’’nti.
