| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
॥ नमो तस्स भगवतो अरहतो सम्मासम्बुद्धस्स॥
Namo tassa bhagavato arahato sammāsambuddhassa
खुद्दसिक्खा-पुराणटीका
Khuddasikkhā-purāṇaṭīkā
गन्थारम्भकथा
Ganthārambhakathā
यो चिरं दीघमद्धानं, विदित्वा दुक्खितं जनं।
Yo ciraṃ dīghamaddhānaṃ, viditvā dukkhitaṃ janaṃ;
तथापि नावबुज्झन्तमनुकम्पाय चोदितो॥
Tathāpi nāvabujjhantamanukampāya codito.
बोधाय पणिधिं कत्वा, पत्तो सम्बोधिमुत्तमं।
Bodhāya paṇidhiṃ katvā, patto sambodhimuttamaṃ;
तस्स पादे नमस्सित्वा, धम्मं सङ्घञ्च साधुकं॥
Tassa pāde namassitvā, dhammaṃ saṅghañca sādhukaṃ.
पुब्बाचरियपादेसु, ठपेत्वा सीसमत्तनो।
Pubbācariyapādesu, ṭhapetvā sīsamattano;
थेरेन धम्मसिरिना, थिरसीलेन या कता॥
Therena dhammasirinā, thirasīlena yā katā.
‘‘आदितो उपसम्पन्नसिक्खितब्ब’’न्तिआदिना।
‘‘Ādito upasampannasikkhitabba’’ntiādinā;
खुद्दसिक्खा समासेन, तस्सा अत्थविनिच्छयं॥
Khuddasikkhā samāsena, tassā atthavinicchayaṃ.
लिखिस्सामि हितत्थाय, आदिकम्मिकभिक्खुनं।
Likhissāmi hitatthāya, ādikammikabhikkhunaṃ;
तत्थ युत्तं गहेतब्बमयुत्तं तुज्झितब्बकन्ति।
Tattha yuttaṃ gahetabbamayuttaṃ tujjhitabbakanti;
