| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
॥ नमो तस्स भगवतो अरहतो सम्मासम्बुद्धस्स॥
Namo tassa bhagavato arahato sammāsambuddhassa
कङ्खावितरणी-अभिनवटीका
Kaṅkhāvitaraṇī-abhinavaṭīkā
गन्थारम्भकथा
Ganthārambhakathā
तिलोकतिलकं बुद्धं, वन्दे सुद्धगुणाकरं।
Tilokatilakaṃ buddhaṃ, vande suddhaguṇākaraṃ;
करुणासीतलीभूत-हदयं महितोदयं॥
Karuṇāsītalībhūta-hadayaṃ mahitodayaṃ.
तेनापि धम्मराजेन, लोकेकाचरियेन यो।
Tenāpi dhammarājena, lokekācariyena yo;
पूजितो तञ्च सद्धम्मं, वन्दे गम्भीरमुत्तमं॥
Pūjito tañca saddhammaṃ, vande gambhīramuttamaṃ.
मुनिन्दचन्दसद्धम्म-रंसीहि विमलेहि यो।
Munindacandasaddhamma-raṃsīhi vimalehi yo;
बोधितोहं सदा वन्दे, तं सङ्घं कुमुदाकरं॥
Bodhitohaṃ sadā vande, taṃ saṅghaṃ kumudākaraṃ.
विनये नयगम्भीरे, सब्बथा पारदस्सिना।
Vinaye nayagambhīre, sabbathā pāradassinā;
वादिना दुत्तरागाध-सब्बसत्थमहण्णवे॥
Vādinā duttarāgādha-sabbasatthamahaṇṇave.
या कता बुद्धघोसेन, थेरेन थिरचेतसा।
Yā katā buddhaghosena, therena thiracetasā;
कङ्खावितरणी नाम, मातिकट्ठकथा सुभा॥
Kaṅkhāvitaraṇī nāma, mātikaṭṭhakathā subhā.
थिरानेकगुणोघेन, थेरेन विनयञ्ञुना।
Thirānekaguṇoghena, therena vinayaññunā;
कल्याणाचारयुत्तेन, धीमता मुनिसूनुना।
Kalyāṇācārayuttena, dhīmatā munisūnunā;
विनयट्ठितिकामेन, सुमेधेनाभियाचितो॥
Vinayaṭṭhitikāmena, sumedhenābhiyācito.
तमहं वण्णयिस्सामि, सुविसुद्धमनाकुलं।
Tamahaṃ vaṇṇayissāmi, suvisuddhamanākulaṃ;
साधवो तं निसामेथ, सक्कच्चं मम भासतोति॥
Sādhavo taṃ nisāmetha, sakkaccaṃ mama bhāsatoti.
