| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၄. ဂန္ဓောဒကိယတ္ထေရအပဒာနဝဏ္ဏနာ
4. Gandhodakiyattheraapadānavaṇṇanā
ပဒုမုတ္တရဗုဒ္ဓသ္သာတိအာဒိကံ အာယသ္မတော ဂန္ဓောဒကိယတ္ထေရသ္သ အပဒာနံ။ အယမ္ပိ ပုရိမမုနိဝရေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ပဒုမုတ္တရသ္သ ဘဂဝတော ကာလေ ကုလဂေဟေ နိဗ္ဗတ္တော ပရိနိဗ္ဗုတေ ဘဂဝတိ နဂရဝာသိနော ဗောဓိပူဇံ ကုရုမာနေ ဒိသ္ဝာ ဝိစိတ္တဃဋေ စန္ဒနကပ္ပုရာဂရုအာဒိမိသ္သကသုဂန္ဓောဒကေန ပူရေတ္ဝာ ဗောဓိရုက္ခံ အဘိသိဉ္စိ။ တသ္မိံ ခဏေ ဒေဝော မဟာဓာရာဟိ ပဝသ္သိ။ တဒာ သော အသနိဝေဂေန ကာလံ ကတော။ တေနေဝ ပုညကမ္မေန ဒေဝလောကေ နိဗ္ဗတ္တိ, တတ္ထေဝ ဌိတော ‘‘အဟော ဗုဒ္ဓော, အဟော ဓမ္မော’’တိအာဒိဂာထာယော အဘာသိ။ ဧဝံ သော ဒေဝမနုသ္သေသု သမ္ပတ္တိယော အနုဘဝိတ္ဝာ သဗ္ဗပရိဠာဟဝိပ္ပမုတ္တော နိဗ္ဗတ္တနိဗ္ဗတ္တဋ္ဌာနေ သီတိဘာဝမုပဂတော သုခိတော ဣမသ္မိံ ဗုဒ္ဓုပ္ပာဒေ ကုလဂေဟေ နိဗ္ဗတ္တော ဝိညုတံ ပတ္တော သတ္ထရိ ပသန္နော ပဗ္ဗဇိတ္ဝာ ကမ္မဋ္ဌာနံ အာရဘိတ္ဝာ ဝိပသ္သန္တော နစိရသ္သေဝ အရဟတ္တံ ပာပုဏိ။ ပုဗ္ဗေ ကတပုညေန ဂန္ဓောဒကိယတ္ထေရောတိ ပာကဋော အဟောသိ။
Padumuttarabuddhassātiādikaṃ āyasmato gandhodakiyattherassa apadānaṃ. Ayampi purimamunivaresu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle kulagehe nibbatto parinibbute bhagavati nagaravāsino bodhipūjaṃ kurumāne disvā vicittaghaṭe candanakappurāgaruādimissakasugandhodakena pūretvā bodhirukkhaṃ abhisiñci. Tasmiṃ khaṇe devo mahādhārāhi pavassi. Tadā so asanivegena kālaṃ kato. Teneva puññakammena devaloke nibbatti, tattheva ṭhito ‘‘aho buddho, aho dhammo’’tiādigāthāyo abhāsi. Evaṃ so devamanussesu sampattiyo anubhavitvā sabbapariḷāhavippamutto nibbattanibbattaṭṭhāne sītibhāvamupagato sukhito imasmiṃ buddhuppāde kulagehe nibbatto viññutaṃ patto satthari pasanno pabbajitvā kammaṭṭhānaṃ ārabhitvā vipassanto nacirasseva arahattaṃ pāpuṇi. Pubbe katapuññena gandhodakiyattheroti pākaṭo ahosi.
၂၅. သော ဧကဒိဝသံ အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ပဒုမုတရသ္သာတိအာဒိမာဟ။ တံ ဝုတ္တတ္ထမေဝ။ မဟာဗောဓိမဟော အဟူတိ မဟာဗောဓိရုက္ခသ္သ ပူဇာ အဟောသီတိ အတ္ထော။ ဝိစိတ္တံ ဃဋမာဒာယာတိ အနေကေဟိ စိတ္တကမ္မသုဝဏ္ဏကမ္မေဟိ ဝိစိတ္တံ သောဘမာနံ ဂန္ဓောဒကပုဏ္ဏံ ဃဋံ ဂဟေတ္ဝာတိ အတ္ထော ။ ဂန္ဓောဒကမဒာသဟန္တိ ဂန္ဓောဒကံ အဒာသိံ, အဟံ ဂန္ဓောဒကေန အဘိသိဉ္စိန္တိ အတ္ထော။
25. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento padumutarassātiādimāha. Taṃ vuttatthameva. Mahābodhimaho ahūti mahābodhirukkhassa pūjā ahosīti attho. Vicittaṃ ghaṭamādāyāti anekehi cittakammasuvaṇṇakammehi vicittaṃ sobhamānaṃ gandhodakapuṇṇaṃ ghaṭaṃ gahetvāti attho . Gandhodakamadāsahanti gandhodakaṃ adāsiṃ, ahaṃ gandhodakena abhisiñcinti attho.
၂၆. န္ဟာနကာလေ စ ဗောဓိယာတိ ဗောဓိယာ ပူဇာကရဏသမယေတိ အတ္ထော။ သေသံ ဥတ္တာနတ္ထမေဝာတိ။
26.Nhānakāleca bodhiyāti bodhiyā pūjākaraṇasamayeti attho. Sesaṃ uttānatthamevāti.
ဂန္ဓောဒကိယတ္ထေရအပဒာနဝဏ္ဏနာ သမတ္တာ။
Gandhodakiyattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၄. ဂန္ဓောဒကိယတ္ထေရအပဒာနံ • 4. Gandhodakiyattheraapadānaṃ
