| Library / Tipiṭaka / तिपिटक • Tipiṭaka / अपदानपाळि • Apadānapāḷi |
३४. गन्धोदकवग्गो
34. Gandhodakavaggo
१. गन्धधूपियत्थेरअपदानं
1. Gandhadhūpiyattheraapadānaṃ
१.
1.
‘‘सिद्धत्थस्स भगवतो, गन्धधूपं अदासहं।
‘‘Siddhatthassa bhagavato, gandhadhūpaṃ adāsahaṃ;
सुमनेहि पटिच्छन्नं, बुद्धानुच्छविकञ्च तं॥
Sumanehi paṭicchannaṃ, buddhānucchavikañca taṃ.
२.
2.
‘‘कञ्चनग्घियसङ्कासं, बुद्धं लोकग्गनायकं।
‘‘Kañcanagghiyasaṅkāsaṃ, buddhaṃ lokagganāyakaṃ;
इन्दीवरंव जलितं, आदित्तंव हुतासनं॥
Indīvaraṃva jalitaṃ, ādittaṃva hutāsanaṃ.
३.
3.
‘‘ब्यग्घुसभंव पवरं, अभिजातंव केसरिं।
‘‘Byagghusabhaṃva pavaraṃ, abhijātaṃva kesariṃ;
निसिन्नं समणानग्गं, भिक्खुसङ्घपुरक्खतं॥
Nisinnaṃ samaṇānaggaṃ, bhikkhusaṅghapurakkhataṃ.
४.
4.
‘‘दिस्वा चित्तं पसादेत्वा, पग्गहेत्वान अञ्जलिं।
‘‘Disvā cittaṃ pasādetvā, paggahetvāna añjaliṃ;
वन्दित्वा सत्थुनो पादे, पक्कामिं उत्तरामुखो॥
Vanditvā satthuno pāde, pakkāmiṃ uttarāmukho.
५.
5.
‘‘चतुन्नवुतितो कप्पे, यं गन्धमददिं तदा।
‘‘Catunnavutito kappe, yaṃ gandhamadadiṃ tadā;
दुग्गतिं नाभिजानामि, गन्धपूजायिदं फलं॥
Duggatiṃ nābhijānāmi, gandhapūjāyidaṃ phalaṃ.
६.
6.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा गन्धधूपियो थेरो इमा गाथायो अभासित्थाति।
Itthaṃ sudaṃ āyasmā gandhadhūpiyo thero imā gāthāyo abhāsitthāti.
गन्धधूपियत्थेरस्सापदानं पठमं।
Gandhadhūpiyattherassāpadānaṃ paṭhamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १-१०. थोमकत्थेरअपदानादिवण्णना • 1-10. Thomakattheraapadānādivaṇṇanā
