| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೫. ಗಣ್ಡಸುತ್ತಂ
5. Gaṇḍasuttaṃ
೧೫. ‘‘ಸೇಯ್ಯಥಾಪಿ, ಭಿಕ್ಖವೇ, ಗಣ್ಡೋ ಅನೇಕವಸ್ಸಗಣಿಕೋ। ತಸ್ಸಸ್ಸು ಗಣ್ಡಸ್ಸ ನವ ವಣಮುಖಾನಿ ನವ ಅಭೇದನಮುಖಾನಿ। ತತೋ ಯಂ ಕಿಞ್ಚಿ ಪಗ್ಘರೇಯ್ಯ – ಅಸುಚಿಯೇವ ಪಗ್ಘರೇಯ್ಯ, ದುಗ್ಗನ್ಧಂಯೇವ ಪಗ್ಘರೇಯ್ಯ, ಜೇಗುಚ್ಛಿಯಂಯೇವ 1 ಪಗ್ಘರೇಯ್ಯ; ಯಂ ಕಿಞ್ಚಿ ಪಸವೇಯ್ಯ – ಅಸುಚಿಯೇವ ಪಸವೇಯ್ಯ, ದುಗ್ಗನ್ಧಂಯೇವ ಪಸವೇಯ್ಯ, ಜೇಗುಚ್ಛಿಯಂಯೇವ ಪಸವೇಯ್ಯ।
15. ‘‘Seyyathāpi, bhikkhave, gaṇḍo anekavassagaṇiko. Tassassu gaṇḍassa nava vaṇamukhāni nava abhedanamukhāni. Tato yaṃ kiñci pagghareyya – asuciyeva pagghareyya, duggandhaṃyeva pagghareyya, jegucchiyaṃyeva 2 pagghareyya; yaṃ kiñci pasaveyya – asuciyeva pasaveyya, duggandhaṃyeva pasaveyya, jegucchiyaṃyeva pasaveyya.
‘‘ಗಣ್ಡೋತಿ ಖೋ, ಭಿಕ್ಖವೇ, ಇಮಸ್ಸೇತಂ ಚಾತುಮಹಾಭೂತಿಕಸ್ಸ 3 ಕಾಯಸ್ಸ ಅಧಿವಚನಂ ಮಾತಾಪೇತ್ತಿಕಸಮ್ಭವಸ್ಸ ಓದನಕುಮ್ಮಾಸೂಪಚಯಸ್ಸ ಅನಿಚ್ಚುಚ್ಛಾದನಪರಿಮದ್ದನಭೇದನವಿದ್ಧಂಸನಧಮ್ಮಸ್ಸ। ತಸ್ಸಸ್ಸು ಗಣ್ಡಸ್ಸ ನವ ವಣಮುಖಾನಿ ನವ ಅಭೇದನಮುಖಾನಿ। ತತೋ ಯಂ ಕಿಞ್ಚಿ ಪಗ್ಘರತಿ – ಅಸುಚಿಯೇವ ಪಗ್ಘರತಿ, ದುಗ್ಗನ್ಧಂಯೇವ ಪಗ್ಘರತಿ, ಜೇಗುಚ್ಛಿಯಂಯೇವ ಪಗ್ಘರತಿ; ಯಂ ಕಿಞ್ಚಿ ಪಸವತಿ – ಅಸುಚಿಯೇವ ಪಸವತಿ, ದುಗ್ಗನ್ಧಂಯೇವ ಪಸವತಿ, ಜೇಗುಚ್ಛಿಯಂಯೇವ ಪಸವತಿ। ತಸ್ಮಾತಿಹ, ಭಿಕ್ಖವೇ, ಇಮಸ್ಮಿಂ ಕಾಯೇ ನಿಬ್ಬಿನ್ದಥಾ’’ತಿ। ಪಞ್ಚಮಂ।
‘‘Gaṇḍoti kho, bhikkhave, imassetaṃ cātumahābhūtikassa 4 kāyassa adhivacanaṃ mātāpettikasambhavassa odanakummāsūpacayassa aniccucchādanaparimaddanabhedanaviddhaṃsanadhammassa. Tassassu gaṇḍassa nava vaṇamukhāni nava abhedanamukhāni. Tato yaṃ kiñci paggharati – asuciyeva paggharati, duggandhaṃyeva paggharati, jegucchiyaṃyeva paggharati; yaṃ kiñci pasavati – asuciyeva pasavati, duggandhaṃyeva pasavati, jegucchiyaṃyeva pasavati. Tasmātiha, bhikkhave, imasmiṃ kāye nibbindathā’’ti. Pañcamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೫-೬. ಗಣ್ಡಸುತ್ತಾದಿವಣ್ಣನಾ • 5-6. Gaṇḍasuttādivaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೫-೯. ಗಣ್ಡಸುತ್ತಾದಿವಣ್ಣನಾ • 5-9. Gaṇḍasuttādivaṇṇanā
