| Library / Tipiṭaka / ತಿಪಿಟಕ • Tipiṭaka / ಜಾತಕ-ಅಟ್ಠಕಥಾ • Jātaka-aṭṭhakathā |
೮. ಗಾಮಣಿಜಾತಕವಣ್ಣನಾ
8. Gāmaṇijātakavaṇṇanā
ಅಪಿ ಅತರಮಾನಾನನ್ತಿ ಇದಂ ಸತ್ಥಾ ಜೇತವನೇ ವಿಹರನ್ತೋ ಓಸ್ಸಟ್ಠವೀರಿಯಂ ಭಿಕ್ಖುಂ ಆರಬ್ಭ ಕಥೇಸಿ। ಇಮಸ್ಮಿಂ ಪನ ಜಾತಕೇ ಪಚ್ಚುಪ್ಪನ್ನವತ್ಥು ಚ ಅತೀತವತ್ಥು ಚ ಏಕಾದಸಕನಿಪಾತೇ ಸಂವರಜಾತಕೇ ಆವಿಭವಿಸ್ಸತಿ। ವತ್ಥು ಹಿ ತಸ್ಮಿಞ್ಚ ಇಮಸ್ಮಿಞ್ಚ ಏಕಸದಿಸಮೇವ, ಗಾಥಾ ಪನ ನಾನಾ। ಗಾಮಣಿಕುಮಾರೋ ಬೋಧಿಸತ್ತಸ್ಸ ಓವಾದೇ ಠತ್ವಾ ಭಾತಿಕಸತಸ್ಸ ಕನಿಟ್ಠೋಪಿ ಹುತ್ವಾ ಭಾತಿಕಸತಪರಿವಾರಿತೋ ಸೇತಚ್ಛತ್ತಸ್ಸಹೇಟ್ಠಾ ವರಪಲ್ಲಙ್ಕೇ ನಿಸಿನ್ನೋ ಅತ್ತನೋ ಯಸಸಮ್ಪತ್ತಿಂ ಓಲೋಕೇತ್ವಾ ‘‘ಅಯಂ ಮಯ್ಹಂ ಯಸಸಮ್ಪತ್ತಿ ಅಮ್ಹಾಕಂ ಆಚರಿಯಸ್ಸ ಸನ್ತಕಾ’’ತಿ ತುಟ್ಠೋ ಇಮಂ ಉದಾನಂ ಉದಾನೇಸಿ –
Apiataramānānanti idaṃ satthā jetavane viharanto ossaṭṭhavīriyaṃ bhikkhuṃ ārabbha kathesi. Imasmiṃ pana jātake paccuppannavatthu ca atītavatthu ca ekādasakanipāte saṃvarajātake āvibhavissati. Vatthu hi tasmiñca imasmiñca ekasadisameva, gāthā pana nānā. Gāmaṇikumāro bodhisattassa ovāde ṭhatvā bhātikasatassa kaniṭṭhopi hutvā bhātikasataparivārito setacchattassaheṭṭhā varapallaṅke nisinno attano yasasampattiṃ oloketvā ‘‘ayaṃ mayhaṃ yasasampatti amhākaṃ ācariyassa santakā’’ti tuṭṭho imaṃ udānaṃ udānesi –
೮.
8.
‘‘ಅಪಿ ಅತರಮಾನಾನಂ, ಫಲಾಸಾವ ಸಮಿಜ್ಝತಿ।
‘‘Api ataramānānaṃ, phalāsāva samijjhati;
ವಿಪಕ್ಕಬ್ರಹ್ಮಚರಿಯೋಸ್ಮಿ, ಏವಂ ಜಾನಾಹಿ ಗಾಮಣೀ’’ತಿ॥
Vipakkabrahmacariyosmi, evaṃ jānāhi gāmaṇī’’ti.
ತತ್ಥ ಅಪೀತಿ ನಿಪಾತಮತ್ತಂ। ಅತರಮಾನಾನನ್ತಿ ಪಣ್ಡಿತಾನಂ ಓವಾದೇ ಠತ್ವಾ ಅತರಿತ್ವಾ ಅವೇಗಾಯಿತ್ವಾ ಉಪಾಯೇನ ಕಮ್ಮಂ ಕರೋನ್ತಾನಂ। ಫಲಾಸಾವ ಸಮಿಜ್ಝತೀತಿ ಯಥಾಪತ್ಥಿಕೇ ಫಲೇ ಆಸಾ ತಸ್ಸ ಫಲಸ್ಸ ನಿಪ್ಫತ್ತಿಯಾ ಸಮಿಜ್ಝತಿಯೇವ। ಅಥ ವಾ ಫಲಾಸಾತಿ ಆಸಾಫಲಂ, ಯಥಾಪತ್ಥಿತಂ ಫಲಂ ಸಮಿಜ್ಝತಿಯೇವಾತಿ ಅತ್ಥೋ। ವಿಪಕ್ಕಬ್ರಹ್ಮಚರಿಯೋಸ್ಮೀತಿ ಏತ್ಥ ಚತ್ತಾರಿ ಸಙ್ಗಹವತ್ಥೂನಿ ಸೇಟ್ಠಚರಿಯತ್ತಾ ಬ್ರಹ್ಮಚರಿಯಂ ನಾಮ, ತಞ್ಚ ತಮ್ಮೂಲಿಕಾಯ ಯಸಸಮ್ಪತ್ತಿಯಾ ಪಟಿಲದ್ಧತ್ತಾ ವಿಪಕ್ಕಂ ನಾಮ। ಯೋ ವಾಸ್ಸ ಯಸೋ ನಿಪ್ಫನ್ನೋ, ಸೋಪಿ ಸೇಟ್ಠಟ್ಠೇನ ಬ್ರಹ್ಮಚರಿಯಂ ನಾಮ। ತೇನಾಹ ‘‘ವಿಪಕ್ಕಬ್ರಹ್ಮಚರಿಯೋಸ್ಮೀ’’ತಿ। ಏವಂ ಜಾನಾಹಿ ಗಾಮಣೀತಿ ಕತ್ಥಚಿ ಗಾಮಿಕಪುರಿಸೋಪಿ ಗಾಮಜೇಟ್ಠಕೋಪಿ ಗಾಮಣೀ। ಇಧ ಪನ ಸಬ್ಬಜನಜೇಟ್ಠಕಂ ಅತ್ತಾನಂ ಸನ್ಧಾಯಾಹ। ಅಮ್ಭೋ ಗಾಮಣಿ, ತ್ವಂ ಏತಂ ಕಾರಣಂ ಏವಂ ಜಾನಾಹಿ, ಆಚರಿಯಂ ನಿಸ್ಸಾಯ ಭಾತಿಕಸತಂ ಅತಿಕ್ಕಮಿತ್ವಾ ಇದಂ ಮಹಾರಜ್ಜಂ ಪತ್ತೋಸ್ಮೀತಿ ಉದಾನಂ ಉದಾನೇಸಿ।
Tattha apīti nipātamattaṃ. Ataramānānanti paṇḍitānaṃ ovāde ṭhatvā ataritvā avegāyitvā upāyena kammaṃ karontānaṃ. Phalāsāva samijjhatīti yathāpatthike phale āsā tassa phalassa nipphattiyā samijjhatiyeva. Atha vā phalāsāti āsāphalaṃ, yathāpatthitaṃ phalaṃ samijjhatiyevāti attho. Vipakkabrahmacariyosmīti ettha cattāri saṅgahavatthūni seṭṭhacariyattā brahmacariyaṃ nāma, tañca tammūlikāya yasasampattiyā paṭiladdhattā vipakkaṃ nāma. Yo vāssa yaso nipphanno, sopi seṭṭhaṭṭhena brahmacariyaṃ nāma. Tenāha ‘‘vipakkabrahmacariyosmī’’ti. Evaṃ jānāhi gāmaṇīti katthaci gāmikapurisopi gāmajeṭṭhakopi gāmaṇī. Idha pana sabbajanajeṭṭhakaṃ attānaṃ sandhāyāha. Ambho gāmaṇi, tvaṃ etaṃ kāraṇaṃ evaṃ jānāhi, ācariyaṃ nissāya bhātikasataṃ atikkamitvā idaṃ mahārajjaṃ pattosmīti udānaṃ udānesi.
ತಸ್ಮಿಂ ಪನ ರಜ್ಜಂ ಪತ್ತೇ ಸತ್ತಟ್ಠದಿವಸಚ್ಚಯೇನ ಸಬ್ಬೇಪಿ ಭಾತರೋ ಅತ್ತನೋ ಅತ್ತನೋ ವಸನಟ್ಠಾನಂ ಗತಾ । ಗಾಮಣಿರಾಜಾ ಧಮ್ಮೇನ ರಜ್ಜಂ ಕಾರೇತ್ವಾ ಯಥಾಕಮ್ಮಂ ಗತೋ, ಬೋಧಿಸತ್ತೋಪಿ ಪುಞ್ಞಾನಿ ಕತ್ವಾ ಯಥಾಕಮ್ಮಂ ಗತೋ।
Tasmiṃ pana rajjaṃ patte sattaṭṭhadivasaccayena sabbepi bhātaro attano attano vasanaṭṭhānaṃ gatā . Gāmaṇirājā dhammena rajjaṃ kāretvā yathākammaṃ gato, bodhisattopi puññāni katvā yathākammaṃ gato.
ಸತ್ಥಾ ಇಮಂ ಧಮ್ಮದೇಸನಂ ಆಹರಿತ್ವಾ ದಸ್ಸೇತ್ವಾ ಸಚ್ಚಾನಿ ಪಕಾಸೇಸಿ, ಸಚ್ಚಪರಿಯೋಸಾನೇ ಓಸ್ಸಟ್ಠವೀರಿಯೋ ಭಿಕ್ಖು ಅರಹತ್ತೇ ಪತಿಟ್ಠಿತೋ। ಸತ್ಥಾ ದ್ವೇ ವತ್ಥೂನಿ ಕಥೇತ್ವಾ ಅನುಸನ್ಧಿಂ ಘಟೇತ್ವಾ ಜಾತಕಂ ಸಮೋಧಾನೇಸಿ – ‘‘ತದಾ ಗಾಮಣಿಕುಮಾರೋ ಓಸ್ಸಟ್ಠವೀರಿಯೋ ಭಿಕ್ಖು ಅಹೋಸಿ, ಆಚರಿಯೋ ಪನ ಅಹಮೇವ ಅಹೋಸಿ’’ನ್ತಿ।
Satthā imaṃ dhammadesanaṃ āharitvā dassetvā saccāni pakāsesi, saccapariyosāne ossaṭṭhavīriyo bhikkhu arahatte patiṭṭhito. Satthā dve vatthūni kathetvā anusandhiṃ ghaṭetvā jātakaṃ samodhānesi – ‘‘tadā gāmaṇikumāro ossaṭṭhavīriyo bhikkhu ahosi, ācariyo pana ahameva ahosi’’nti.
ಗಾಮಣಿಜಾತಕವಣ್ಣನಾ ಅಟ್ಠಮಾ।
Gāmaṇijātakavaṇṇanā aṭṭhamā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಜಾತಕಪಾಳಿ • Jātakapāḷi / ೮. ಗಾಮಣಿಜಾತಕಂ • 8. Gāmaṇijātakaṃ
