| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. গহট্ঠৰন্দনাসুত্তং
8. Gahaṭṭhavandanāsuttaṃ
২৬৪. সাৰত্থিযং। তত্র…পে॰… এতদৰোচ – ‘‘ভূতপুব্বং, ভিক্খৰে, সক্কো দেৰানমিন্দো মাতলিং সঙ্গাহকং আমন্তেসি – ‘যোজেহি, সম্ম মাতলি, সহস্সযুত্তং আজঞ্ঞরথং। উয্যানভূমিং গচ্ছাম সুভূমিং দস্সনাযা’তি। ‘এৰং ভদ্দন্তৰা’তি খো, ভিক্খৰে, মাতলি সঙ্গাহকো সক্কস্স দেৰানমিন্দস্স পটিস্সুত্ৰা সহস্সযুত্তং আজঞ্ঞরথং যোজেত্ৰা সক্কস্স দেৰানমিন্দস্স পটিৰেদেসি – ‘যুত্তো খো তে, মারিস, সহস্সযুত্তো আজঞ্ঞরথো। যস্স দানি কালং মঞ্ঞসী’’’তি। অথ খো, ভিক্খৰে, সক্কো দেৰানমিন্দো ৰেজযন্তপাসাদা ওরোহন্তো অঞ্জলিং কত্ৰা 1 সুদং পুথুদ্দিসা নমস্সতি। অথ খো, ভিক্খৰে, মাতলি সঙ্গাহকো সক্কং দেৰানমিন্দং গাথায অজ্ঝভাসি –
264. Sāvatthiyaṃ. Tatra…pe… etadavoca – ‘‘bhūtapubbaṃ, bhikkhave, sakko devānamindo mātaliṃ saṅgāhakaṃ āmantesi – ‘yojehi, samma mātali, sahassayuttaṃ ājaññarathaṃ. Uyyānabhūmiṃ gacchāma subhūmiṃ dassanāyā’ti. ‘Evaṃ bhaddantavā’ti kho, bhikkhave, mātali saṅgāhako sakkassa devānamindassa paṭissutvā sahassayuttaṃ ājaññarathaṃ yojetvā sakkassa devānamindassa paṭivedesi – ‘yutto kho te, mārisa, sahassayutto ājaññaratho. Yassa dāni kālaṃ maññasī’’’ti. Atha kho, bhikkhave, sakko devānamindo vejayantapāsādā orohanto añjaliṃ katvā 2 sudaṃ puthuddisā namassati. Atha kho, bhikkhave, mātali saṅgāhako sakkaṃ devānamindaṃ gāthāya ajjhabhāsi –
‘‘তং নমস্সন্তি তেৰিজ্জা, সব্বে ভুম্মা চ খত্তিযা।
‘‘Taṃ namassanti tevijjā, sabbe bhummā ca khattiyā;
চত্তারো চ মহারাজা, তিদসা চ যসস্সিনো।
Cattāro ca mahārājā, tidasā ca yasassino;
অথ কো নাম সো যক্খো, যং ত্ৰং সক্ক নমস্সসী’’তি॥
Atha ko nāma so yakkho, yaṃ tvaṃ sakka namassasī’’ti.
‘‘মং নমস্সন্তি তেৰিজ্জা, সব্বে ভুম্মা চ খত্তিযা।
‘‘Maṃ namassanti tevijjā, sabbe bhummā ca khattiyā;
চত্তারো চ মহারাজা, তিদসা চ যসস্সিনো॥
Cattāro ca mahārājā, tidasā ca yasassino.
‘‘অহঞ্চ সীলসম্পন্নে, চিররত্তসমাহিতে।
‘‘Ahañca sīlasampanne, cirarattasamāhite;
সম্মাপব্বজিতে ৰন্দে, ব্রহ্মচরিযপরাযনে॥
Sammāpabbajite vande, brahmacariyaparāyane.
‘‘যে গহট্ঠা পুঞ্ঞকরা, সীলৰন্তো উপাসকা।
‘‘Ye gahaṭṭhā puññakarā, sīlavanto upāsakā;
ধম্মেন দারং পোসেন্তি, তে নমস্সামি মাতলী’’তি॥
Dhammena dāraṃ posenti, te namassāmi mātalī’’ti.
‘‘সেট্ঠা হি কির লোকস্মিং, যে ত্ৰং সক্ক নমস্সসি।
‘‘Seṭṭhā hi kira lokasmiṃ, ye tvaṃ sakka namassasi;
অহম্পি তে নমস্সামি, যে নমস্সসি ৰাসৰা’’তি॥
Ahampi te namassāmi, ye namassasi vāsavā’’ti.
‘‘ইদং ৰত্ৰান মঘৰা, দেৰরাজা সুজম্পতি।
‘‘Idaṃ vatvāna maghavā, devarājā sujampati;
পুথুদ্দিসা নমস্সিত্ৰা, পমুখো রথমারুহী’’তি॥
Puthuddisā namassitvā, pamukho rathamāruhī’’ti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. গহট্ঠৰন্দনাসুত্তৰণ্ণনা • 8. Gahaṭṭhavandanāsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. গহট্ঠৰন্দনাসুত্তৰণ্ণনা • 8. Gahaṭṭhavandanāsuttavaṇṇanā
