| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૧૧. ગગ્ગરાસુત્તં
11. Gaggarāsuttaṃ
૨૧૯. એકં સમયં ભગવા ચમ્પાયં વિહરતિ ગગ્ગરાય પોક્ખરણિયા તીરે મહતા ભિક્ખુસઙ્ઘેન સદ્ધિં પઞ્ચમત્તેહિ ભિક્ખુસતેહિ સત્તહિ ચ ઉપાસકસતેહિ સત્તહિ ચ ઉપાસિકાસતેહિ અનેકેહિ ચ દેવતાસહસ્સેહિ. ત્યાસ્સુદં ભગવા અતિરોચતિ 1 વણ્ણેન ચેવ યસસા ચ. અથ ખો આયસ્મતો વઙ્ગીસસ્સ એતદહોસિ – ‘‘અયં ખો ભગવા ચમ્પાયં વિહરતિ ગગ્ગરાય પોક્ખરણિયા તીરે મહતા ભિક્ખુસઙ્ઘેન સદ્ધિં પઞ્ચમત્તેહિ ભિક્ખુસતેહિ સત્તહિ ચ ઉપાસકસતેહિ સત્તહિ ચ ઉપાસિકાસતેહિ અનેકેહિ ચ દેવતાસહસ્સેહિ. ત્યાસ્સુદં ભગવા અતિરોચતિ વણ્ણેન ચેવ યસસા ચ. યંનૂનાહં ભગવન્તં સમ્મુખા સારુપ્પાય ગાથાય અભિત્થવેય્ય’’ન્તિ.
219. Ekaṃ samayaṃ bhagavā campāyaṃ viharati gaggarāya pokkharaṇiyā tīre mahatā bhikkhusaṅghena saddhiṃ pañcamattehi bhikkhusatehi sattahi ca upāsakasatehi sattahi ca upāsikāsatehi anekehi ca devatāsahassehi. Tyāssudaṃ bhagavā atirocati 2 vaṇṇena ceva yasasā ca. Atha kho āyasmato vaṅgīsassa etadahosi – ‘‘ayaṃ kho bhagavā campāyaṃ viharati gaggarāya pokkharaṇiyā tīre mahatā bhikkhusaṅghena saddhiṃ pañcamattehi bhikkhusatehi sattahi ca upāsakasatehi sattahi ca upāsikāsatehi anekehi ca devatāsahassehi. Tyāssudaṃ bhagavā atirocati vaṇṇena ceva yasasā ca. Yaṃnūnāhaṃ bhagavantaṃ sammukhā sāruppāya gāthāya abhitthaveyya’’nti.
અથ ખો આયસ્મા વઙ્ગીસો ઉટ્ઠાયાસના એકંસં ઉત્તરાસઙ્ગં કરિત્વા યેન ભગવા તેનઞ્જલિં પણામેત્વા ભગવન્તં એતદવોચ – ‘‘પટિભાતિ મં, ભગવા, પટિભાતિ મં, સુગતા’’તિ. ‘‘પટિભાતુ તં, વઙ્ગીસા’’તિ ભગવા અવોચ. અથ ખો આયસ્મા વઙ્ગીસો ભગવન્તં સમ્મુખા સારુપ્પાય ગાથાય અભિત્થવિ –
Atha kho āyasmā vaṅgīso uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘paṭibhāti maṃ, bhagavā, paṭibhāti maṃ, sugatā’’ti. ‘‘Paṭibhātu taṃ, vaṅgīsā’’ti bhagavā avoca. Atha kho āyasmā vaṅgīso bhagavantaṃ sammukhā sāruppāya gāthāya abhitthavi –
‘‘ચન્દો યથા વિગતવલાહકે નભે,
‘‘Cando yathā vigatavalāhake nabhe,
વિરોચતિ વિગતમલોવ ભાણુમા;
Virocati vigatamalova bhāṇumā;
એવમ્પિ અઙ્ગીરસ ત્વં મહામુનિ,
Evampi aṅgīrasa tvaṃ mahāmuni,
અતિરોચસિ યસસા સબ્બલોક’’ન્તિ.
Atirocasi yasasā sabbaloka’’nti.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧૧. ગગ્ગરાસુત્તવણ્ણના • 11. Gaggarāsuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૧૧. ગગ્ગરાસુત્તવણ્ણના • 11. Gaggarāsuttavaṇṇanā
