| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১১. গগ্গরাসুত্তং
11. Gaggarāsuttaṃ
২১৯. একং সমযং ভগৰা চম্পাযং ৰিহরতি গগ্গরায পোক্খরণিযা তীরে মহতা ভিক্খুসঙ্ঘেন সদ্ধিং পঞ্চমত্তেহি ভিক্খুসতেহি সত্তহি চ উপাসকসতেহি সত্তহি চ উপাসিকাসতেহি অনেকেহি চ দেৰতাসহস্সেহি। ত্যাস্সুদং ভগৰা অতিরোচতি 1 ৰণ্ণেন চেৰ যসসা চ। অথ খো আযস্মতো ৰঙ্গীসস্স এতদহোসি – ‘‘অযং খো ভগৰা চম্পাযং ৰিহরতি গগ্গরায পোক্খরণিযা তীরে মহতা ভিক্খুসঙ্ঘেন সদ্ধিং পঞ্চমত্তেহি ভিক্খুসতেহি সত্তহি চ উপাসকসতেহি সত্তহি চ উপাসিকাসতেহি অনেকেহি চ দেৰতাসহস্সেহি। ত্যাস্সুদং ভগৰা অতিরোচতি ৰণ্ণেন চেৰ যসসা চ। যংনূনাহং ভগৰন্তং সম্মুখা সারুপ্পায গাথায অভিত্থৰেয্য’’ন্তি।
219. Ekaṃ samayaṃ bhagavā campāyaṃ viharati gaggarāya pokkharaṇiyā tīre mahatā bhikkhusaṅghena saddhiṃ pañcamattehi bhikkhusatehi sattahi ca upāsakasatehi sattahi ca upāsikāsatehi anekehi ca devatāsahassehi. Tyāssudaṃ bhagavā atirocati 2 vaṇṇena ceva yasasā ca. Atha kho āyasmato vaṅgīsassa etadahosi – ‘‘ayaṃ kho bhagavā campāyaṃ viharati gaggarāya pokkharaṇiyā tīre mahatā bhikkhusaṅghena saddhiṃ pañcamattehi bhikkhusatehi sattahi ca upāsakasatehi sattahi ca upāsikāsatehi anekehi ca devatāsahassehi. Tyāssudaṃ bhagavā atirocati vaṇṇena ceva yasasā ca. Yaṃnūnāhaṃ bhagavantaṃ sammukhā sāruppāya gāthāya abhitthaveyya’’nti.
অথ খো আযস্মা ৰঙ্গীসো উট্ঠাযাসনা একংসং উত্তরাসঙ্গং করিত্ৰা যেন ভগৰা তেনঞ্জলিং পণামেত্ৰা ভগৰন্তং এতদৰোচ – ‘‘পটিভাতি মং, ভগৰা, পটিভাতি মং, সুগতা’’তি। ‘‘পটিভাতু তং, ৰঙ্গীসা’’তি ভগৰা অৰোচ। অথ খো আযস্মা ৰঙ্গীসো ভগৰন্তং সম্মুখা সারুপ্পায গাথায অভিত্থৰি –
Atha kho āyasmā vaṅgīso uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘paṭibhāti maṃ, bhagavā, paṭibhāti maṃ, sugatā’’ti. ‘‘Paṭibhātu taṃ, vaṅgīsā’’ti bhagavā avoca. Atha kho āyasmā vaṅgīso bhagavantaṃ sammukhā sāruppāya gāthāya abhitthavi –
‘‘চন্দো যথা ৰিগতৰলাহকে নভে,
‘‘Cando yathā vigatavalāhake nabhe,
ৰিরোচতি ৰিগতমলোৰ ভাণুমা।
Virocati vigatamalova bhāṇumā;
এৰম্পি অঙ্গীরস ত্ৰং মহামুনি,
Evampi aṅgīrasa tvaṃ mahāmuni,
অতিরোচসি যসসা সব্বলোক’’ন্তি॥
Atirocasi yasasā sabbaloka’’nti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১১. গগ্গরাসুত্তৰণ্ণনা • 11. Gaggarāsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১১. গগ্গরাসুত্তৰণ্ণনা • 11. Gaggarāsuttavaṇṇanā
