| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၇. ဂဒ္ဒုလဗဒ္ဓသုတ္တဝဏ္ဏနာ
7. Gaddulabaddhasuttavaṇṇanā
၉၉. သတ္တမေ ယံ မဟာသမုဒ္ဒောတိ ယသ္မိံ သမယေ ပဉ္စမေ သူရိယေ ဥဋ္ဌိတေ မဟာသမုဒ္ဒော ဥသ္သုသ္သတိ။ ဒုက္ခသ္သ အန္တကိရိယန္တိ စတ္တာရိ သစ္စာနိ အပ္ပဋိဝိဇ္ဈိတ္ဝာ အဝိဇ္ဇာယ နိဝုတာနံယေဝ သတံ ဝဋ္ဋဒုက္ခသ္သ အန္တကိရိယံ ပရိစ္ဆေဒံ န ဝဒာမိ။ သာ ဂဒ္ဒုလဗဒ္ဓောတိ ဂဒ္ဒုလေန ဗဒ္ဓသုနခော။ ခီလေတိ ပထဝိယံ အာကောဋိတေ မဟာခီလေ။ ထမ္ဘေတိ နိခဏိတ္ဝာ ဌပိတေ ထမ္ဘေ။ ဧဝမေဝ ခောတိ ဧတ္ထ သုနခော ဝိယ ဝဋ္ဋနိသ္သိတော ဗာလော, ဂဒ္ဒုလော ဝိယ ဒိဋ္ဌိ, ထမ္ဘော ဝိယ သက္ကာယော, ဂဒ္ဒုလရဇ္ဇုယာ ထမ္ဘေ ဥပနိဗဒ္ဓသုနခသ္သ ထမ္ဘာနုပရိဝတ္တနံ ဝိယ ဒိဋ္ဌိတဏ္ဟာယ သက္ကာယေ ဗဒ္ဓသ္သ ပုထုဇ္ဇနသ္သ သက္ကာယာနုပရိဝတ္တနံ ဝေဒိတဗ္ဗံ။ သတ္တမံ။
99. Sattame yaṃ mahāsamuddoti yasmiṃ samaye pañcame sūriye uṭṭhite mahāsamuddo ussussati. Dukkhassa antakiriyanti cattāri saccāni appaṭivijjhitvā avijjāya nivutānaṃyeva sataṃ vaṭṭadukkhassa antakiriyaṃ paricchedaṃ na vadāmi. Sā gaddulabaddhoti gaddulena baddhasunakho. Khīleti pathaviyaṃ ākoṭite mahākhīle. Thambheti nikhaṇitvā ṭhapite thambhe. Evameva khoti ettha sunakho viya vaṭṭanissito bālo, gaddulo viya diṭṭhi, thambho viya sakkāyo, gaddularajjuyā thambhe upanibaddhasunakhassa thambhānuparivattanaṃ viya diṭṭhitaṇhāya sakkāye baddhassa puthujjanassa sakkāyānuparivattanaṃ veditabbaṃ. Sattamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၇. ဂဒ္ဒုလဗဒ္ဓသုတ္တံ • 7. Gaddulabaddhasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇. ဂဒ္ဒုလဗဒ္ဓသုတ္တဝဏ္ဏနာ • 7. Gaddulabaddhasuttavaṇṇanā
