| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၁၀. ဧဏိဇင္ဃသုတ္တဝဏ္ဏနာ
10. Eṇijaṅghasuttavaṇṇanā
၃၀. ဒသမေ ဧဏိဇင္ဃန္တိ ဧဏိမိဂသ္သ ဝိယ သုဝဋ္ဋိတဇင္ဃံ။ ကိသန္တိ အထူလံ သမသရီရံ။ အထ ဝာ အာတပေန မိလာတံ မာလာဂန္ဓဝိလေပနေဟိ အနုပဗ္ရူဟိတသရီရန္တိပိ အတ္ထော။ ဝီရန္တိ ဝီရိယဝန္တံ။ အပ္ပာဟာရန္တိ ဘောဇနေ မတ္တညုတာယ မိတာဟာရံ, ဝိကာလဘောဇနပဋိက္ခေပဝသေန ဝာ ပရိတ္တာဟာရံ။ အလောလုပန္တိ စတူသု ပစ္စယေသု လောလုပ္ပဝိရဟိတံ။ ရသတဏ္ဟာပဋိက္ခေပော ဝာ ဧသ။ သီဟံဝေကစရံ နာဂန္တိ ဧကစရံ သီဟံ ဝိယ, ဧကစရံ နာဂံ ဝိယ။ ဂဏဝာသိနော ဟိ ပမတ္တာ ဟောန္တိ, ဧကစရာ အပ္ပမတ္တာ, တသ္မာ ဧကစရာဝ ဂဟိတာတိ။ ပဝေဒိတာတိ ပကာသိတာ ကထိတာ။ ဧတ္ထာတိ ဧတသ္မိံ နာမရူပေ။ ပဉ္စကာမဂုဏဝသေန ဟိ ရူပံ ဂဟိတံ, မနေန နာမံ, ဥဘယေဟိ ပန အဝိနိဘုတ္တဓမ္မေ ဂဟေတ္ဝာ ပဉ္စက္ခန္ဓာဒိဝသေနပေတ္ထ ဘုမ္မံ ယောဇေတဗ္ဗန္တိ။ ဒသမံ။
30. Dasame eṇijaṅghanti eṇimigassa viya suvaṭṭitajaṅghaṃ. Kisanti athūlaṃ samasarīraṃ. Atha vā ātapena milātaṃ mālāgandhavilepanehi anupabrūhitasarīrantipi attho. Vīranti vīriyavantaṃ. Appāhāranti bhojane mattaññutāya mitāhāraṃ, vikālabhojanapaṭikkhepavasena vā parittāhāraṃ. Alolupanti catūsu paccayesu loluppavirahitaṃ. Rasataṇhāpaṭikkhepo vā esa. Sīhaṃvekacaraṃ nāganti ekacaraṃ sīhaṃ viya, ekacaraṃ nāgaṃ viya. Gaṇavāsino hi pamattā honti, ekacarā appamattā, tasmā ekacarāva gahitāti. Paveditāti pakāsitā kathitā. Etthāti etasmiṃ nāmarūpe. Pañcakāmaguṇavasena hi rūpaṃ gahitaṃ, manena nāmaṃ, ubhayehi pana avinibhuttadhamme gahetvā pañcakkhandhādivasenapettha bhummaṃ yojetabbanti. Dasamaṃ.
သတ္တိဝဂ္ဂော တတိယော။
Sattivaggo tatiyo.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. ဧဏိဇင္ဃသုတ္တံ • 10. Eṇijaṅghasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၀. ဧဏိဇင္ဃသုတ္တဝဏ္ဏနာ • 10. Eṇijaṅghasuttavaṇṇanā
