| Library / Tipiṭaka / တိပိဋက • Tipiṭaka / အပဒာနပာဠိ • Apadānapāḷi |
၂. ဧကူပောသထိကဝဂ္ဂော
2. Ekūposathikavaggo
၁. ဧကူပောသထိကာထေရီအပဒာနံ
1. Ekūposathikātherīapadānaṃ
၁.
1.
‘‘နဂရေ ဗန္ဓုမတိယာ၊ ဗန္ဓုမာ နာမ ခတ္တိယော။
‘‘Nagare bandhumatiyā, bandhumā nāma khattiyo;
ဒိဝသေ ပုဏ္ဏမာယ သော၊ ဥပဝသိ ဥပောသထံ။
Divase puṇṇamāya so, upavasi uposathaṃ.
၂.
2.
‘‘အဟံ တေန သမယေန၊ ကုမ္ဘဒာသီ အဟံ တဟိံ။
‘‘Ahaṃ tena samayena, kumbhadāsī ahaṃ tahiṃ;
ဒိသ္ဝာ သရာဇကံ သေနံ၊ ဧဝာဟံ စိန္တယိံ တဒာ။
Disvā sarājakaṃ senaṃ, evāhaṃ cintayiṃ tadā.
၃.
3.
‘ရာဇာပိ ရဇ္ဇံ ဆဍ္ဍေတ္ဝာ၊ ဥပဝသိ ဥပောသထံ။
‘Rājāpi rajjaṃ chaḍḍetvā, upavasi uposathaṃ;
သဖလံ နူန တံ ကမ္မံ၊ ဇနကာယော ပမောဒိတော’။
Saphalaṃ nūna taṃ kammaṃ, janakāyo pamodito’.
၄.
4.
မာနသံ သမ္ပဟံသိတ္ဝာ၊ ဥပဝသိံ ဥပောသထံ။
Mānasaṃ sampahaṃsitvā, upavasiṃ uposathaṃ.
၅.
5.
‘‘အဟံ ဥပောသထံ ကတ္ဝာ၊ သမ္မာသမ္ဗုဒ္ဓသာသနေ။
‘‘Ahaṃ uposathaṃ katvā, sammāsambuddhasāsane;
တေန ကမ္မေန သုကတေန၊ တာဝတိံသမဂစ္ဆဟံ။
Tena kammena sukatena, tāvatiṃsamagacchahaṃ.
၆.
6.
ကူဋာဂာရဝရူပေတံ၊ မဟာသနသုဘူသိတံ။
Kūṭāgāravarūpetaṃ, mahāsanasubhūsitaṃ.
၇.
7.
‘‘အစ္ဆရာ သတသဟသ္သာ၊ ဥပတိဋ္ဌန္တိ မံ သဒာ။
‘‘Accharā satasahassā, upatiṭṭhanti maṃ sadā;
အညေ ဒေဝေ အတိက္ကမ္မ၊ အတိရောစာမိ သဗ္ဗဒာ။
Aññe deve atikkamma, atirocāmi sabbadā.
၈.
8.
‘‘စတုသဋ္ဌိ ဒေဝရာဇူနံ၊ မဟေသိတ္တမကာရယိံ။
‘‘Catusaṭṭhi devarājūnaṃ, mahesittamakārayiṃ;
တေသဋ္ဌိ စက္ကဝတ္တီနံ၊ မဟေသိတ္တမကာရယိံ။
Tesaṭṭhi cakkavattīnaṃ, mahesittamakārayiṃ.
၉.
9.
‘‘သုဝဏ္ဏဝဏ္ဏာ ဟုတ္ဝာန၊ ဘဝေသု သံသရာမဟံ။
‘‘Suvaṇṇavaṇṇā hutvāna, bhavesu saṃsarāmahaṃ;
သဗ္ဗတ္ထ ပဝရာ ဟောမိ၊ ဥပောသထသ္သိဒံ ဖလံ။
Sabbattha pavarā homi, uposathassidaṃ phalaṃ.
၁၀.
10.
လဘာမိ သဗ္ဗမေဝေတံ၊ ဥပောသထသ္သိဒံ ဖလံ။
Labhāmi sabbamevetaṃ, uposathassidaṃ phalaṃ.
၁၁.
11.
‘‘သောဏ္ဏမယံ ရူပိမယံ၊ အထောပိ ဖလိကာမယံ။
‘‘Soṇṇamayaṃ rūpimayaṃ, athopi phalikāmayaṃ;
လောဟိတင္ဂမယဉ္စေဝ၊ သဗ္ဗံ ပဋိလဘာမဟံ။
Lohitaṅgamayañceva, sabbaṃ paṭilabhāmahaṃ.
၁၂.
12.
‘‘ကောသေယ္ယကမ္ဗလိယာနိ ၊ ခောမကပ္ပာသိကာနိ စ။
‘‘Koseyyakambaliyāni , khomakappāsikāni ca;
မဟဂ္ဃာနိ စ ဝတ္ထာနိ၊ သဗ္ဗံ ပဋိလဘာမဟံ။
Mahagghāni ca vatthāni, sabbaṃ paṭilabhāmahaṃ.
၁၃.
13.
‘‘အန္နံ ပာနံ ခာဒနီယံ၊ ဝတ္ထသေနာသနာနိ စ။
‘‘Annaṃ pānaṃ khādanīyaṃ, vatthasenāsanāni ca;
သဗ္ဗမေတံ ပဋိလဘေ၊ ဥပောသထသ္သိဒံ ဖလံ။
Sabbametaṃ paṭilabhe, uposathassidaṃ phalaṃ.
၁၄.
14.
‘‘ဝရဂန္ဓဉ္စ မာလဉ္စ၊ စုဏ္ဏကဉ္စ ဝိလေပနံ။
‘‘Varagandhañca mālañca, cuṇṇakañca vilepanaṃ;
သဗ္ဗမေတံ ပဋိလဘေ၊ ဥပောသထသ္သိဒံ ဖလံ။
Sabbametaṃ paṭilabhe, uposathassidaṃ phalaṃ.
၁၅.
15.
‘‘ကူဋာဂာရဉ္စ ပာသာဒံ၊ မဏ္ဍပံ ဟမ္မိယံ ဂုဟံ။
‘‘Kūṭāgārañca pāsādaṃ, maṇḍapaṃ hammiyaṃ guhaṃ;
သဗ္ဗမေတံ ပဋိလဘေ၊ ဥပောသထသ္သိဒံ ဖလံ။
Sabbametaṃ paṭilabhe, uposathassidaṃ phalaṃ.
၁၆.
16.
‘‘ဇာတိယာ သတ္တဝသ္သာဟံ၊ ပဗ္ဗဇိံ အနဂာရိယံ။
‘‘Jātiyā sattavassāhaṃ, pabbajiṃ anagāriyaṃ;
အဍ္ဎမာသေ အသမ္ပတ္တေ၊ အရဟတ္တမပာပုဏိံ။
Aḍḍhamāse asampatte, arahattamapāpuṇiṃ.
၁၇.
17.
‘‘ကိလေသာ ဈာပိတာ မယ္ဟံ၊ ဘဝာ သဗ္ဗေ သမူဟတာ။
‘‘Kilesā jhāpitā mayhaṃ, bhavā sabbe samūhatā;
သဗ္ဗာသဝပရိက္ခီဏာ၊ နတ္ထိ ဒာနိ ပုနဗ္ဘဝော။
Sabbāsavaparikkhīṇā, natthi dāni punabbhavo.
၁၈.
18.
‘‘ဧကနဝုတိတော ကပ္ပေ၊ ယံ ကမ္မမကရိံ တဒာ။
‘‘Ekanavutito kappe, yaṃ kammamakariṃ tadā;
ဒုဂ္ဂတိံ နာဘိဇာနာမိ၊ ဥပောသထသ္သိဒံ ဖလံ။
Duggatiṃ nābhijānāmi, uposathassidaṃ phalaṃ.
၁၉.
19.
‘‘ကိလေသာ ဈာပိတာ မယ္ဟံ။ပေ.။ ဝိဟရာမိ အနာသဝာ။
‘‘Kilesā jhāpitā mayhaṃ…pe… viharāmi anāsavā.
၂၀.
20.
‘‘သ္ဝာဂတံ ဝတ မေ အာသိ။ပေ.။ ကတံ ဗုဒ္ဓသ္သ သာသနံ။
‘‘Svāgataṃ vata me āsi…pe… kataṃ buddhassa sāsanaṃ.
၂၁.
21.
‘‘ပဋိသမ္ဘိဒာ စတသ္သော။ပေ.။ ကတံ ဗုဒ္ဓသ္သ သာသနံ’’။
‘‘Paṭisambhidā catasso…pe… kataṃ buddhassa sāsanaṃ’’.
ဣတ္ထံ သုဒံ ဧကူပောသထိကာ ဘိက္ခုနီ ဣမာ ဂာထာယော အဘာသိတ္ထာတိ။
Itthaṃ sudaṃ ekūposathikā bhikkhunī imā gāthāyo abhāsitthāti.
ဧကူပောသထိကာထေရိယာပဒာနံ ပဌမံ။
Ekūposathikātheriyāpadānaṃ paṭhamaṃ.
Footnotes:
