| Library / Tipiṭaka / တိပိဋက • Tipiṭaka / ဓမ္မသင္ဂဏိ-အဋ္ဌကထာ • Dhammasaṅgaṇi-aṭṭhakathā |
ဧကဝိဓရူပသင္ဂဟော
Ekavidharūpasaṅgaho
ဣဒာနိ တံ ဝိတ္ထာရတော ဒသ္သေတုံ ဧကဝိဓာဒီဟိ ဧကာဒသဟိ သင္ဂဟေဟိ မာတိကံ ဌပေန္တော သဗ္ဗံ ရူပံ န ဟေတူတိအာဒိမာဟ။
Idāni taṃ vitthārato dassetuṃ ekavidhādīhi ekādasahi saṅgahehi mātikaṃ ṭhapento sabbaṃ rūpaṃ na hetūtiādimāha.
တတ္ထ ‘သဗ္ဗံ ရူပ’န္တိ ဣဒံ ပဒံ ‘သဗ္ဗံ ရူပံ န ဟေတု’ ‘သဗ္ဗံ ရူပံ အဟေတုက’န္တိ ဧဝံ သဗ္ဗပဒေဟိ သဒ္ဓိံ ယောဇေတဗ္ဗံ။ သဗ္ဗာနေဝ စေတာနိ ‘န ဟေတူ’တိအာဒီနိ တေစတ္တာလီသပဒာနိ ဥဒ္ဒိဋ္ဌာနိ။ တေသု ပဋိပာဋိယာ စတ္တာလီသပဒာနိ မာတိကတော ဂဟေတ္ဝာ ဌပိတာနိ, အဝသာနေ တီဏိ မာတိကာမုတ္တကာနီတိ။ ဧဝံ တာဝ ပဌမေ သင္ဂဟေ ပာဠိဝဝတ္ထာနမေဝ ဝေဒိတဗ္ဗံ။ တထာ ဒုတိယသင္ဂဟာဒီသု။
Tattha ‘sabbaṃ rūpa’nti idaṃ padaṃ ‘sabbaṃ rūpaṃ na hetu’ ‘sabbaṃ rūpaṃ ahetuka’nti evaṃ sabbapadehi saddhiṃ yojetabbaṃ. Sabbāneva cetāni ‘na hetū’tiādīni tecattālīsapadāni uddiṭṭhāni. Tesu paṭipāṭiyā cattālīsapadāni mātikato gahetvā ṭhapitāni, avasāne tīṇi mātikāmuttakānīti. Evaṃ tāva paṭhame saṅgahe pāḷivavatthānameva veditabbaṃ. Tathā dutiyasaṅgahādīsu.
