| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๒. เอกตฺถมฺภิกเตฺถรอปทานํ
2. Ekatthambhikattheraapadānaṃ
๑๓.
13.
‘‘สิทฺธตฺถสฺส ภควโต, มหาปูคคโณ อหุ;
‘‘Siddhatthassa bhagavato, mahāpūgagaṇo ahu;
สรณํ คตา จ เต พุทฺธํ, สทฺทหนฺติ ตถาคตํฯ
Saraṇaṃ gatā ca te buddhaṃ, saddahanti tathāgataṃ.
๑๔.
14.
‘‘สเพฺพ สงฺคมฺม มเนฺตตฺวา, มาฬํ กุพฺพนฺติ สตฺถุโน;
‘‘Sabbe saṅgamma mantetvā, māḷaṃ kubbanti satthuno;
เอกตฺถมฺภํ อลภนฺตา, วิจินนฺติ พฺรหาวเนฯ
Ekatthambhaṃ alabhantā, vicinanti brahāvane.
๑๕.
15.
‘‘เตหํ อรเญฺญ ทิสฺวาน, อุปคมฺม คณํ ตทา;
‘‘Tehaṃ araññe disvāna, upagamma gaṇaṃ tadā;
อญฺชลิํ ปคฺคเหตฺวาน, ปริปุจฺฉิํ คณํ อหํฯ
Añjaliṃ paggahetvāna, paripucchiṃ gaṇaṃ ahaṃ.
๑๖.
16.
‘‘เต เม ปุฎฺฐา วิยากํสุ, สีลวโนฺต อุปาสกา;
‘‘Te me puṭṭhā viyākaṃsu, sīlavanto upāsakā;
มาฬํ มยํ กตฺตุกามา, เอกตฺถโมฺภ น ลพฺภติฯ
Māḷaṃ mayaṃ kattukāmā, ekatthambho na labbhati.
๑๗.
17.
‘‘เอกตฺถมฺภํ มมํ เทถ, อหํ ทสฺสามิ สตฺถุโน;
‘‘Ekatthambhaṃ mamaṃ detha, ahaṃ dassāmi satthuno;
๑๘.
18.
‘‘เต เม ถมฺภํ ปเวจฺฉิํสุ, ปสนฺนา ตุฎฺฐมานสา;
‘‘Te me thambhaṃ pavecchiṃsu, pasannā tuṭṭhamānasā;
ตโต ปฎินิวตฺติตฺวา, อคมํสุ สกํ ฆรํฯ
Tato paṭinivattitvā, agamaṃsu sakaṃ gharaṃ.
๑๙.
19.
‘‘อจิรํ คเต ปูคคเณ, ถมฺภํ อหาสหํ ตทา;
‘‘Aciraṃ gate pūgagaṇe, thambhaṃ ahāsahaṃ tadā;
หโฎฺฐ หเฎฺฐน จิเตฺตน, ปฐมํ อุสฺสเปสหํฯ
Haṭṭho haṭṭhena cittena, paṭhamaṃ ussapesahaṃ.
๒๐.
20.
‘‘เตน จิตฺตปฺปสาเทน, วิมานํ อุปปชฺชหํ;
‘‘Tena cittappasādena, vimānaṃ upapajjahaṃ;
๒๑.
21.
‘‘วชฺชมานาสุ เภรีสุ, ปริจาเรมหํ สทา;
‘‘Vajjamānāsu bherīsu, paricāremahaṃ sadā;
ปญฺจปญฺญาสกปฺปมฺหิ, ราชา อาสิํ ยโสธโรฯ
Pañcapaññāsakappamhi, rājā āsiṃ yasodharo.
๒๒.
22.
‘‘ตตฺถาปิ ภวนํ มยฺหํ, สตฺตภูมํ สมุคฺคตํ;
‘‘Tatthāpi bhavanaṃ mayhaṃ, sattabhūmaṃ samuggataṃ;
กูฎาคารวรูเปตํ, เอกตฺถมฺภํ มโนรมํฯ
Kūṭāgāravarūpetaṃ, ekatthambhaṃ manoramaṃ.
๒๓.
23.
‘‘เอกวีสติกปฺปมฺหิ, อุเทโน นาม ขตฺติโย;
‘‘Ekavīsatikappamhi, udeno nāma khattiyo;
ตตฺราปิ ภวนํ มยฺหํ, สตฺตภูมํ สมุคฺคตํฯ
Tatrāpi bhavanaṃ mayhaṃ, sattabhūmaṃ samuggataṃ.
๒๔.
24.
‘‘ยํ ยํ โยนุปปชฺชามิ, เทวตฺตํ อถ มานุสํ;
‘‘Yaṃ yaṃ yonupapajjāmi, devattaṃ atha mānusaṃ;
๒๕.
25.
‘‘จตุนฺนวุติโต กเปฺป, ยํ ถมฺภมททํ ตทา;
‘‘Catunnavutito kappe, yaṃ thambhamadadaṃ tadā;
ทุคฺคติํ นาภิชานามิ, เอกตฺถมฺภสฺสิทํ ผลํฯ
Duggatiṃ nābhijānāmi, ekatthambhassidaṃ phalaṃ.
๒๖.
26.
‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;
‘‘Paṭisambhidā catasso, vimokkhāpi ca aṭṭhime;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
Chaḷabhiññā sacchikatā, kataṃ buddhassa sāsanaṃ’’.
อิตฺถํ สุทํ อายสฺมา เอกตฺถมฺภิโก เถโร อิมา คาถาโย อภาสิตฺถาติฯ
Itthaṃ sudaṃ āyasmā ekatthambhiko thero imā gāthāyo abhāsitthāti.
เอกตฺถมฺภิกเตฺถรสฺสาปทานํ ทุติยํฯ
Ekatthambhikattherassāpadānaṃ dutiyaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๒. เอกตฺถมฺภิกเตฺถรอปทานวณฺณนา • 2. Ekatthambhikattheraapadānavaṇṇanā
