| Library / Tipiṭaka / तिपिटक • Tipiṭaka / उदानपाळि • Udānapāḷi |
७. एकपुत्तकसुत्तं
7. Ekaputtakasuttaṃ
१७. एवं मे सुतं – एकं समयं भगवा सावत्थियं विहरति जेतवने अनाथपिण्डिकस्स आरामे। तेन खो पन समयेन अञ्ञतरस्स उपासकस्स एकपुत्तको पियो मनापो कालङ्कतो होति।
17. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarassa upāsakassa ekaputtako piyo manāpo kālaṅkato hoti.
अथ खो सम्बहुला उपासका अल्लवत्था अल्लकेसा दिवा दिवस्स येन भगवा तेनुपसङ्कमिंसु; उपसङ्कमित्वा भगवन्तं अभिवादेत्वा एकमन्तं निसीदिंसु। एकमन्तं निसिन्ने खो ते उपासके भगवा एतदवोच – ‘‘किं नु खो तुम्हे, उपासका, अल्लवत्था अल्लकेसा इधूपसङ्कमन्ता दिवा दिवस्सा’’ति?
Atha kho sambahulā upāsakā allavatthā allakesā divā divassa yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinne kho te upāsake bhagavā etadavoca – ‘‘kiṃ nu kho tumhe, upāsakā, allavatthā allakesā idhūpasaṅkamantā divā divassā’’ti?
एवं वुत्ते, सो उपासको भगवन्तं एतदवोच – ‘‘मय्हं खो, भन्ते, एकपुत्तको पियो मनापो कालङ्कतो। तेन मयं अल्लवत्था अल्लकेसा इधूपसङ्कमन्ता दिवा दिवस्सा’’ति।
Evaṃ vutte, so upāsako bhagavantaṃ etadavoca – ‘‘mayhaṃ kho, bhante, ekaputtako piyo manāpo kālaṅkato. Tena mayaṃ allavatthā allakesā idhūpasaṅkamantā divā divassā’’ti.
अथ खो भगवा एतमत्थं विदित्वा तायं वेलायं इमं उदानं उदानेसि –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
देवकाया पुथु मनुस्सा च।
Devakāyā puthu manussā ca;
अघाविनो परिजुन्ना,
Aghāvino parijunnā,
मच्चुराजस्स वसं गच्छन्ति॥
Maccurājassa vasaṃ gacchanti.
‘‘ये वे दिवा च रत्तो च,
‘‘Ye ve divā ca ratto ca,
अप्पमत्ता जहन्ति पियरूपं।
Appamattā jahanti piyarūpaṃ;
ते वे खणन्ति अघमूलं,
Te ve khaṇanti aghamūlaṃ,
मच्चुनो आमिसं दुरतिवत्त’’न्ति॥ सत्तमं।
Maccuno āmisaṃ durativatta’’nti. sattamaṃ;
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / उदान-अट्ठकथा • Udāna-aṭṭhakathā / ७. एकपुत्तकसुत्तवण्णना • 7. Ekaputtakasuttavaṇṇanā
