| Library / Tipiṭaka / ติปิฎก • Tipiṭaka / ปริวารปาฬิ • Parivārapāḷi |
เอกุตฺตริกนโย
Ekuttarikanayo
๑. เอกกวาโร
1. Ekakavāro
๓๒๑. อาปตฺติกรา ธมฺมา ชานิตพฺพาฯ อนาปตฺติกรา ธมฺมา ชานิตพฺพาฯ อาปตฺติ ชานิตพฺพาฯ อนาปตฺติ ชานิตพฺพาฯ ลหุกา อาปตฺติ ชานิตพฺพาฯ ครุกา อาปตฺติ ชานิตพฺพาฯ สาวเสสา อาปตฺติ ชานิตพฺพาฯ อนวเสสา อาปตฺติ ชานิตพฺพาฯ ทุฎฺฐุลฺลา อาปตฺติ ชานิตพฺพาฯ อทุฎฺฐุลฺลา อาปตฺติ ชานิตพฺพาฯ สปฺปฎิกมฺมา อาปตฺติ ชานิตพฺพาฯ อปฺปฎิกมฺมา อาปตฺติ ชานิตพฺพาฯ เทสนาคามินี อาปตฺติ ชานิตพฺพาฯ อเทสนาคามินี อาปตฺติ ชานิตพฺพาฯ อนฺตรายิกา อาปตฺติ ชานิตพฺพาฯ อนนฺตรายิกา อาปตฺติ ชานิตพฺพาฯ สาวชฺชปญฺญตฺติ อาปตฺติ ชานิตพฺพาฯ อนวชฺชปญฺญตฺติ อาปตฺติ ชานิตพฺพาฯ กิริยโต สมุฎฺฐิตา อาปตฺติ ชานิตพฺพาฯ อกิริยโต สมุฎฺฐิตา อาปตฺติ ชานิตพฺพาฯ กิริยากิริยโต สมุฎฺฐิตา อาปตฺติ ชานิตพฺพาฯ ปุพฺพาปตฺติ ชานิตพฺพาฯ อปราปตฺติ ชานิตพฺพาฯ ปุพฺพาปตฺตีนํ อนฺตราปตฺติ ชานิตพฺพาฯ อปราปตฺตีนํ อนฺตราปตฺติ ชานิตพฺพาฯ เทสิตา คณนูปคา อาปตฺติ ชานิตพฺพาฯ เทสิตา น คณนูปคา อาปตฺติ ชานิตพฺพาฯ ปญฺญตฺติ ชานิตพฺพาฯ อนุปญฺญตฺติ ชานิตพฺพาฯ อนุปฺปนฺนปญฺญตฺติ ชานิตพฺพาฯ สพฺพตฺถปญฺญตฺติ ชานิตพฺพาฯ ปเทสปญฺญตฺติ ชานิตพฺพาฯ สาธารณปญฺญตฺติ ชานิตพฺพา ฯ อสาธารณปญฺญตฺติ ชานิตพฺพาฯ เอกโตปญฺญตฺติ ชานิตพฺพาฯ อุภโตปญฺญตฺติ ชานิตพฺพาฯ ถุลฺลวชฺชา อาปตฺติ ชานิตพฺพาฯ อถุลฺลวชฺชา อาปตฺติ ชานิตพฺพาฯ คิหิปฎิสํยุตฺตา อาปตฺติ ชานิตพฺพาฯ น คิหิปฎิสํยุตฺตา อาปตฺติ ชานิตพฺพาฯ นิยตา อาปตฺติ ชานิตพฺพาฯ อนิยตา อาปตฺติ ชานิตพฺพาฯ อาทิกโร ปุคฺคโล ชานิตโพฺพฯ อนาทิกโร ปุคฺคโล ชานิตโพฺพฯ อธิจฺจาปตฺติโก ปุคฺคโล ชานิตโพฺพฯ อภิณฺหาปตฺติโก ปุคฺคโล ชานิตโพฺพฯ โจทโก ปุคฺคโล ชานิตโพฺพฯ จุทิตโก ปุคฺคโล ชานิตโพฺพฯ อธมฺมโจทโก ปุคฺคโล ชานิตโพฺพฯ อธมฺมจุทิตโก ปุคฺคโล ชานิตโพฺพฯ ธมฺมโจทโก ปุคฺคโล ชานิตโพฺพฯ ธมฺมจุทิตโก ปุคฺคโล ชานิตโพฺพ ฯ นิยโต ปุคฺคโล ชานิตโพฺพฯ อนิยโต ปุคฺคโล ชานิตโพฺพฯ อภพฺพาปตฺติโก ปุคฺคโล ชานิตโพฺพฯ ภพฺพาปตฺติโก ปุคฺคโล ชานิตโพฺพฯ อุกฺขิตฺตโก ปุคฺคโล ชานิตโพฺพฯ อนุกฺขิตฺตโก ปุคฺคโล ชานิตโพฺพฯ นาสิตโก ปุคฺคโล ชานิตโพฺพฯ อนาสิตโก ปุคฺคโล ชานิตโพฺพฯ สมานสํวาสโก ปุคฺคโล ชานิตโพฺพฯ อสมานสํวาสโก ปุคฺคโล ชานิตโพฺพฯ ฐปนํ ชานิตพฺพนฺติฯ
321. Āpattikarā dhammā jānitabbā. Anāpattikarā dhammā jānitabbā. Āpatti jānitabbā. Anāpatti jānitabbā. Lahukā āpatti jānitabbā. Garukā āpatti jānitabbā. Sāvasesā āpatti jānitabbā. Anavasesā āpatti jānitabbā. Duṭṭhullā āpatti jānitabbā. Aduṭṭhullā āpatti jānitabbā. Sappaṭikammā āpatti jānitabbā. Appaṭikammā āpatti jānitabbā. Desanāgāminī āpatti jānitabbā. Adesanāgāminī āpatti jānitabbā. Antarāyikā āpatti jānitabbā. Anantarāyikā āpatti jānitabbā. Sāvajjapaññatti āpatti jānitabbā. Anavajjapaññatti āpatti jānitabbā. Kiriyato samuṭṭhitā āpatti jānitabbā. Akiriyato samuṭṭhitā āpatti jānitabbā. Kiriyākiriyato samuṭṭhitā āpatti jānitabbā. Pubbāpatti jānitabbā. Aparāpatti jānitabbā. Pubbāpattīnaṃ antarāpatti jānitabbā. Aparāpattīnaṃ antarāpatti jānitabbā. Desitā gaṇanūpagā āpatti jānitabbā. Desitā na gaṇanūpagā āpatti jānitabbā. Paññatti jānitabbā. Anupaññatti jānitabbā. Anuppannapaññatti jānitabbā. Sabbatthapaññatti jānitabbā. Padesapaññatti jānitabbā. Sādhāraṇapaññatti jānitabbā . Asādhāraṇapaññatti jānitabbā. Ekatopaññatti jānitabbā. Ubhatopaññatti jānitabbā. Thullavajjā āpatti jānitabbā. Athullavajjā āpatti jānitabbā. Gihipaṭisaṃyuttā āpatti jānitabbā. Na gihipaṭisaṃyuttā āpatti jānitabbā. Niyatā āpatti jānitabbā. Aniyatā āpatti jānitabbā. Ādikaro puggalo jānitabbo. Anādikaro puggalo jānitabbo. Adhiccāpattiko puggalo jānitabbo. Abhiṇhāpattiko puggalo jānitabbo. Codako puggalo jānitabbo. Cuditako puggalo jānitabbo. Adhammacodako puggalo jānitabbo. Adhammacuditako puggalo jānitabbo. Dhammacodako puggalo jānitabbo. Dhammacuditako puggalo jānitabbo . Niyato puggalo jānitabbo. Aniyato puggalo jānitabbo. Abhabbāpattiko puggalo jānitabbo. Bhabbāpattiko puggalo jānitabbo. Ukkhittako puggalo jānitabbo. Anukkhittako puggalo jānitabbo. Nāsitako puggalo jānitabbo. Anāsitako puggalo jānitabbo. Samānasaṃvāsako puggalo jānitabbo. Asamānasaṃvāsako puggalo jānitabbo. Ṭhapanaṃ jānitabbanti.
เอกกํ นิฎฺฐิตํฯ
Ekakaṃ niṭṭhitaṃ.
ตสฺสุทฺทานํ –
Tassuddānaṃ –
กรา อาปตฺติ ลหุกา, สาวเสสา จ ทุฎฺฐุลฺลา;
Karā āpatti lahukā, sāvasesā ca duṭṭhullā;
ปฎิกมฺมเทสนา จ, อนฺตรา วชฺชกิริยํฯ
Paṭikammadesanā ca, antarā vajjakiriyaṃ.
กิริยากิริยํ ปุพฺพา, อนฺตรา คณนูปคา;
Kiriyākiriyaṃ pubbā, antarā gaṇanūpagā;
ถุลฺลคิหินิยตา จ, อาทิ อธิจฺจโจทโก;
Thullagihiniyatā ca, ādi adhiccacodako;
อธมฺมธมฺมนิยโต, อภโพฺพกฺขิตฺตนาสิตา;
Adhammadhammaniyato, abhabbokkhittanāsitā;
สมานํ ฐปนเญฺจว, อุทฺทานํ เอกเก อิทนฺติฯ
Samānaṃ ṭhapanañceva, uddānaṃ ekake idanti.
Footnotes:
Related texts:
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / ปริวาร-อฎฺฐกถา • Parivāra-aṭṭhakathā / เอกกวารวณฺณนา • Ekakavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / เอกกวารวณฺณนา • Ekakavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / เอกกวารวณฺณนา • Ekakavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / เอกกวารวณฺณนา • Ekakavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / เอกุตฺตริกนโย เอกกวารวณฺณนา • Ekuttarikanayo ekakavāravaṇṇanā
