| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
12. த்³வயதானுபஸ்ஸனாஸுத்தவண்ணனா
12. Dvayatānupassanāsuttavaṇṇanā
ஏவங் மே ஸுதந்தி த்³வயதானுபஸ்ஸனாஸுத்தங். கா உப்பத்தி? இமஸ்ஸ ஸுத்தஸ்ஸ அத்தஜ்ஜா²ஸயதோ உப்பத்தி. அத்தஜ்ஜா²ஸயேன ஹி ப⁴க³வா இமங் ஸுத்தங் தே³ஸேஸி. அயமெத்த² ஸங்கே²போ, வித்தா²ரோ பனஸ்ஸ அத்த²வண்ணனாயமேவ ஆவி ப⁴விஸ்ஸதி. தத்த² ஏவங் மே ஸுதந்திஆதீ³னி வுத்தனயானேவ. புப்³பா³ராமேதி ஸாவத்தி²னக³ரஸ்ஸ புரத்தி²மதி³ஸாயங் ஆராமே. மிகா³ரமாது பாஸாதே³தி எத்த² விஸாகா² உபாஸிகா அத்தனோ ஸஸுரேன மிகா³ரேன ஸெட்டி²னா மாதுட்டா²னே ட²பிதத்தா ‘‘மிகா³ரமாதா’’தி வுச்சதி. தாய மிகா³ரமாதுயா நவகோடிஅக்³க⁴னகங் மஹாலதாபிளந்த⁴னங் விஸ்ஸஜ்ஜெத்வா காராபிதோ பாஸாதோ³ ஹெட்டா² ச உபரி ச பஞ்ச பஞ்ச க³ப்³ப⁴ஸதானி கத்வா ஸஹஸ்ஸகூடாகா³ரக³ப்³போ⁴, ஸோ ‘‘மிகா³ரமாதுபாஸாதோ³’’தி வுச்சதி. தஸ்மிங் மிகா³ரமாது பாஸாதே³.
Evaṃme sutanti dvayatānupassanāsuttaṃ. Kā uppatti? Imassa suttassa attajjhāsayato uppatti. Attajjhāsayena hi bhagavā imaṃ suttaṃ desesi. Ayamettha saṅkhepo, vitthāro panassa atthavaṇṇanāyameva āvi bhavissati. Tattha evaṃ me sutantiādīni vuttanayāneva. Pubbārāmeti sāvatthinagarassa puratthimadisāyaṃ ārāme. Migāramātu pāsādeti ettha visākhā upāsikā attano sasurena migārena seṭṭhinā mātuṭṭhāne ṭhapitattā ‘‘migāramātā’’ti vuccati. Tāya migāramātuyā navakoṭiagghanakaṃ mahālatāpiḷandhanaṃ vissajjetvā kārāpito pāsādo heṭṭhā ca upari ca pañca pañca gabbhasatāni katvā sahassakūṭāgāragabbho, so ‘‘migāramātupāsādo’’ti vuccati. Tasmiṃ migāramātu pāsāde.
தேன கோ² பன ஸமயேன ப⁴க³வாதி யங் ஸமயங் ப⁴க³வா ஸாவத்தி²ங் நிஸ்ஸாய புப்³பா³ராமே மிகா³ரமாது பாஸாதே³ விஹரதி, தேன ஸமயேன. தத³ஹுபோஸதே²தி தஸ்மிங் அஹு உபோஸதே², உபோஸத²தி³வஸேதி வுத்தங் ஹோதி. பன்னரஸேதி இத³ங் உபோஸத²க்³க³ஹணேன ஸம்பத்தாவஸேஸுபோஸத²படிக்கே²பவசனங். புண்ணாய புண்ணமாய ரத்தியாதி பன்னரஸதி³வஸத்தா தி³வஸக³ணனாய அப்³பா⁴தி³உபக்கிலேஸவிரஹத்தா ரத்திகு³ணஸம்பத்தியா ச புண்ணத்தா புண்ணாய, பரிபுண்ணசந்த³த்தா புண்ணமாய ச ரத்தியா. பி⁴க்கு²ஸங்க⁴பரிவுதோதி பி⁴க்கு²ஸங்கே⁴ன பரிவுதோ. அப்³போ⁴காஸே நிஸின்னோ ஹோதீதி மிகா³ரமாது ரதனபாஸாத³பரிவேணே அப்³போ⁴காஸே உபரி அப்படிச்ச²ன்னே ஓகாஸே பஞ்ஞத்தவரபு³த்³தா⁴ஸனே நிஸின்னோ ஹோதி. துண்ஹீபூ⁴தங் துண்ஹீபூ⁴தந்தி அதீவ துண்ஹீபூ⁴தங், யதோ யதோ வா அனுவிலோகேதி , ததோ ததோ துண்ஹீபூ⁴தங், துண்ஹீபூ⁴தங் வாசாய, புன துண்ஹீபூ⁴தங் காயேன. பி⁴க்கு²ஸங்க⁴ங் அனுவிலோகெத்வாதி தங் பரிவாரெத்வா நிஸின்னங் அனேகஸஹஸ்ஸபி⁴க்கு²பரிமாணங் துண்ஹீபூ⁴தங் துண்ஹீபூ⁴தங் பி⁴க்கு²ஸங்க⁴ங் ‘‘எத்தகா எத்த² ஸோதாபன்னா, எத்தகா ஸகதா³கா³மினோ, எத்தகா அனாகா³மினோ எத்தகா ஆரத்³த⁴விபஸ்ஸகா கல்யாணபுது²ஜ்ஜனா, இமஸ்ஸ பி⁴க்கு²ஸங்க⁴ஸ்ஸ கீதி³ஸீ த⁴ம்மதே³ஸனா ஸப்பாயா’’தி ஸப்பாயத⁴ம்மதே³ஸனாபரிச்சே²த³னத்த²ங் இதோ சிதோ ச விலோகெத்வா.
Tena kho pana samayena bhagavāti yaṃ samayaṃ bhagavā sāvatthiṃ nissāya pubbārāme migāramātu pāsāde viharati, tena samayena. Tadahuposatheti tasmiṃ ahu uposathe, uposathadivaseti vuttaṃ hoti. Pannaraseti idaṃ uposathaggahaṇena sampattāvasesuposathapaṭikkhepavacanaṃ. Puṇṇāya puṇṇamāya rattiyāti pannarasadivasattā divasagaṇanāya abbhādiupakkilesavirahattā rattiguṇasampattiyā ca puṇṇattā puṇṇāya, paripuṇṇacandattā puṇṇamāya ca rattiyā. Bhikkhusaṅghaparivutoti bhikkhusaṅghena parivuto. Abbhokāse nisinno hotīti migāramātu ratanapāsādapariveṇe abbhokāse upari appaṭicchanne okāse paññattavarabuddhāsane nisinno hoti. Tuṇhībhūtaṃ tuṇhībhūtanti atīva tuṇhībhūtaṃ, yato yato vā anuviloketi , tato tato tuṇhībhūtaṃ, tuṇhībhūtaṃ vācāya, puna tuṇhībhūtaṃ kāyena. Bhikkhusaṅghaṃ anuviloketvāti taṃ parivāretvā nisinnaṃ anekasahassabhikkhuparimāṇaṃ tuṇhībhūtaṃ tuṇhībhūtaṃ bhikkhusaṅghaṃ ‘‘ettakā ettha sotāpannā, ettakā sakadāgāmino, ettakā anāgāmino ettakā āraddhavipassakā kalyāṇaputhujjanā, imassa bhikkhusaṅghassa kīdisī dhammadesanā sappāyā’’ti sappāyadhammadesanāparicchedanatthaṃ ito cito ca viloketvā.
யே தே, பி⁴க்க²வே, குஸலா த⁴ம்மாதி யே தே ஆரொக்³யட்டே²ன அனவஜ்ஜட்டே²ன இட்ட²ப²லட்டே²ன கோஸல்லஸம்பூ⁴தட்டே²ன ச குஸலா ஸத்ததிங்ஸபோ³தி⁴பக்கி²யத⁴ம்மா, தஜ்ஜோதகா வா பரியத்தித⁴ம்மா. அரியா நிய்யானிகா ஸம்போ³த⁴கா³மினோதி உபக³ந்தப்³ப³ட்டே²ன அரியா, லோகதோ நிய்யானட்டே²ன நிய்யானிகா, ஸம்போ³த⁴ஸங்கா²தங் அரஹத்தங் க³மனட்டே²ன ஸம்போ³த⁴கா³மினோ. தேஸங் வோ பி⁴க்க²வே…பே॰… ஸவனாய, தேஸங் பி⁴க்க²வே குஸலானங்…பே॰… ஸம்போ³த⁴கா³மீனங் கா உபனிஸா, கிங் காரணங், கிங் பயோஜனங் தும்ஹாகங் ஸவனாய, கிமத்த²ங் தும்ஹே தே த⁴ம்மே ஸுணாதா²தி வுத்தங் ஹோதி. யாவதே³வ த்³வயதானங் த⁴ம்மானங் யதா²பூ⁴தங் ஞாணாயாதி எத்த² யாவதே³வாதி பரிச்சே²தா³வதா⁴ரணவசனங். த்³வே அவயவா ஏதேஸந்தி த்³வயா, த்³வயா ஏவ த்³வயதா, தேஸங் த்³வயதானங். ‘‘த்³வயான’’ந்திபி பாடோ². யதா²பூ⁴தங் ஞாணாயாதி அவிபரீதஞாணாய. கிங் வுத்தங் ஹோதி? யதே³தங் லோகியலோகுத்தராதி³பே⁴தே³ன த்³விதா⁴ வவத்தி²தானங் த⁴ம்மானங் விபஸ்ஸனாஸங்கா²தங் யதா²பூ⁴தஞாணங், ஏதத³த்தா²ய ந இதோ பி⁴ய்யோதி, ஸவனேன ஹி எத்தகங் ஹோதி, தது³த்தரி விஸேஸாதி⁴க³மோ பா⁴வனாயாதி. கிஞ்ச த்³வயதங் வதே³தா²தி எத்த² பன ஸசே, வோ பி⁴க்க²வே, ஸியா, கிஞ்ச தும்ஹே, ப⁴ந்தே, த்³வயதங் வதே³தா²தி அயமதி⁴ப்பாயோ. பத³த்தோ² பன ‘‘கிஞ்ச த்³வயதாபா⁴வங் வதே³தா²’’தி.
Yete, bhikkhave, kusalā dhammāti ye te ārogyaṭṭhena anavajjaṭṭhena iṭṭhaphalaṭṭhena kosallasambhūtaṭṭhena ca kusalā sattatiṃsabodhipakkhiyadhammā, tajjotakā vā pariyattidhammā. Ariyāniyyānikā sambodhagāminoti upagantabbaṭṭhena ariyā, lokato niyyānaṭṭhena niyyānikā, sambodhasaṅkhātaṃ arahattaṃ gamanaṭṭhena sambodhagāmino. Tesaṃ vo bhikkhave…pe… savanāya, tesaṃ bhikkhave kusalānaṃ…pe… sambodhagāmīnaṃ kā upanisā, kiṃ kāraṇaṃ, kiṃ payojanaṃ tumhākaṃ savanāya, kimatthaṃ tumhe te dhamme suṇāthāti vuttaṃ hoti. Yāvadeva dvayatānaṃ dhammānaṃ yathābhūtaṃ ñāṇāyāti ettha yāvadevāti paricchedāvadhāraṇavacanaṃ. Dve avayavā etesanti dvayā, dvayā eva dvayatā, tesaṃ dvayatānaṃ. ‘‘Dvayāna’’ntipi pāṭho. Yathābhūtaṃ ñāṇāyāti aviparītañāṇāya. Kiṃ vuttaṃ hoti? Yadetaṃ lokiyalokuttarādibhedena dvidhā vavatthitānaṃ dhammānaṃ vipassanāsaṅkhātaṃ yathābhūtañāṇaṃ, etadatthāya na ito bhiyyoti, savanena hi ettakaṃ hoti, taduttari visesādhigamo bhāvanāyāti. Kiñca dvayataṃ vadethāti ettha pana sace, vo bhikkhave, siyā, kiñca tumhe, bhante, dvayataṃ vadethāti ayamadhippāyo. Padattho pana ‘‘kiñca dvayatābhāvaṃ vadethā’’ti.
(1) ததோ ப⁴க³வா த்³வயதங் த³ஸ்ஸெந்தோ ‘‘இத³ங் து³க்க²’’ந்தி ஏவமாதி³மாஹ. தத்த² த்³வயதானங் சதுஸச்சத⁴ம்மானங் ‘‘இத³ங் து³க்க²ங், அயங் து³க்க²ஸமுத³யோ’’தி ஏவங் லோகியஸ்ஸ ஏகஸ்ஸ அவயவஸ்ஸ ஸஹேதுகஸ்ஸ வா து³க்க²ஸ்ஸ த³ஸ்ஸனேன அயங் ஏகானுபஸ்ஸனா, இதரா லோகுத்தரஸ்ஸ து³தியஸ்ஸ அவயவஸ்ஸ ஸஉபாயஸ்ஸ வா நிரோத⁴ஸ்ஸ த³ஸ்ஸனேன து³தியானுபஸ்ஸனா. பட²மா செத்த² ததியசதுத்த²விஸுத்³தீ⁴ஹி ஹோதி, து³தியா பஞ்சமவிஸுத்³தி⁴யா. ஏவங் ஸம்மா த்³வயதானுபஸ்ஸினோதி இமினா வுத்தனயேன ஸம்மா த்³வயத⁴ம்மே அனுபஸ்ஸந்தஸ்ஸ ஸதியா அவிப்பவாஸேன அப்பமத்தஸ்ஸ, காயிகசேதஸிகவீரியாதாபேன ஆதாபினோ காயே ச ஜீவிதே ச நிரபெக்க²த்தா , பஹிதத்தஸ்ஸ. பாடிகங்க²ந்தி இச்சி²தப்³ப³ங். தி³ட்டே²வ த⁴ம்மே அஞ்ஞாதி அஸ்மிங்யேவ அத்தபா⁴வே அரஹத்தங். ஸதி வா உபாதி³ஸேஸே அனாகா³மிதாதி ‘‘உபாதி³ஸேஸ’’ந்தி புனப்³ப⁴வவஸேன உபாதா³தப்³ப³க்க²ந்த⁴ஸேஸங் வுச்சதி, தஸ்மிங் வா ஸதி அனாகா³மிபா⁴வோ படிகங்கோ²தி த³ஸ்ஸேதி. தத்த² கிஞ்சாபி ஹெட்டி²மப²லானிபி ஏவங் த்³வயதானுபஸ்ஸினோவ ஹொந்தி, உபரிமப²லேஸு பன உஸ்ஸாஹங் ஜனெந்தோ ஏவமாஹ.
(1) Tato bhagavā dvayataṃ dassento ‘‘idaṃ dukkha’’nti evamādimāha. Tattha dvayatānaṃ catusaccadhammānaṃ ‘‘idaṃ dukkhaṃ, ayaṃ dukkhasamudayo’’ti evaṃ lokiyassa ekassa avayavassa sahetukassa vā dukkhassa dassanena ayaṃ ekānupassanā, itarā lokuttarassa dutiyassa avayavassa saupāyassa vā nirodhassa dassanena dutiyānupassanā. Paṭhamā cettha tatiyacatutthavisuddhīhi hoti, dutiyā pañcamavisuddhiyā. Evaṃ sammā dvayatānupassinoti iminā vuttanayena sammā dvayadhamme anupassantassa satiyā avippavāsena appamattassa, kāyikacetasikavīriyātāpena ātāpino kāye ca jīvite ca nirapekkhattā , pahitattassa. Pāṭikaṅkhanti icchitabbaṃ. Diṭṭheva dhamme aññāti asmiṃyeva attabhāve arahattaṃ. Sati vā upādisese anāgāmitāti ‘‘upādisesa’’nti punabbhavavasena upādātabbakkhandhasesaṃ vuccati, tasmiṃ vā sati anāgāmibhāvo paṭikaṅkhoti dasseti. Tattha kiñcāpi heṭṭhimaphalānipi evaṃ dvayatānupassinova honti, uparimaphalesu pana ussāhaṃ janento evamāha.
இத³மவோசாதிஆதி³ ஸங்கீ³திகாரானங் வசனங். தத்த² இத³ந்தி ‘‘யே தே, பி⁴க்க²வே’’திஆதி³வுத்தனித³ஸ்ஸனங். ஏதந்தி இதா³னி ‘‘யே து³க்க²’’ந்தி ஏவமாதி³வத்தப்³ப³கா³தா²ப³ந்த⁴னித³ஸ்ஸனங். இமா ச கா³தா² சதுஸச்சதீ³பகத்தா வுத்தத்த²தீ³பிகா ஏவ, ஏவங் ஸந்தேபி கா³தா²ருசிகானங் பச்சா² ஆக³தானங் புப்³பே³ வுத்தங் அஸமத்த²தாய அனுக்³க³ஹெத்வா ‘‘இதா³னி யதி³ வதெ³ய்ய ஸுந்த³ர’’ந்தி ஆகங்க²ந்தானங் விக்கி²த்தசித்தானஞ்ச அத்தா²ய வுத்தா. விஸேஸத்த²தீ³பிகா வாதி அவிபஸ்ஸகே விபஸ்ஸகே ச த³ஸ்ஸெத்வா தேஸங் வட்டவிவட்டத³ஸ்ஸனதோ, தஸ்மா விஸேஸத்த²த³ஸ்ஸனத்த²மேவ வுத்தா. ஏஸ நயோ இதோ பரம்பி கா³தா²வசனேஸு.
Idamavocātiādi saṅgītikārānaṃ vacanaṃ. Tattha idanti ‘‘ye te, bhikkhave’’tiādivuttanidassanaṃ. Etanti idāni ‘‘ye dukkha’’nti evamādivattabbagāthābandhanidassanaṃ. Imā ca gāthā catusaccadīpakattā vuttatthadīpikā eva, evaṃ santepi gāthārucikānaṃ pacchā āgatānaṃ pubbe vuttaṃ asamatthatāya anuggahetvā ‘‘idāni yadi vadeyya sundara’’nti ākaṅkhantānaṃ vikkhittacittānañca atthāya vuttā. Visesatthadīpikā vāti avipassake vipassake ca dassetvā tesaṃ vaṭṭavivaṭṭadassanato, tasmā visesatthadassanatthameva vuttā. Esa nayo ito parampi gāthāvacanesu.
730. தத்த² யத்த² சாதி நிப்³பா³னங் த³ஸ்ஸேதி. நிப்³பா³னே ஹி து³க்க²ங் ஸப்³ப³ஸோ உபருஜ்ஜ²தி, ஸப்³ப³ப்பகாரங் உபருஜ்ஜ²தி, ஸஹேதுகங் உபருஜ்ஜ²தி, அஸேஸஞ்ச உபருஜ்ஜ²தி. தஞ்ச மக்³க³ந்தி தஞ்ச அட்ட²ங்கி³கங் மக்³க³ங்.
730. Tattha yattha cāti nibbānaṃ dasseti. Nibbāne hi dukkhaṃ sabbaso uparujjhati, sabbappakāraṃ uparujjhati, sahetukaṃ uparujjhati, asesañca uparujjhati. Tañca magganti tañca aṭṭhaṅgikaṃ maggaṃ.
731-3. சேதோவிமுத்திஹீனா தே, அதோ² பஞ்ஞாவிமுத்தியாதி எத்த² அரஹத்தப²லஸமாதி⁴ ராக³விராகா³ சேதோவிமுத்தி, அரஹத்தப²லபஞ்ஞா அவிஜ்ஜாவிராகா³ பஞ்ஞாவிமுத்தீதி வேதி³தப்³பா³. தண்ஹாசரிதேன வா அப்பனாஜா²னப³லேன கிலேஸே விக்க²ம்பெ⁴த்வா அதி⁴க³தங் அரஹத்தப²லங் ராக³விராகா³ சேதோவிமுத்தி, தி³ட்டி²சரிதேன உபசாரஜ்ஜா²னமத்தங் நிப்³ப³த்தெத்வா விபஸ்ஸித்வா அதி⁴க³தங் அரஹத்தப²லங் அவிஜ்ஜாவிராகா³ பஞ்ஞாவிமுத்தி. அனாகா³மிப²லங் வா காமராக³ங் ஸந்தா⁴ய ராக³விராகா³ சேதோவிமுத்தி, அரஹத்தப²லங் ஸப்³ப³ப்பகாரதோ அவிஜ்ஜாவிராகா³ பஞ்ஞாவிமுத்தீதி. அந்தகிரியாயாதி வட்டது³க்க²ஸ்ஸ அந்தகரணத்தா²ய . ஜாதிஜரூபகா³தி ஜாதிஜரங் உபக³தா, ஜாதிஜராய வா உபக³தா, ந பரிமுச்சந்தி ஜாதிஜராயாதி ஏவங் வேதி³தப்³பா³. ஸேஸமெத்த² ஆதி³தோ பபு⁴தி பாகடமேவ. கா³தா²பரியோஸானே ச ஸட்டி²மத்தா பி⁴க்கூ² தங் தே³ஸனங் உக்³க³ஹெத்வா விபஸ்ஸித்வா தஸ்மிங்யேவ ஆஸனே அரஹத்தங் பாபுணிங்ஸு. யதா² செத்த², ஏவங் ஸப்³ப³வாரேஸு.
731-3.Cetovimuttihīnā te, atho paññāvimuttiyāti ettha arahattaphalasamādhi rāgavirāgā cetovimutti, arahattaphalapaññā avijjāvirāgā paññāvimuttīti veditabbā. Taṇhācaritena vā appanājhānabalena kilese vikkhambhetvā adhigataṃ arahattaphalaṃ rāgavirāgā cetovimutti, diṭṭhicaritena upacārajjhānamattaṃ nibbattetvā vipassitvā adhigataṃ arahattaphalaṃ avijjāvirāgā paññāvimutti. Anāgāmiphalaṃ vā kāmarāgaṃ sandhāya rāgavirāgā cetovimutti, arahattaphalaṃ sabbappakārato avijjāvirāgā paññāvimuttīti. Antakiriyāyāti vaṭṭadukkhassa antakaraṇatthāya . Jātijarūpagāti jātijaraṃ upagatā, jātijarāya vā upagatā, na parimuccanti jātijarāyāti evaṃ veditabbā. Sesamettha ādito pabhuti pākaṭameva. Gāthāpariyosāne ca saṭṭhimattā bhikkhū taṃ desanaṃ uggahetvā vipassitvā tasmiṃyeva āsane arahattaṃ pāpuṇiṃsu. Yathā cettha, evaṃ sabbavāresu.
(2) அதோ ஏவ ப⁴க³வா ‘‘ஸியா அஞ்ஞேனபி பரியாயேனா’’திஆதி³னா நயேன நானப்பகாரதோ த்³வயதானுபஸ்ஸனங் ஆஹ. தத்த² து³தியவாரே உபதி⁴பச்சயாதி ஸாஸவகம்மபச்சயா. ஸாஸவகம்மஞ்ஹி இத⁴ ‘‘உபதீ⁴’’தி அதி⁴ப்பேதங். அஸேஸவிராக³னிரோதா⁴தி அஸேஸங் விராகே³ன நிரோதா⁴, அஸேஸவிராக³ஸங்கா²தா வா நிரோதா⁴.
(2) Ato eva bhagavā ‘‘siyā aññenapi pariyāyenā’’tiādinā nayena nānappakārato dvayatānupassanaṃ āha. Tattha dutiyavāre upadhipaccayāti sāsavakammapaccayā. Sāsavakammañhi idha ‘‘upadhī’’ti adhippetaṃ. Asesavirāganirodhāti asesaṃ virāgena nirodhā, asesavirāgasaṅkhātā vā nirodhā.
734. உபதி⁴னிதா³னாதி கம்மபச்சயா. து³க்க²ஸ்ஸ ஜாதிப்பப⁴வானுபஸ்ஸீதி வட்டது³க்க²ஸ்ஸ ஜாதிகாரணங் ‘‘உபதீ⁴’’தி அனுபஸ்ஸந்தோ. ஸேஸமெத்த² பாகடமேவ. ஏவங் அயம்பி வாரோ சத்தாரி ஸச்சானி தீ³பெத்வா அரஹத்தனிகூடேனேவ வுத்தோ. யதா² சாயங், ஏவங் ஸப்³ப³வாரா.
734.Upadhinidānāti kammapaccayā. Dukkhassa jātippabhavānupassīti vaṭṭadukkhassa jātikāraṇaṃ ‘‘upadhī’’ti anupassanto. Sesamettha pākaṭameva. Evaṃ ayampi vāro cattāri saccāni dīpetvā arahattanikūṭeneva vutto. Yathā cāyaṃ, evaṃ sabbavārā.
(3) தத்த² ததியவாரே அவிஜ்ஜாபச்சயாதி ப⁴வகா³மிகம்மஸம்பா⁴ரஅவிஜ்ஜாபச்சயா. து³க்க²ங் பன ஸப்³ப³த்த² வட்டது³க்க²மேவ.
(3) Tattha tatiyavāre avijjāpaccayāti bhavagāmikammasambhāraavijjāpaccayā. Dukkhaṃ pana sabbattha vaṭṭadukkhameva.
735. ஜாதிமரணஸங்ஸாரந்தி க²ந்த⁴னிப்³ப³த்திங் ஜாதிங் க²ந்த⁴பே⁴த³ங் மரணங் க²ந்த⁴படிபாடிங் ஸங்ஸாரஞ்ச. வஜந்தீதி க³ச்ச²ந்தி உபெந்தி. இத்த²பா⁴வஞ்ஞதா²பா⁴வந்தி இமங் மனுஸ்ஸபா⁴வங் இதோ அவஸேஸஅஞ்ஞனிகாயபா⁴வஞ்ச. க³தீதி பச்சயபா⁴வோ.
735.Jātimaraṇasaṃsāranti khandhanibbattiṃ jātiṃ khandhabhedaṃ maraṇaṃ khandhapaṭipāṭiṃ saṃsārañca. Vajantīti gacchanti upenti. Itthabhāvaññathābhāvanti imaṃ manussabhāvaṃ ito avasesaaññanikāyabhāvañca. Gatīti paccayabhāvo.
736. அவிஜ்ஜா ஹாயந்தி அவிஜ்ஜா ஹி அயங். விஜ்ஜாக³தா ச யே ஸத்தாதி யே ச அரஹத்தமக்³க³விஜ்ஜாய கிலேஸே விஜ்ஜி²த்வா க³தா கீ²ணாஸவஸத்தா. ஸேஸமுத்தானத்த²மேவ.
736.Avijjā hāyanti avijjā hi ayaṃ. Vijjāgatā ca ye sattāti ye ca arahattamaggavijjāya kilese vijjhitvā gatā khīṇāsavasattā. Sesamuttānatthameva.
(4) சதுத்த²வாரே ஸங்கா²ரபச்சயாதி புஞ்ஞாபுஞ்ஞானேஞ்ஜாபி⁴ஸங்கா²ரபச்சயா.
(4) Catutthavāre saṅkhārapaccayāti puññāpuññāneñjābhisaṅkhārapaccayā.
738-9. ஏதமாதீ³னவங் ஞத்வாதி யதி³த³ங் து³க்க²ங் ஸங்கா²ரபச்சயா, ஏதங் ஆதீ³னவந்தி ஞத்வா. ஸப்³ப³ஸங்கா²ரஸமதா²தி ஸப்³பே³ஸங் வுத்தப்பகாரானங் ஸங்கா²ரானங் மக்³க³ஞாணேன ஸமதா², உபஹததாய ப²லஸமத்த²தாயாதி வுத்தங் ஹோதி. ஸஞ்ஞானந்தி காமஸஞ்ஞாதீ³னங் மக்³கே³னேவ உபரோத⁴னா. ஏதங் ஞத்வா யதா²தத²ந்தி ஏதங் து³க்க²க்க²யங் அவிபரீதங் ஞத்வா. ஸம்மத்³த³ஸாதி ஸம்மாத³ஸ்ஸனா. ஸம்மத³ஞ்ஞாயாதி ஸங்க²தங் அனிச்சாதி³தோ, அஸங்க²தஞ்ச நிச்சாதி³தோ ஞத்வா. மாரஸங்யோக³ந்தி தேபூ⁴மகவட்டங். ஸேஸமுத்தானத்த²மேவ.
738-9.Etamādīnavaṃ ñatvāti yadidaṃ dukkhaṃ saṅkhārapaccayā, etaṃ ādīnavanti ñatvā. Sabbasaṅkhārasamathāti sabbesaṃ vuttappakārānaṃ saṅkhārānaṃ maggañāṇena samathā, upahatatāya phalasamatthatāyāti vuttaṃ hoti. Saññānanti kāmasaññādīnaṃ maggeneva uparodhanā. Etaṃ ñatvā yathātathanti etaṃ dukkhakkhayaṃ aviparītaṃ ñatvā. Sammaddasāti sammādassanā. Sammadaññāyāti saṅkhataṃ aniccādito, asaṅkhatañca niccādito ñatvā. Mārasaṃyoganti tebhūmakavaṭṭaṃ. Sesamuttānatthameva.
(5) பஞ்சமவாரே விஞ்ஞாணபச்சயாதி கம்மஸஹஜாதஅபி⁴ஸங்கா²ரவிஞ்ஞாணபச்சயா.
(5) Pañcamavāre viññāṇapaccayāti kammasahajātaabhisaṅkhāraviññāṇapaccayā.
741. நிச்சா²தோதி நித்தண்ஹோ. பரினிப்³பு³தோதி கிலேஸபரினிப்³பா³னேன பரினிப்³பு³தோ ஹோதி. ஸேஸங் பாகடமேவ.
741.Nicchātoti nittaṇho. Parinibbutoti kilesaparinibbānena parinibbuto hoti. Sesaṃ pākaṭameva.
(6) ச²ட்ட²வாரே ப²ஸ்ஸபச்சயாதி அபி⁴ஸங்கா²ரவிஞ்ஞாணஸம்பயுத்தப²ஸ்ஸபச்சயாதி அத்தோ². ஏவங் எத்த² பத³படிபாடியா வத்தப்³பா³னி நாமரூபஸளாயதனானி அவத்வா ப²ஸ்ஸோ வுத்தோ. தானி ஹி ரூபமிஸ்ஸகத்தா கம்மஸம்பயுத்தானேவ ந ஹொந்தி, இத³ஞ்ச வட்டது³க்க²ங் கம்மதோ வா ஸம்ப⁴வெய்ய கம்மஸம்பயுத்தத⁴ம்மதோ வாதி.
(6) Chaṭṭhavāre phassapaccayāti abhisaṅkhāraviññāṇasampayuttaphassapaccayāti attho. Evaṃ ettha padapaṭipāṭiyā vattabbāni nāmarūpasaḷāyatanāni avatvā phasso vutto. Tāni hi rūpamissakattā kammasampayuttāneva na honti, idañca vaṭṭadukkhaṃ kammato vā sambhaveyya kammasampayuttadhammato vāti.
742-3. ப⁴வஸோதானுஸாரினந்தி தண்ஹானுஸாரினங். பரிஞ்ஞாயாதி தீஹி பரிஞ்ஞாஹி பரிஜானித்வா. அஞ்ஞாயாதி அரஹத்தமக்³க³பஞ்ஞாய ஞத்வா. உபஸமே ரதாதி ப²லஸமாபத்திவஸேன நிப்³பா³னே ரதா. ப²ஸ்ஸாபி⁴ஸமயாதி ப²ஸ்ஸனிரோதா⁴. ஸேஸங் பாகடமேவ.
742-3.Bhavasotānusārinanti taṇhānusārinaṃ. Pariññāyāti tīhi pariññāhi parijānitvā. Aññāyāti arahattamaggapaññāya ñatvā. Upasame ratāti phalasamāpattivasena nibbāne ratā. Phassābhisamayāti phassanirodhā. Sesaṃ pākaṭameva.
(7) ஸத்தமவாரே வேத³னாபச்சயாதி கம்மஸம்பயுத்தவேத³னாபச்சயா.
(7) Sattamavāre vedanāpaccayāti kammasampayuttavedanāpaccayā.
744-5. அது³க்க²மஸுக²ங் ஸஹாதி அது³க்க²மஸுகே²ன ஸஹ. ஏதங் து³க்க²ந்தி ஞத்வானாதி ஏதங் ஸப்³ப³ங் வேத³யிதங் ‘‘து³க்க²காரண’’ந்தி ஞத்வா, விபரிணாமட்டி²திஅஞ்ஞாணது³க்க²தாஹி வா து³க்க²ங் ஞத்வா. மோஸத⁴ம்மந்தி நஸ்ஸனத⁴ம்மங். பலோகினந்தி ஜராமரணேஹி பலுஜ்ஜனத⁴ம்மங். பு²ஸ்ஸ பு²ஸ்ஸாதி உத³யப்³ப³யஞாணேன பு²ஸித்வா பு²ஸித்வா. வயங் பஸ்ஸந்தி அந்தே ப⁴ங்க³மேவ பஸ்ஸந்தோ. ஏவங் தத்த² விஜானதீதி ஏவங் தா வேத³னா விஜானாதி, தத்த² வா து³க்க²பா⁴வங் விஜானாதி. வேத³னானங் க²யாதி ததோ பரங் மக்³க³ஞாணேன கம்மஸம்பயுத்தானங் வேத³னானங் க²யா. ஸேஸமுத்தானமேவ.
744-5.Adukkhamasukhaṃ sahāti adukkhamasukhena saha. Etaṃ dukkhanti ñatvānāti etaṃ sabbaṃ vedayitaṃ ‘‘dukkhakāraṇa’’nti ñatvā, vipariṇāmaṭṭhitiaññāṇadukkhatāhi vā dukkhaṃ ñatvā. Mosadhammanti nassanadhammaṃ. Palokinanti jarāmaraṇehi palujjanadhammaṃ. Phussa phussāti udayabbayañāṇena phusitvā phusitvā. Vayaṃ passanti ante bhaṅgameva passanto. Evaṃ tattha vijānatīti evaṃ tā vedanā vijānāti, tattha vā dukkhabhāvaṃ vijānāti. Vedanānaṃ khayāti tato paraṃ maggañāṇena kammasampayuttānaṃ vedanānaṃ khayā. Sesamuttānameva.
(8) அட்ட²மவாரே தண்ஹாபச்சயாதி கம்மஸம்பா⁴ரதண்ஹாபச்சயா .
(8) Aṭṭhamavāre taṇhāpaccayāti kammasambhārataṇhāpaccayā .
747. ஏதமாதீ³னவங் ஞத்வா, தண்ஹங் து³க்க²ஸ்ஸ ஸம்ப⁴வந்தி ஏதங் து³க்க²ஸ்ஸ ஸம்ப⁴வங் தண்ஹாய ஆதீ³னவங் ஞத்வா. ஸேஸமுத்தானமேவ.
747.Etamādīnavaṃ ñatvā, taṇhaṃ dukkhassa sambhavanti etaṃ dukkhassa sambhavaṃ taṇhāya ādīnavaṃ ñatvā. Sesamuttānameva.
(9) நவமவாரே உபாதா³னபச்சயாதி கம்மஸம்பா⁴ரஉபாதா³னபச்சயா.
(9) Navamavāre upādānapaccayāti kammasambhāraupādānapaccayā.
748-9. ப⁴வோதி விபாகப⁴வோ க²ந்த⁴பாதுபா⁴வோ. பூ⁴தோ து³க்க²ந்தி பூ⁴தோ ஸம்பூ⁴தோ வட்டது³க்க²ங் நிக³ச்ச²தி. ஜாதஸ்ஸ மரணந்தி யத்ராபி ‘‘பூ⁴தோ ஸுக²ங் நிக³ச்ச²தீ’’தி பா³லா மஞ்ஞந்தி, தத்ராபி து³க்க²மேவ த³ஸ்ஸெந்தோ ஆஹ – ‘‘ஜாதஸ்ஸ மரணங் ஹோதீ’’தி. து³தியகா³தா²ய யோஜனா – அனிச்சாதீ³ஹி ஸம்மத³ஞ்ஞாய பண்டி³தா உபாதா³னக்க²யா ஜாதிக்க²யங் நிப்³பா³னங் அபி⁴ஞ்ஞாய ந க³ச்ச²ந்தி புனப்³ப⁴வந்தி.
748-9.Bhavoti vipākabhavo khandhapātubhāvo. Bhūto dukkhanti bhūto sambhūto vaṭṭadukkhaṃ nigacchati. Jātassa maraṇanti yatrāpi ‘‘bhūto sukhaṃ nigacchatī’’ti bālā maññanti, tatrāpi dukkhameva dassento āha – ‘‘jātassa maraṇaṃ hotī’’ti. Dutiyagāthāya yojanā – aniccādīhi sammadaññāya paṇḍitā upādānakkhayā jātikkhayaṃ nibbānaṃ abhiññāya na gacchanti punabbhavanti.
(10) த³ஸமவாரே ஆரம்ப⁴பச்சயாதி கம்மஸம்பயுத்தவீரியபச்சயா.
(10) Dasamavāre ārambhapaccayāti kammasampayuttavīriyapaccayā.
751. அனாரம்பே⁴ விமுத்தினோதி அனாரம்பே⁴ நிப்³பா³னே விமுத்தஸ்ஸ. ஸேஸமுத்தானமேவ.
751.Anārambhe vimuttinoti anārambhe nibbāne vimuttassa. Sesamuttānameva.
(11) ஏகாத³ஸமவாரே ஆஹாரபச்சயாதி கம்மஸம்பயுத்தாஹாரபச்சயா. அபரோ நயோ – சதுப்³பி³தா⁴ ஸத்தா ரூபூபகா³, வேத³னூபகா³, ஸஞ்ஞூபகா³, ஸங்கா²ரூபகா³தி. தத்த² ஏகாத³ஸவிதா⁴ய காமதா⁴துயா ஸத்தா ரூபூபகா³ கப³ளீகாராஹாரஸேவனதோ. ரூபதா⁴துயா ஸத்தா அஞ்ஞத்ர அஸஞ்ஞேஹி வேத³னூபகா³ ப²ஸ்ஸாஹாரஸேவனதோ. ஹெட்டா² திவிதா⁴ய அரூபதா⁴துயா ஸத்தா ஸஞ்ஞூபகா³ ஸஞ்ஞாபி⁴னிப்³ப³த்தமனோஸஞ்சேதனாஹாரஸேவனதோ . ப⁴வக்³கே³ ஸத்தா ஸங்கா²ரூபகா³ ஸங்கா²ராபி⁴னிப்³ப³த்தவிஞ்ஞாணாஹாரஸேவனதோதி. ஏவம்பி யங் கிஞ்சி து³க்க²ங் ஸம்போ⁴தி, ஸப்³ப³ங் ஆஹாரபச்சயாதி வேதி³தப்³ப³ங்.
(11) Ekādasamavāre āhārapaccayāti kammasampayuttāhārapaccayā. Aparo nayo – catubbidhā sattā rūpūpagā, vedanūpagā, saññūpagā, saṅkhārūpagāti. Tattha ekādasavidhāya kāmadhātuyā sattā rūpūpagā kabaḷīkārāhārasevanato. Rūpadhātuyā sattā aññatra asaññehi vedanūpagā phassāhārasevanato. Heṭṭhā tividhāya arūpadhātuyā sattā saññūpagā saññābhinibbattamanosañcetanāhārasevanato . Bhavagge sattā saṅkhārūpagā saṅkhārābhinibbattaviññāṇāhārasevanatoti. Evampi yaṃ kiñci dukkhaṃ sambhoti, sabbaṃ āhārapaccayāti veditabbaṃ.
755. ஆரொக்³யந்தி நிப்³பா³னங். ஸங்கா²ய ஸேவீதி சத்தாரோ பச்சயே பச்சவெக்கி²த்வா ஸேவமானோ, ‘‘பஞ்சக்க²ந்தா⁴ த்³வாத³ஸாயதனானி அட்டா²ரஸதா⁴துயோ’’தி ஏவங் வா லோகங் ஸங்கா²ய ‘‘அனிச்சங் து³க்க²ங் அனத்தா’’தி ஞாணேன ஸேவமானோ. த⁴ம்மட்டோ²தி சதுஸச்சத⁴ம்மே டி²தோ. ஸங்க்²யங் நோபேதீதி ‘‘தே³வோ’’தி வா ‘‘மனுஸ்ஸோ’’தி வா ஆதி³கங் ஸங்க்²யங் ந க³ச்ச²தி. ஸேஸமுத்தானமேவ.
755.Ārogyanti nibbānaṃ. Saṅkhāya sevīti cattāro paccaye paccavekkhitvā sevamāno, ‘‘pañcakkhandhā dvādasāyatanāni aṭṭhārasadhātuyo’’ti evaṃ vā lokaṃ saṅkhāya ‘‘aniccaṃ dukkhaṃ anattā’’ti ñāṇena sevamāno. Dhammaṭṭhoti catusaccadhamme ṭhito. Saṅkhyaṃ nopetīti ‘‘devo’’ti vā ‘‘manusso’’ti vā ādikaṃ saṅkhyaṃ na gacchati. Sesamuttānameva.
(12) த்³வாத³ஸமவாரே இஞ்ஜிதபச்சயாதி தண்ஹாமானதி³ட்டி²கம்மகிலேஸஇஞ்ஜிதேஸு யதோ குதோசி கம்மஸம்பா⁴ரிஞ்ஜிதபச்சயா.
(12) Dvādasamavāre iñjitapaccayāti taṇhāmānadiṭṭhikammakilesaiñjitesu yato kutoci kammasambhāriñjitapaccayā.
757. ஏஜங் வொஸ்ஸஜ்ஜாதி தண்ஹங் சஜித்வா. ஸங்கா²ரே உபருந்தி⁴யாதி கம்மங் கம்மஸம்பயுத்தே ச ஸங்கா²ரே நிரோதெ⁴த்வா. ஸேஸமுத்தானமேவ.
757.Ejaṃ vossajjāti taṇhaṃ cajitvā. Saṅkhāre uparundhiyāti kammaṃ kammasampayutte ca saṅkhāre nirodhetvā. Sesamuttānameva.
(13) தேரஸமவாரே நிஸ்ஸிதஸ்ஸ சலிதந்தி தண்ஹாய தண்ஹாதி³ட்டி²மானேஹி வா க²ந்தே⁴ நிஸ்ஸிதஸ்ஸ ஸீஹஸுத்தே (ஸங்॰ நி॰ 3.78) தே³வானங் விய ப⁴யசலனங் ஹோதி. ஸேஸமுத்தானமேவ.
(13) Terasamavāre nissitassa calitanti taṇhāya taṇhādiṭṭhimānehi vā khandhe nissitassa sīhasutte (saṃ. ni. 3.78) devānaṃ viya bhayacalanaṃ hoti. Sesamuttānameva.
(14) சுத்³த³ஸமவாரே ரூபேஹீதி ரூபப⁴வேஹி ரூபஸமாபத்தீஹி வா. அரூபாதி அரூபப⁴வா அரூபஸமாபத்தியோ வா. நிரோதோ⁴தி நிப்³பா³னங்.
(14) Cuddasamavāre rūpehīti rūpabhavehi rūpasamāpattīhi vā. Arūpāti arūpabhavā arūpasamāpattiyo vā. Nirodhoti nibbānaṃ.
761. மச்சுஹாயினோதி மரணமச்சு கிலேஸமச்சு தே³வபுத்தமச்சுஹாயினோ, திவித⁴ம்பி தங் மச்சுங் ஹித்வா கா³மினோதி வுத்தங் ஹோதி. ஸேஸமுத்தானமேவ.
761.Maccuhāyinoti maraṇamaccu kilesamaccu devaputtamaccuhāyino, tividhampi taṃ maccuṃ hitvā gāminoti vuttaṃ hoti. Sesamuttānameva.
(15) பன்னரஸமவாரே யந்தி நாமரூபங் ஸந்தா⁴யாஹ. தஞ்ஹி லோகேன து⁴வஸுப⁴ஸுக²த்தவஸேன ‘‘இத³ங் ஸச்ச’’ந்தி உபனிஜ்ஜா²யிதங் தி³ட்ட²மாலோகிதங். தத³மரியானந்தி இத³ங் அரியானங், அனுனாஸிகஇகாரலோபங் கத்வா வுத்தங். ஏதங் முஸாதி ஏதங் து⁴வாதி³வஸேன க³ஹிதம்பி முஸா, ந தாதி³ஸங் ஹோதீதி. புன யந்தி நிப்³பா³னங் ஸந்தா⁴யாஹ. தஞ்ஹி லோகேன ரூபவேத³னாதீ³னமபா⁴வதோ ‘‘இத³ங் முஸா நத்தி² கிஞ்சீ’’தி உபனிஜ்ஜா²யிதங். தத³மரியானங் ஏதங் ஸச்சந்தி தங் இத³ங் அரியானங் ஏதங் நிக்கிலேஸஸங்கா²தா ஸுப⁴பா⁴வா, பவத்திது³க்க²படிபக்க²ஸங்கா²தா ஸுக²பா⁴வா, அச்சந்தஸந்திஸங்கா²தா நிச்சபா⁴வா ச அனபக³மனேன பரமத்த²தோ ‘‘ஸச்ச’’ந்தி யதா²பூ⁴தங் ஸம்மப்பஞ்ஞாய ஸுதி³ட்ட²ங்.
(15) Pannarasamavāre yanti nāmarūpaṃ sandhāyāha. Tañhi lokena dhuvasubhasukhattavasena ‘‘idaṃ sacca’’nti upanijjhāyitaṃ diṭṭhamālokitaṃ. Tadamariyānanti idaṃ ariyānaṃ, anunāsikaikāralopaṃ katvā vuttaṃ. Etaṃ musāti etaṃ dhuvādivasena gahitampi musā, na tādisaṃ hotīti. Puna yanti nibbānaṃ sandhāyāha. Tañhi lokena rūpavedanādīnamabhāvato ‘‘idaṃ musā natthi kiñcī’’ti upanijjhāyitaṃ. Tadamariyānaṃ etaṃ saccanti taṃ idaṃ ariyānaṃ etaṃ nikkilesasaṅkhātā subhabhāvā, pavattidukkhapaṭipakkhasaṅkhātā sukhabhāvā, accantasantisaṅkhātā niccabhāvā ca anapagamanena paramatthato ‘‘sacca’’nti yathābhūtaṃ sammappaññāya sudiṭṭhaṃ.
762-3. அனத்தனி அத்தமானிந்தி அனத்தனி நாமரூபே அத்தமானிங். இத³ங் ஸச்சந்தி மஞ்ஞதீதி இத³ங் நாமரூபங் து⁴வாதி³வஸேன ‘‘ஸச்ச’’ந்தி மஞ்ஞதி. யேன யேன ஹீதி யேன யேன ரூபே வா வேத³னாய வா ‘‘மம ரூபங், மம வேத³னா’’திஆதி³னா நயேன மஞ்ஞந்தி. ததோ தந்தி ததோ மஞ்ஞிதாகாரா தங் நாமரூபங் ஹோதி அஞ்ஞதா². கிங் காரணங்? தஞ்ஹி தஸ்ஸ முஸா ஹோதி, யஸ்மா தங் யதா²மஞ்ஞிதாகாரா முஸா ஹோதி, தஸ்மா அஞ்ஞதா² ஹோதீதி அத்தோ². கஸ்மா பன முஸா ஹோதீதி? மோஸத⁴ம்மஞ்ஹி இத்தரங், யஸ்மா யங் இத்தரங் பரித்தபச்சுபட்டா²னங், தங் மோஸத⁴ம்மங் நஸ்ஸனத⁴ம்மங் ஹோதி, ததா²ரூபஞ்ச நாமரூபந்தி. ஸச்சாபி⁴ஸமயாதி ஸச்சாவபோ³தா⁴. ஸேஸமுத்தானமேவ.
762-3.Anattani attamāninti anattani nāmarūpe attamāniṃ. Idaṃ saccanti maññatīti idaṃ nāmarūpaṃ dhuvādivasena ‘‘sacca’’nti maññati. Yena yena hīti yena yena rūpe vā vedanāya vā ‘‘mama rūpaṃ, mama vedanā’’tiādinā nayena maññanti. Tato tanti tato maññitākārā taṃ nāmarūpaṃ hoti aññathā. Kiṃ kāraṇaṃ? Tañhi tassa musā hoti, yasmā taṃ yathāmaññitākārā musā hoti, tasmā aññathā hotīti attho. Kasmā pana musā hotīti? Mosadhammañhi ittaraṃ, yasmā yaṃ ittaraṃ parittapaccupaṭṭhānaṃ, taṃ mosadhammaṃ nassanadhammaṃ hoti, tathārūpañca nāmarūpanti. Saccābhisamayāti saccāvabodhā. Sesamuttānameva.
(16) ஸோளஸமவாரே யந்தி ச²ப்³பி³த⁴மிட்டா²ரம்மணங் ஸந்தா⁴யாஹ. தஞ்ஹி லோகேன ஸலப⁴மச்ச²மக்கடாதீ³ஹி பதீ³பப³ளிஸலேபாத³யோ விய ‘‘இத³ங் ஸுக²’’ந்தி உபனிஜ்ஜா²யிதங். தத³மரியானங் ஏதங் து³க்க²ந்தி தங் இத³ங் அரியானங் ‘‘காமா ஹி சித்ரா மது⁴ரா மனோரமா, விரூபரூபேன மதெ²ந்தி சித்த’’ந்திஆதி³னா (ஸு॰ நி॰ 50; சூளனி॰ க²க்³க³விஸாணஸுத்தனித்³தே³ஸ 136) நயேன ‘‘ஏதங் து³க்க²’’ந்தி யதா²பூ⁴தங் ஸம்மப்பஞ்ஞாய ஸுதி³ட்ட²ங். புன யந்தி நிப்³பா³னமேவ ஸந்தா⁴யாஹ. தஞ்ஹி லோகேன காமகு³ணாபா⁴வா ‘‘து³க்க²’’ந்தி உபனிஜ்ஜா²யிதங். தத³மரியானந்தி தங் இத³ங் அரியானங் பரமத்த²ஸுக²தோ ‘‘ஏதங் ஸுக²’’ந்தி யதா²பூ⁴தங் ஸம்மப்பஞ்ஞாய ஸுதி³ட்ட²ங்.
(16) Soḷasamavāre yanti chabbidhamiṭṭhārammaṇaṃ sandhāyāha. Tañhi lokena salabhamacchamakkaṭādīhi padīpabaḷisalepādayo viya ‘‘idaṃ sukha’’nti upanijjhāyitaṃ. Tadamariyānaṃ etaṃ dukkhanti taṃ idaṃ ariyānaṃ ‘‘kāmā hi citrā madhurā manoramā, virūparūpena mathenti citta’’ntiādinā (su. ni. 50; cūḷani. khaggavisāṇasuttaniddesa 136) nayena ‘‘etaṃ dukkha’’nti yathābhūtaṃ sammappaññāya sudiṭṭhaṃ. Puna yanti nibbānameva sandhāyāha. Tañhi lokena kāmaguṇābhāvā ‘‘dukkha’’nti upanijjhāyitaṃ. Tadamariyānanti taṃ idaṃ ariyānaṃ paramatthasukhato ‘‘etaṃ sukha’’nti yathābhūtaṃ sammappaññāya sudiṭṭhaṃ.
765-6. கேவலாதி அனவஸேஸா. இட்டா²தி இச்சி²தா பத்தி²தா. கந்தாதி பியா. மனாபாதி மனவுட்³டி⁴கரா. யாவதத்தீ²தி வுச்சதீதி யாவதா ஏதே ச² ஆரம்மணா அத்தீ²தி வுச்சந்தி. வசனப்³யத்தயோ வேதி³தப்³போ³. ஏதே வோதி எத்த² வோதி நிபாதமத்தங்.
765-6.Kevalāti anavasesā. Iṭṭhāti icchitā patthitā. Kantāti piyā. Manāpāti manavuḍḍhikarā. Yāvatatthīti vuccatīti yāvatā ete cha ārammaṇā atthīti vuccanti. Vacanabyattayo veditabbo. Ete voti ettha voti nipātamattaṃ.
767-8. ஸுக²ந்தி தி³ட்ட²மரியேஹி, ஸக்காயஸ்ஸுபரோத⁴னந்தி ‘‘ஸுக²’’மிதி அரியேஹி பஞ்சக்க²ந்த⁴னிரோதோ⁴ தி³ட்டோ², நிப்³பா³னந்தி வுத்தங் ஹோதி. பச்சனீகமித³ங் ஹோதீதி படிலோமமித³ங் த³ஸ்ஸனங் ஹோதி. பஸ்ஸதந்தி பஸ்ஸந்தானங், பண்டி³தானந்தி வுத்தங் ஹோதி. யங் பரேதி எத்த² யந்தி வத்து²காமே ஸந்தா⁴யாஹ. புன யங் பரேதி எத்த² நிப்³பா³னங்.
767-8.Sukhanti diṭṭhamariyehi, sakkāyassuparodhananti ‘‘sukha’’miti ariyehi pañcakkhandhanirodho diṭṭho, nibbānanti vuttaṃ hoti. Paccanīkamidaṃ hotīti paṭilomamidaṃ dassanaṃ hoti. Passatanti passantānaṃ, paṇḍitānanti vuttaṃ hoti. Yaṃ pareti ettha yanti vatthukāme sandhāyāha. Puna yaṃ pareti ettha nibbānaṃ.
769-71. பஸ்ஸாதி ஸோதாரங் ஆலபதி. த⁴ம்மந்தி நிப்³பா³னத⁴ம்மங். ஸம்பமூள்ஹெத்த²வித்³த³ஸூதி ஸம்பமூள்ஹா எத்த² அவித்³த³ஸூ பா³லா. கிங்காரணங் ஸம்பமூள்ஹா? நிவுதானங் தமோ ஹோதி , அந்த⁴காரோ அபஸ்ஸதங் , பா³லானங் அவிஜ்ஜாய நிவுதானங் ஒத்த²டானங் அந்த⁴பா⁴வகரணோ தமோ ஹோதி, யேன நிப்³பா³னத⁴ம்மங் த³ட்டு²ங் ந ஸக்கொந்தி. ஸதஞ்ச விவடங் ஹோதி, ஆலோகோ பஸ்ஸதாமிவாதி ஸதஞ்ச ஸப்புரிஸானங் பஞ்ஞாத³ஸ்ஸனேன பஸ்ஸதங் ஆலோகோவ விவடங் ஹோதி நிப்³பா³னங். ஸந்திகே ந விஜானந்தி, மகா³ த⁴ம்மஸ்ஸகோவிதா³தி யங் அத்தனோ ஸரீரே தசபஞ்சகமத்தங் பரிச்சி²ந்தி³த்வா அனந்தரமேவ அதி⁴க³ந்தப்³ப³தோ, அத்தனோ க²ந்தா⁴னங் வா நிரோத⁴மத்ததோ ஸந்திகே நிப்³பா³னங், தங் ஏவங் ஸந்திகே ஸந்தம்பி ந விஜானந்தி மக³பூ⁴தா ஜனா மக்³கா³மக்³க³த⁴ம்மஸ்ஸ ஸச்சத⁴ம்மஸ்ஸ வா அகோவிதா³, ஸப்³ப³தா² ப⁴வராக³…பே॰… ஸுஸம்பு³தோ⁴. தத்த² மாரதெ⁴ய்யானுபன்னேஹீதி தேபூ⁴மகவட்டங் அனுபன்னேஹி.
769-71.Passāti sotāraṃ ālapati. Dhammanti nibbānadhammaṃ. Sampamūḷhetthaviddasūti sampamūḷhā ettha aviddasū bālā. Kiṃkāraṇaṃ sampamūḷhā? Nivutānaṃ tamo hoti, andhakāro apassataṃ, bālānaṃ avijjāya nivutānaṃ otthaṭānaṃ andhabhāvakaraṇo tamo hoti, yena nibbānadhammaṃ daṭṭhuṃ na sakkonti. Satañca vivaṭaṃ hoti, āloko passatāmivāti satañca sappurisānaṃ paññādassanena passataṃ ālokova vivaṭaṃ hoti nibbānaṃ. Santike na vijānanti, magā dhammassakovidāti yaṃ attano sarīre tacapañcakamattaṃ paricchinditvā anantarameva adhigantabbato, attano khandhānaṃ vā nirodhamattato santike nibbānaṃ, taṃ evaṃ santike santampi na vijānanti magabhūtā janā maggāmaggadhammassa saccadhammassa vā akovidā, sabbathā bhavarāga…pe… susambudho. Tattha māradheyyānupannehīti tebhūmakavaṭṭaṃ anupannehi.
772. பச்சி²மகா³தா²ய ஸம்ப³ந்தோ⁴ ‘‘ஏவங் அஸுஸம்பு³த⁴ங் கோ நு அஞ்ஞத்ர மரியேஹீ’’தி. தஸ்ஸத்தோ² – ட²பெத்வா அரியே கோ நு அஞ்ஞோ நிப்³பா³னபத³ங் ஜானிதுங் அரஹதி, யங் பத³ங் சதுத்தே²ன அரியமக்³கே³ன ஸம்மத³ஞ்ஞாய அனந்தரமேவ அனாஸவா ஹுத்வா கிலேஸபரினிப்³பா³னேன பரினிப்³ப³ந்தி, ஸம்மத³ஞ்ஞாய வா அனாஸவா ஹுத்வா அந்தே அனுபாதி³ஸேஸாய நிப்³பா³னதா⁴துயா பரினிப்³ப³ந்தீதி அரஹத்தனிகூடேன தே³ஸனங் நிட்டா²பேஸி.
772. Pacchimagāthāya sambandho ‘‘evaṃ asusambudhaṃ ko nu aññatra mariyehī’’ti. Tassattho – ṭhapetvā ariye ko nu añño nibbānapadaṃ jānituṃ arahati, yaṃ padaṃ catutthena ariyamaggena sammadaññāya anantarameva anāsavā hutvā kilesaparinibbānena parinibbanti, sammadaññāya vā anāsavā hutvā ante anupādisesāya nibbānadhātuyā parinibbantīti arahattanikūṭena desanaṃ niṭṭhāpesi.
அத்தமனாதி துட்ட²மனா. அபி⁴னந்து³ந்தி அபி⁴னந்தி³ங்ஸு. இமஸ்மிஞ்ச பன வெய்யாகரணஸ்மிந்தி இமஸ்மிங் ஸோளஸமே வெய்யாகரணே. ப⁴ஞ்ஞமானேதி ப⁴ணியமானே. ஸேஸங் பாகடமேவ.
Attamanāti tuṭṭhamanā. Abhinandunti abhinandiṃsu. Imasmiñca pana veyyākaraṇasminti imasmiṃ soḷasame veyyākaraṇe. Bhaññamāneti bhaṇiyamāne. Sesaṃ pākaṭameva.
ஏவங் ஸப்³பே³ஸுபி ஸோளஸஸு வெய்யாகரணேஸு ஸட்டி²மத்தே ஸட்டி²மத்தே கத்வா ஸட்டி²அதி⁴கானங் நவன்னங் பி⁴க்கு²ஸதானங் அனுபாதா³ய ஆஸவேஹி சித்தானி விமுச்சிங்ஸு, ஸோளஸக்க²த்துங் சத்தாரி சத்தாரி கத்வா சதுஸட்டி² ஸச்சானெத்த² வேனெய்யவஸேன நானப்பகாரதோ தே³ஸிதானீதி.
Evaṃ sabbesupi soḷasasu veyyākaraṇesu saṭṭhimatte saṭṭhimatte katvā saṭṭhiadhikānaṃ navannaṃ bhikkhusatānaṃ anupādāya āsavehi cittāni vimucciṃsu, soḷasakkhattuṃ cattāri cattāri katvā catusaṭṭhi saccānettha veneyyavasena nānappakārato desitānīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய த்³வயதானுபஸ்ஸனாஸுத்தவண்ணனா
Suttanipāta-aṭṭhakathāya dvayatānupassanāsuttavaṇṇanā
நிட்டி²த்தா.
Niṭṭhittā.
நிட்டி²தோ ச ததியோ வக்³கோ³ அத்த²வண்ணனானயதோ, நாமேன
Niṭṭhito ca tatiyo vaggo atthavaṇṇanānayato, nāmena
மஹாவக்³கோ³தி.
Mahāvaggoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 12. த்³வயதானுபஸ்ஸனாஸுத்தங் • 12. Dvayatānupassanāsuttaṃ
