| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
৩. দুট্ঠুল্লৰাচাসিক্খাপদৰণ্ণনা
3. Duṭṭhullavācāsikkhāpadavaṇṇanā
২৮৫. ততিযে অসদ্ধম্মপটিসঞ্ঞুত্তন্তি মেথুনধম্মপটিসংযুত্তং। বালাতি সুভাসিতদুব্ভাসিতং অজানন্তী , সুরামদমত্ততায উম্মত্তকাদিভাৰেন চ অজানন্তীপি এত্থেৰ সঙ্গয্হতি। ন তাৰ সীসং এতীতি সঙ্ঘাদিসেসপচ্চযত্তসঙ্খাতং মত্থকং পারিপূরি ন হোতি, মগ্গমেথুনেহি অঘটিতত্তা দুক্কটং পন হোতি এৰ।
285. Tatiye asaddhammapaṭisaññuttanti methunadhammapaṭisaṃyuttaṃ. Bālāti subhāsitadubbhāsitaṃ ajānantī , surāmadamattatāya ummattakādibhāvena ca ajānantīpi ettheva saṅgayhati. Na tāva sīsaṃ etīti saṅghādisesapaccayattasaṅkhātaṃ matthakaṃ pāripūri na hoti, maggamethunehi aghaṭitattā dukkaṭaṃ pana hoti eva.
অপসাদেতীতি অপসাদকরৰচনং করোতি। দোসং দেতীতি দোসং পতিট্ঠাপেতি। তীহীতি অনিমিত্তাসীতিআদীনং পদানং অদুট্ঠুল্লভাৰেনাপি অত্থযোজনারহত্তা পস্সাৰমগ্গাদিপটিসঞ্ঞুত্ততানিযমো নত্থীতি ৰুত্তং, তেহি পন অট্ঠহি পদেহি পরিব্বাজিকাৰত্থুস্মিং (পারা॰ ২৮৯) ৰিয থুল্লচ্চযন্তি ৰেদিতব্বং।
Apasādetīti apasādakaravacanaṃ karoti. Dosaṃ detīti dosaṃ patiṭṭhāpeti. Tīhīti animittāsītiādīnaṃ padānaṃ aduṭṭhullabhāvenāpi atthayojanārahattā passāvamaggādipaṭisaññuttatāniyamo natthīti vuttaṃ, tehi pana aṭṭhahi padehi paribbājikāvatthusmiṃ (pārā. 289) viya thullaccayanti veditabbaṃ.
কুঞ্চিকপনাল়িমত্তন্তি কুঞ্চিকাছিদ্দমত্তং। সুক্খসোতাতি দকসোতস্স সুক্খতায লোহিতৰণ্ণৰিগমো হোতীতি ৰুত্তং।
Kuñcikapanāḷimattanti kuñcikāchiddamattaṃ. Sukkhasotāti dakasotassa sukkhatāya lohitavaṇṇavigamo hotīti vuttaṃ.
সুদ্ধানীতি মেথুনাদিপদেহি অযোজিতানিপি। মেথুনধম্মেন ঘটিতানেৰাতি ইদং উপলক্খণমত্তং, ৰচ্চমগ্গপস্সাৰমগ্গেহিপি অনিমিত্তে ‘‘তৰ ৰচ্চমগ্গো, পস্সাৰমগ্গো ৰা ঈদিসো’’তিআদিনা ঘটিতেপি আপত্তিকরানেৰ।
Suddhānīti methunādipadehi ayojitānipi. Methunadhammena ghaṭitānevāti idaṃ upalakkhaṇamattaṃ, vaccamaggapassāvamaggehipi animitte ‘‘tava vaccamaggo, passāvamaggo vā īdiso’’tiādinā ghaṭitepi āpattikarāneva.
২৮৬. গরুকাপত্তিন্তি ভিক্খুনিযা উব্ভজাণুমণ্ডলিকায পারাজিকাপত্তিং সন্ধায ৰদতি।
286.Garukāpattinti bhikkhuniyā ubbhajāṇumaṇḍalikāya pārājikāpattiṃ sandhāya vadati.
২৮৭. হসন্তো হসন্তোতি উপলক্খণমত্তং, অহসন্তোপি যেন কেনচি আকারেন অত্তনো ৰিপরিণতচিত্ততং ইত্থিযা পকাসেন্তো ৰদতি, আপত্তিযেৰ।
287.Hasanto hasantoti upalakkhaṇamattaṃ, ahasantopi yena kenaci ākārena attano vipariṇatacittataṃ itthiyā pakāsento vadati, āpattiyeva.
কাযচিত্ততোতি হত্থমুদ্দায ওভাসেন্তস্স কাযচিত্ততো সমুট্ঠাতি।
Kāyacittatoti hatthamuddāya obhāsentassa kāyacittato samuṭṭhāti.
২৮৮. তস্মা দুক্কটন্তি অপ্পটিৰিজাননতো দুক্কটং, পটিৰিজাননে পন সতি থুল্লচ্চযমেৰ পরিব্বাজিকাৰত্থুস্মিং (পারা॰ ২৮৯) ৰিয অখেত্তপদত্তা। খেত্তপদে হি পটিৰিজানন্তিযা সঙ্ঘাদিসেসোৰ সিযা মেথুনধম্মযাচনৰত্থুদ্ৰযে (পারা॰ ২৮৯) ৰিয, তং পন ৰত্থুদ্ৰযং মেথুনযাচনতো চতুত্থসঙ্ঘাদিসেসে ৰত্তব্বম্পি দুট্ঠুল্লৰাচস্সাদমত্তেন পৰত্তত্তা ইধ ৰুত্তন্তি ৰেদিতব্বং। এৰং খেত্তপদেন ৰদন্তস্স ইত্থিযা অপ্পটিৰিজানন্তিযা কিং হোতীতি? কিঞ্চাপি অযং নাম আপত্তীতি পাল়িঅট্ঠকথাসু ন ৰুত্তং, অথ খো থুল্লচ্চযেনেৰেত্থ ভৰিতব্বং । তথা হি অখেত্তপদে অপ্পটিৰিজানন্তিযা দুক্কটং, পটিৰিজানন্তিযা থুল্লচ্চযং ৰুত্তং। খেত্তপদে পন পটিৰিজাননে সঙ্ঘাদিসেসোৰ ৰুত্তো, অপ্পটিৰিজাননে থুল্লচ্চযমেৰ ভৰিতুং যুত্তং, ন দুক্কটং, অখেত্তপদতো ৰিসেসাভাৰপ্পসঙ্গোতি গহেতব্বং। যথা চেত্থ, এৰং চতুত্থসিক্খাপদেপি অখেত্তপদে পটিৰিজানন্তিযা থুল্লচ্চযং, অপ্পটিৰিজানন্তিযা দুক্কটং, খেত্তপদে পন অপ্পটিৰিজানন্তিযা থুল্লচ্চযন্তি ৰেদিতব্বং। পাল়িযং নৰাৰুতন্তি নৰৰীতং।
288.Tasmā dukkaṭanti appaṭivijānanato dukkaṭaṃ, paṭivijānane pana sati thullaccayameva paribbājikāvatthusmiṃ (pārā. 289) viya akhettapadattā. Khettapade hi paṭivijānantiyā saṅghādisesova siyā methunadhammayācanavatthudvaye (pārā. 289) viya, taṃ pana vatthudvayaṃ methunayācanato catutthasaṅghādisese vattabbampi duṭṭhullavācassādamattena pavattattā idha vuttanti veditabbaṃ. Evaṃ khettapadena vadantassa itthiyā appaṭivijānantiyā kiṃ hotīti? Kiñcāpi ayaṃ nāma āpattīti pāḷiaṭṭhakathāsu na vuttaṃ, atha kho thullaccayenevettha bhavitabbaṃ . Tathā hi akhettapade appaṭivijānantiyā dukkaṭaṃ, paṭivijānantiyā thullaccayaṃ vuttaṃ. Khettapade pana paṭivijānane saṅghādisesova vutto, appaṭivijānane thullaccayameva bhavituṃ yuttaṃ, na dukkaṭaṃ, akhettapadato visesābhāvappasaṅgoti gahetabbaṃ. Yathā cettha, evaṃ catutthasikkhāpadepi akhettapade paṭivijānantiyā thullaccayaṃ, appaṭivijānantiyā dukkaṭaṃ, khettapade pana appaṭivijānantiyā thullaccayanti veditabbaṃ. Pāḷiyaṃ navāvutanti navavītaṃ.
২৮৮. অসদ্ধম্মং সন্ধাযাতি মেথুনং সন্ধায ৰুত্তং। তঞ্হি পুত্তসমুপ্পত্তিযা বীজনিক্খেপতো ৰপ্পপরিযাযং লভতীতি।
288.Asaddhammaṃ sandhāyāti methunaṃ sandhāya vuttaṃ. Tañhi puttasamuppattiyā bījanikkhepato vappapariyāyaṃ labhatīti.
সংসীদতীতি ৰহতি, সংসরীযতীতি ৰা অত্থো। মনুস্সিত্থী, তথাসঞ্ঞিতা, দুট্ঠুল্লৰাচস্সাদরাগো, তেন ওভাসনং, তঙ্খণৰিজাননন্তি ইমানেত্থ পঞ্চ অঙ্গানি।
Saṃsīdatīti vahati, saṃsarīyatīti vā attho. Manussitthī, tathāsaññitā, duṭṭhullavācassādarāgo, tena obhāsanaṃ, taṅkhaṇavijānananti imānettha pañca aṅgāni.
দুট্ঠুল্লৰাচাসিক্খাপদৰণ্ণনা নিট্ঠিতা।
Duṭṭhullavācāsikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৩. দুট্ঠুল্লৰাচাসিক্খাপদং • 3. Duṭṭhullavācāsikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৩. দুট্ঠুল্লৰাচাসিক্খাপদৰণ্ণনা • 3. Duṭṭhullavācāsikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৩. দুট্ঠুল্লৰাচাসিক্খাপদৰণ্ণনা • 3. Duṭṭhullavācāsikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পদভাজনীযৰণ্ণনা • Padabhājanīyavaṇṇanā
