| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
៤. ទុដ្ឋុល្លសិក្ខាបទំ
4. Duṭṭhullasikkhāpadaṃ
៣៩៩. ចតុត្ថេ អត្ថុទ្ធារវសេន ទស្សិតានិ ទុដ្ឋុល្លសទ្ទត្ថភាវេន សទិសត្តាតិ អធិប្បាយោ។ ‘‘ធុរ’’ន្តិ ឯត្ថ លក្ខណវន្តត្តា ភុម្មត្ថេ ឧបយោគវចនន្តិ អាហ ‘‘ធុរេ’’តិ។ ធុរេ និក្ខិត្តមត្តេ សតីតិ យោជនា។
399. Catutthe atthuddhāravasena dassitāni duṭṭhullasaddatthabhāvena sadisattāti adhippāyo. ‘‘Dhura’’nti ettha lakkhaṇavantattā bhummatthe upayogavacananti āha ‘‘dhure’’ti. Dhure nikkhittamatte satīti yojanā.
ឯវំ ធុរំ និក្ខិបិត្វាតិ ‘‘អញ្ញស្ស នារោចេស្សាមី’’តិ ឯវំ ធុរំ និក្ខិបិត្វា។ អញ្ញស្សាតិ វត្ថុ, បុគ្គលតោ អញ្ញស្ស ទុតិយស្ស។ សោបីតិ ទុតិយោបិ។ អញ្ញស្សាតិ តតិយស្ស។ យាវ កោដិ ន ឆិជ្ជតិ, តាវ អាបជ្ជតិយេវាតិ យោជនា។ តស្សេវាតិ អាបត្តិំ អាបន្នបុគ្គលស្ស។ វត្ថុបុគ្គលោយេវាតិ អាបត្តិំ អាបន្នបុគ្គលោយេវ។ អយន្តិ បឋមភិក្ខុ។ អញ្ញស្សាតិ ទុតិយស្ស។ សោតិ ទុតិយោ អារោចេតីតិ សម្ពន្ធោ។ យេនាតិ បឋមភិក្ខុនា។ អស្សាតិ ទុតិយស្ស។ តស្សេវាតិ បឋមភិក្ខុស្សេវ។ វត្ថុបុគ្គលំ ឧបនិធាយ ‘‘តតិយេន បុគ្គលេន ទុតិយស្សា’’តិ វុត្តំ។
Evaṃdhuraṃ nikkhipitvāti ‘‘aññassa nārocessāmī’’ti evaṃ dhuraṃ nikkhipitvā. Aññassāti vatthu, puggalato aññassa dutiyassa. Sopīti dutiyopi. Aññassāti tatiyassa. Yāva koṭi na chijjati, tāva āpajjatiyevāti yojanā. Tassevāti āpattiṃ āpannapuggalassa. Vatthupuggaloyevāti āpattiṃ āpannapuggaloyeva. Ayanti paṭhamabhikkhu. Aññassāti dutiyassa. Soti dutiyo ārocetīti sambandho. Yenāti paṭhamabhikkhunā. Assāti dutiyassa. Tassevāti paṭhamabhikkhusseva. Vatthupuggalaṃ upanidhāya ‘‘tatiyena puggalena dutiyassā’’ti vuttaṃ.
៤០០. បញ្ចាបត្តិក្ខន្ធេតិ ថុល្លច្ចយាទិកេ បញ្ច អាបត្តិក្ខន្ធេ។ អជ្ឈាចារោ នាមាតិ អធិភវិត្វា វីតិក្កមិត្វា អាចរិតព្ពត្តា អជ្ឈាចារោ នាមាតិ។ ចតុត្ថំ។
400.Pañcāpattikkhandheti thullaccayādike pañca āpattikkhandhe. Ajjhācāro nāmāti adhibhavitvā vītikkamitvā ācaritabbattā ajjhācāro nāmāti. Catutthaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៧. សប្បាណកវគ្គោ • 7. Sappāṇakavaggo
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៤. ទុដ្ឋុល្លសិក្ខាបទវណ្ណនា • 4. Duṭṭhullasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៤. ទុដ្ឋុល្លសិក្ខាបទវណ្ណនា • 4. Duṭṭhullasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៤. ទុដ្ឋុល្លសិក្ខាបទវណ្ណនា • 4. Duṭṭhullasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៤. ទុដ្ឋុល្លសិក្ខាបទវណ្ណនា • 4. Duṭṭhullasikkhāpadavaṇṇanā
