| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၉. ဒုဋ္ဌုလ္လာရောစနသိက္ခာပဒဝဏ္ဏနာ
9. Duṭṭhullārocanasikkhāpadavaṇṇanā
ဒ္ဝိန္နံ ‘အာပတ္တိက္ခန္ဓာနန္တိ ပာရာဇိကသင္ဃာဒိသေသသင္ခာတာနံ ဒ္ဝိန္နံ အာပတ္တိက္ခန္ဓာနံ။ အာယတိံ သံဝရတ္ထာယာတိ ‘‘ဧဝမေသ ပရေသု ဟိရောတ္တပ္ပေနာပိ အာယတိံ သံဝရံ အာပဇ္ဇိသ္သတီ’’တိ အာယတိံ သံဝရတ္ထာယ။ အာပတ္တီနဉ္စ ကုလာနဉ္စ ပရိယန္တံ ကတ္ဝာ ဝာ အကတ္ဝာ ဝာတိ ‘‘ဧတ္တကာ အာပတ္တိယော အာရောစေတဗ္ဗာ, ဧတ္တကေသု ကုလေသု အာရောစေတဗ္ဗာ’’တိ ဧဝံ အာပတ္တီနဉ္စ ကုလာနဉ္စ ပရိယန္တံ ကတ္ဝာ ဝာ အကတ္ဝာ ဝာ။
Dvinnaṃ‘āpattikkhandhānanti pārājikasaṅghādisesasaṅkhātānaṃ dvinnaṃ āpattikkhandhānaṃ. Āyatiṃ saṃvaratthāyāti ‘‘evamesa paresu hirottappenāpi āyatiṃ saṃvaraṃ āpajjissatī’’ti āyatiṃ saṃvaratthāya. Āpattīnañca kulānañca pariyantaṃ katvā vā akatvā vāti ‘‘ettakā āpattiyo ārocetabbā, ettakesu kulesu ārocetabbā’’ti evaṃ āpattīnañca kulānañca pariyantaṃ katvā vā akatvā vā.
အဒုဋ္ဌုလ္လာယာတိ ပာရာဇိကသင္ဃာဒိသေသံ ဌပေတ္ဝာ အဝသေသပဉ္စာပတ္တိက္ခန္ဓသင္ခာတာယ အဒုဋ္ဌုလ္လာယ အာပတ္တိယာ။ အဝသေသေ ဆ အာပတ္တိက္ခန္ဓေတိ သင္ဃာဒိသေသဝဇ္ဇိတေ သေသေ ဆ အာပတ္တိက္ခန္ဓေ။ ပုရိမပဉ္စသိက္ခာပဒဝီတိက္ကမသင္ခာတံ ဒုဋ္ဌုလ္လန္တိ ပာဏာတိပာတဝေရမဏိအာဒိကသ္သ အာဒိတော ပဉ္စသိက္ခာပဒသ္သ ဝီတိက္ကမသင္ခာတံ ဒုဋ္ဌုလ္လံ။ ဣတရံ အဒုဋ္ဌုလ္လံ ဝာ အဇ္ဈာစာရန္တိ တတော အညံ ဝိကာလဘောဇနာဒိကပဉ္စကံ, သုက္ကဝိသဋ္ဌိကာယသံသဂ္ဂဒုဋ္ဌုလ္လအတ္တကာမဉ္စေတိ အဒုဋ္ဌုလ္လံ ဝာ အဇ္ဈာစာရံ။ ဝတ္ထုမတ္တန္တိ ‘‘အယံ သုက္ကဝိသ္သဋ္ဌိံ အာပန္နော, ဒုဋ္ဌုလ္လံ, အတ္တကာမံ, ကာယသံသဂ္ဂံ အာပန္နော’’တိ ဧဝံ ဝတ္ထုမတ္တံ ဝာ အာရောစေန္တသ္သ။ အာပတ္တိမတ္တန္တိ ‘‘အယံ ပာရာဇိကံ အာပန္နော, သင္ဃာဒိသေသံ, ထုလ္လစ္စယံ, ပာစိတ္တိယံ, ပာဋိဒေသနီယံ, ဒုက္ကဋံ, ဒုဗ္ဘာသိတံ အာပန္နော’’တိ ဧဝံ အာပတ္တိမတ္တံ ဝာ အာရောစေန္တသ္သ။ ဝုတ္တလက္ခဏသ္သာတိ ‘‘ပာရာဇိကံ အနဇ္ဈာပန္နသ္သာ’’တိ ကင္ခာ. အဋ္ဌ. ဒုဋ္ဌုလ္လာရောစနသိက္ခာပဒဝဏ္ဏနာ) ဧဝံ ဝုတ္တလက္ခဏသ္သ။ သဝတ္ထုကောတိ ဝတ္ထုနာ သဟ ဃဋိတော။
Aduṭṭhullāyāti pārājikasaṅghādisesaṃ ṭhapetvā avasesapañcāpattikkhandhasaṅkhātāya aduṭṭhullāya āpattiyā. Avasese cha āpattikkhandheti saṅghādisesavajjite sese cha āpattikkhandhe. Purimapañcasikkhāpadavītikkamasaṅkhātaṃ duṭṭhullanti pāṇātipātaveramaṇiādikassa ādito pañcasikkhāpadassa vītikkamasaṅkhātaṃ duṭṭhullaṃ. Itaraṃ aduṭṭhullaṃ vā ajjhācāranti tato aññaṃ vikālabhojanādikapañcakaṃ, sukkavisaṭṭhikāyasaṃsaggaduṭṭhullaattakāmañceti aduṭṭhullaṃ vā ajjhācāraṃ. Vatthumattanti ‘‘ayaṃ sukkavissaṭṭhiṃ āpanno, duṭṭhullaṃ, attakāmaṃ, kāyasaṃsaggaṃ āpanno’’ti evaṃ vatthumattaṃ vā ārocentassa. Āpattimattanti ‘‘ayaṃ pārājikaṃ āpanno, saṅghādisesaṃ, thullaccayaṃ, pācittiyaṃ, pāṭidesanīyaṃ, dukkaṭaṃ, dubbhāsitaṃ āpanno’’ti evaṃ āpattimattaṃ vā ārocentassa. Vuttalakkhaṇassāti ‘‘pārājikaṃ anajjhāpannassā’’ti kaṅkhā. aṭṭha. duṭṭhullārocanasikkhāpadavaṇṇanā) evaṃ vuttalakkhaṇassa. Savatthukoti vatthunā saha ghaṭito.
ဒုဋ္ဌုလ္လာရောစနသိက္ခာပဒဝဏ္ဏနာ နိဋ္ဌိတာ။
Duṭṭhullārocanasikkhāpadavaṇṇanā niṭṭhitā.
