| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
៣. ទុដ្ឋដ្ឋកសុត្តំ
3. Duṭṭhaṭṭhakasuttaṃ
៧៨៦.
786.
វទន្តិ វេ ទុដ្ឋមនាបិ ឯកេ, អថោបិ វេ សច្ចមនា វទន្តិ;
Vadanti ve duṭṭhamanāpi eke, athopi ve saccamanā vadanti;
វាទញ្ច ជាតំ មុនិ នោ ឧបេតិ, តស្មា មុនី នត្ថិ ខិលោ កុហិញ្ចិ។
Vādañca jātaṃ muni no upeti, tasmā munī natthi khilo kuhiñci.
៧៨៧.
787.
សកញ្ហិ ទិដ្ឋិំ កថមច្ចយេយ្យ, ឆន្ទានុនីតោ រុចិយា និវិដ្ឋោ;
Sakañhi diṭṭhiṃ kathamaccayeyya, chandānunīto ruciyā niviṭṭho;
សយំ សមត្តានិ បកុព្ពមានោ, យថា ហិ ជានេយ្យ តថា វទេយ្យ។
Sayaṃ samattāni pakubbamāno, yathā hi jāneyya tathā vadeyya.
៧៨៨.
788.
អនរិយធម្មំ កុសលា តមាហុ, យោ អាតុមានំ សយមេវ បាវ។
Anariyadhammaṃ kusalā tamāhu, yo ātumānaṃ sayameva pāva.
៧៨៩.
789.
សន្តោ ច ភិក្ខុ អភិនិព្ពុតត្តោ, ឥតិហន្តិ សីលេសុ អកត្ថមានោ;
Santo ca bhikkhu abhinibbutatto, itihanti sīlesu akatthamāno;
តមរិយធម្មំ កុសលា វទន្តិ, យស្សុស្សទា នត្ថិ កុហិញ្ចិ លោកេ។
Tamariyadhammaṃ kusalā vadanti, yassussadā natthi kuhiñci loke.
៧៩០.
790.
បកប្បិតា សង្ខតា យស្ស ធម្មា, បុរក្ខតា 5 សន្តិ អវីវទាតា;
Pakappitā saṅkhatā yassa dhammā, purakkhatā 6 santi avīvadātā;
យទត្តនិ បស្សតិ អានិសំសំ, តំ និស្សិតោ កុប្បបដិច្ច សន្តិំ។
Yadattani passati ānisaṃsaṃ, taṃ nissito kuppapaṭicca santiṃ.
៧៩១.
791.
ទិដ្ឋីនិវេសា ន ហិ ស្វាតិវត្តា, ធម្មេសុ និច្ឆេយ្យ សមុគ្គហីតំ;
Diṭṭhīnivesā na hi svātivattā, dhammesu niccheyya samuggahītaṃ;
តស្មា នរោ តេសុ និវេសនេសុ, និរស្សតី អាទិយតី ច ធម្មំ។
Tasmā naro tesu nivesanesu, nirassatī ādiyatī ca dhammaṃ.
៧៩២.
792.
ធោនស្ស ហិ នត្ថិ កុហិញ្ចិ លោកេ, បកប្បិតា ទិដ្ឋិ ភវាភវេសុ;
Dhonassa hi natthi kuhiñci loke, pakappitā diṭṭhi bhavābhavesu;
មាយញ្ច មានញ្ច បហាយ ធោនោ, ស កេន គច្ឆេយ្យ អនូបយោ សោ។
Māyañca mānañca pahāya dhono, sa kena gaccheyya anūpayo so.
៧៩៣.
793.
ឧបយោ ហិ ធម្មេសុ ឧបេតិ វាទំ, អនូបយំ កេន កថំ វទេយ្យ;
Upayo hi dhammesu upeti vādaṃ, anūpayaṃ kena kathaṃ vadeyya;
អត្តា និរត្តា 7 ន ហិ តស្ស អត្ថិ, អធោសិ សោ ទិដ្ឋិមិធេវ សព្ពន្តិ។
Attā nirattā 8 na hi tassa atthi, adhosi so diṭṭhimidheva sabbanti.
ទុដ្ឋដ្ឋកសុត្តំ តតិយំ និដ្ឋិតំ។
Duṭṭhaṭṭhakasuttaṃ tatiyaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ៣. ទុដ្ឋដ្ឋកសុត្តវណ្ណនា • 3. Duṭṭhaṭṭhakasuttavaṇṇanā
