| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. দুতিযৰেদনানানত্তসুত্তং
5. Dutiyavedanānānattasuttaṃ
৮৯. সাৰত্থিযং ৰিহরতি…পে॰… ‘‘ধাতুনানত্তং, ভিক্খৰে, পটিচ্চ উপ্পজ্জতি ফস্সনানত্তং, ফস্সনানত্তং পটিচ্চ উপ্পজ্জতি ৰেদনানানত্তং, নো ৰেদনানানত্তং পটিচ্চ উপ্পজ্জতি ফস্সনানত্তং, নো ফস্সনানত্তং পটিচ্চ উপ্পজ্জতি ধাতুনানত্তং। কতমঞ্চ, ভিক্খৰে, ধাতুনানত্তং? চক্খুধাতু…পে॰… মনোধাতু – ইদং ৰুচ্চতি, ভিক্খৰে, ধাতুনানত্তং’’।
89. Sāvatthiyaṃ viharati…pe… ‘‘dhātunānattaṃ, bhikkhave, paṭicca uppajjati phassanānattaṃ, phassanānattaṃ paṭicca uppajjati vedanānānattaṃ, no vedanānānattaṃ paṭicca uppajjati phassanānattaṃ, no phassanānattaṃ paṭicca uppajjati dhātunānattaṃ. Katamañca, bhikkhave, dhātunānattaṃ? Cakkhudhātu…pe… manodhātu – idaṃ vuccati, bhikkhave, dhātunānattaṃ’’.
‘‘কথঞ্চ, ভিক্খৰে, ধাতুনানত্তং পটিচ্চ উপ্পজ্জতি ফস্সনানত্তং, ফস্সনানত্তং পটিচ্চ উপ্পজ্জতি ৰেদনানানত্তং, নো ৰেদনানানত্তং পটিচ্চ উপ্পজ্জতি ফস্সনানত্তং, নো ফস্সনানত্তং পটিচ্চ উপ্পজ্জতি ধাতুনানত্তং? চক্খুধাতুং, ভিক্খৰে, পটিচ্চ উপ্পজ্জতি চক্খুসম্ফস্সো, চক্খুসম্ফস্সং পটিচ্চ উপ্পজ্জতি চক্খুসম্ফস্সজা ৰেদনা, নো চক্খুসম্ফস্সজং ৰেদনং পটিচ্চ উপ্পজ্জতি চক্খুসম্ফস্সো, নো চক্খুসম্ফস্সং পটিচ্চ উপ্পজ্জতি চক্খুধাতু…পে॰… মনোধাতুং পটিচ্চ উপ্পজ্জতি মনোসম্ফস্সো, মনোসম্ফস্সং পটিচ্চ উপ্পজ্জতি মনোসম্ফস্সজা ৰেদনা, নো মনোসম্ফস্সজং ৰেদনং পটিচ্চ উপ্পজ্জতি মনোসম্ফস্সো, নো মনোসম্ফস্সং পটিচ্চ উপ্পজ্জতি মনোধাতু। এৰং খো, ভিক্খৰে, ধাতুনানত্তং পটিচ্চ উপ্পজ্জতি ফস্সনানত্তং, ফস্সনানত্তং পটিচ্চ উপ্পজ্জতি ৰেদনানানত্তং, নো ৰেদনানানত্তং পটিচ্চ উপ্পজ্জতি ফস্সনানত্তং, নো ফস্সনানত্তং পটিচ্চ উপ্পজ্জতি ধাতুনানত্ত’’ন্তি। পঞ্চমং।
‘‘Kathañca, bhikkhave, dhātunānattaṃ paṭicca uppajjati phassanānattaṃ, phassanānattaṃ paṭicca uppajjati vedanānānattaṃ, no vedanānānattaṃ paṭicca uppajjati phassanānattaṃ, no phassanānattaṃ paṭicca uppajjati dhātunānattaṃ? Cakkhudhātuṃ, bhikkhave, paṭicca uppajjati cakkhusamphasso, cakkhusamphassaṃ paṭicca uppajjati cakkhusamphassajā vedanā, no cakkhusamphassajaṃ vedanaṃ paṭicca uppajjati cakkhusamphasso, no cakkhusamphassaṃ paṭicca uppajjati cakkhudhātu…pe… manodhātuṃ paṭicca uppajjati manosamphasso, manosamphassaṃ paṭicca uppajjati manosamphassajā vedanā, no manosamphassajaṃ vedanaṃ paṭicca uppajjati manosamphasso, no manosamphassaṃ paṭicca uppajjati manodhātu. Evaṃ kho, bhikkhave, dhātunānattaṃ paṭicca uppajjati phassanānattaṃ, phassanānattaṃ paṭicca uppajjati vedanānānattaṃ, no vedanānānattaṃ paṭicca uppajjati phassanānattaṃ, no phassanānattaṃ paṭicca uppajjati dhātunānatta’’nti. Pañcamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. দুতিযৰেদনানানত্তসুত্তৰণ্ণনা • 5. Dutiyavedanānānattasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. দুতিযৰেদনানানত্তসুত্তৰণ্ণনা • 5. Dutiyavedanānānattasuttavaṇṇanā
