| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၁၀. ဒုတိယဝသသုတ္တံ
10. Dutiyavasasuttaṃ
၄၁. ‘‘သတ္တဟိ, ဘိက္ခဝေ, ဓမ္မေဟိ သမန္နာဂတော သာရိပုတ္တော စိတ္တံ ဝသေ ဝတ္တေတိ, နော စ သာရိပုတ္တော စိတ္တသ္သ ဝသေန ဝတ္တတိ။ ကတမေဟိ သတ္တဟိ? ဣဓ, ဘိက္ခဝေ, သာရိပုတ္တော သမာဓိကုသလော ဟောတိ, သမာဓိသ္သ သမာပတ္တိကုသလော, သမာဓိသ္သ ဌိတိကုသလော, သမာဓိသ္သ ဝုဋ္ဌာနကုသလော, သမာဓိသ္သ ကလ္ယာဏကုသလော, သမာဓိသ္သ ဂောစရကုသလော, သမာဓိသ္သ အဘိနီဟာရကုသလော ဟောတိ။ ဣမေဟိ ခော, ဘိက္ခဝေ , သတ္တဟိ ဓမ္မေဟိ သမန္နာဂတော သာရိပုတ္တော စိတ္တံ ဝသေ ဝတ္တေတိ, နော စ သာရိပုတ္တော စိတ္တသ္သ ဝသေန ဝတ္တတီ’’တိ။ ဒသမံ။
41. ‘‘Sattahi, bhikkhave, dhammehi samannāgato sāriputto cittaṃ vase vatteti, no ca sāriputto cittassa vasena vattati. Katamehi sattahi? Idha, bhikkhave, sāriputto samādhikusalo hoti, samādhissa samāpattikusalo, samādhissa ṭhitikusalo, samādhissa vuṭṭhānakusalo, samādhissa kalyāṇakusalo, samādhissa gocarakusalo, samādhissa abhinīhārakusalo hoti. Imehi kho, bhikkhave , sattahi dhammehi samannāgato sāriputto cittaṃ vase vatteti, no ca sāriputto cittassa vasena vattatī’’ti. Dasamaṃ.
Related texts:
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆-၁၁. ဒုတိယမိတ္တသုတ္တာဒိဝဏ္ဏနာ • 6-11. Dutiyamittasuttādivaṇṇanā
