| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೮. ದುತಿಯಸೂರಿಯಸುತ್ತಂ
8. Dutiyasūriyasuttaṃ
೧೧೦೮. ‘‘ಯಾವಕೀವಞ್ಚ , ಭಿಕ್ಖವೇ, ಚನ್ದಿಮಸೂರಿಯಾ ಲೋಕೇ ನುಪ್ಪಜ್ಜನ್ತಿ, ನೇವ ತಾವ ಮಹತೋ ಆಲೋಕಸ್ಸ ಪಾತುಭಾವೋ ಹೋತಿ ಮಹತೋ ಓಭಾಸಸ್ಸ। ಅನ್ಧತಮಂ ತದಾ ಹೋತಿ ಅನ್ಧಕಾರತಿಮಿಸಾ । ನೇವ ತಾವ ರತ್ತಿನ್ದಿವಾ 1 ಪಞ್ಞಾಯನ್ತಿ, ನ ಮಾಸದ್ಧಮಾಸಾ ಪಞ್ಞಾಯನ್ತಿ, ನ ಉತುಸಂವಚ್ಛರಾ ಪಞ್ಞಾಯನ್ತಿ।
1108. ‘‘Yāvakīvañca , bhikkhave, candimasūriyā loke nuppajjanti, neva tāva mahato ālokassa pātubhāvo hoti mahato obhāsassa. Andhatamaṃ tadā hoti andhakāratimisā . Neva tāva rattindivā 2 paññāyanti, na māsaddhamāsā paññāyanti, na utusaṃvaccharā paññāyanti.
‘‘ಯತೋ ಚ ಖೋ, ಭಿಕ್ಖವೇ, ಚನ್ದಿಮಸೂರಿಯಾ ಲೋಕೇ ಉಪ್ಪಜ್ಜನ್ತಿ, ಅಥ ಮಹತೋ ಆಲೋಕಸ್ಸ ಪಾತುಭಾವೋ ಹೋತಿ ಮಹತೋ ಓಭಾಸಸ್ಸ। ನೇವ ಅನ್ಧಕಾರತಮಂ ತದಾ ಹೋತಿ ನ ಅನ್ಧಕಾರತಿಮಿಸಾ। ಅಥ ರತ್ತಿನ್ದಿವಾ ಪಞ್ಞಾಯನ್ತಿ, ಮಾಸದ್ಧಮಾಸಾ ಪಞ್ಞಾಯನ್ತಿ, ಉತುಸಂವಚ್ಛರಾ ಪಞ್ಞಾಯನ್ತಿ। ಏವಮೇವ ಖೋ, ಭಿಕ್ಖವೇ, ಯಾವಕೀವಞ್ಚ ತಥಾಗತೋ ಲೋಕೇ ನುಪ್ಪಜ್ಜತಿ ಅರಹಂ ಸಮ್ಮಾಸಮ್ಬುದ್ಧೋ, ನೇವ ತಾವ ಮಹತೋ ಆಲೋಕಸ್ಸ ಪಾತುಭಾವೋ ಹೋತಿ ಮಹತೋ ಓಭಾಸಸ್ಸ। ಅನ್ಧತಮಂ ತದಾ ಹೋತಿ ಅನ್ಧಕಾರತಿಮಿಸಾ। ನೇವ ತಾವ ಚತುನ್ನಂ ಅರಿಯಸಚ್ಚಾನಂ ಆಚಿಕ್ಖಣಾ ಹೋತಿ ದೇಸನಾ ಪಞ್ಞಾಪನಾ ಪಟ್ಠಪನಾ ವಿವರಣಾ ವಿಭಜನಾ ಉತ್ತಾನೀಕಮ್ಮಂ।
‘‘Yato ca kho, bhikkhave, candimasūriyā loke uppajjanti, atha mahato ālokassa pātubhāvo hoti mahato obhāsassa. Neva andhakāratamaṃ tadā hoti na andhakāratimisā. Atha rattindivā paññāyanti, māsaddhamāsā paññāyanti, utusaṃvaccharā paññāyanti. Evameva kho, bhikkhave, yāvakīvañca tathāgato loke nuppajjati arahaṃ sammāsambuddho, neva tāva mahato ālokassa pātubhāvo hoti mahato obhāsassa. Andhatamaṃ tadā hoti andhakāratimisā. Neva tāva catunnaṃ ariyasaccānaṃ ācikkhaṇā hoti desanā paññāpanā paṭṭhapanā vivaraṇā vibhajanā uttānīkammaṃ.
‘‘ಯತೋ ಚ ಖೋ, ಭಿಕ್ಖವೇ, ತಥಾಗತೋ ಲೋಕೇ ಉಪ್ಪಜ್ಜತಿ ಅರಹಂ ಸಮ್ಮಾಸಮ್ಬುದ್ಧೋ, ಅಥ ಮಹತೋ ಆಲೋಕಸ್ಸ ಪಾತುಭಾವೋ ಹೋತಿ ಮಹತೋ ಓಭಾಸಸ್ಸ। ನೇವ ಅನ್ಧತಮಂ ತದಾ ಹೋತಿ ನ ಅನ್ಧಕಾರತಿಮಿಸಾ। ಅಥ ಖೋ ಚತುನ್ನಂ ಅರಿಯಸಚ್ಚಾನಂ ಆಚಿಕ್ಖಣಾ ಹೋತಿ ದೇಸನಾ ಪಞ್ಞಾಪನಾ ಪಟ್ಠಪನಾ ವಿವರಣಾ ವಿಭಜನಾ ಉತ್ತಾನೀಕಮ್ಮಂ। ಕತಮೇಸಂ ಚತುನ್ನಂ? ದುಕ್ಖಸ್ಸ ಅರಿಯಸಚ್ಚಸ್ಸ…ಪೇ॰… ದುಕ್ಖನಿರೋಧಗಾಮಿನಿಯಾ ಪಟಿಪದಾಯ ಅರಿಯಸಚ್ಚಸ್ಸ ।
‘‘Yato ca kho, bhikkhave, tathāgato loke uppajjati arahaṃ sammāsambuddho, atha mahato ālokassa pātubhāvo hoti mahato obhāsassa. Neva andhatamaṃ tadā hoti na andhakāratimisā. Atha kho catunnaṃ ariyasaccānaṃ ācikkhaṇā hoti desanā paññāpanā paṭṭhapanā vivaraṇā vibhajanā uttānīkammaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa .
‘‘ತಸ್ಮಾತಿಹ, ಭಿಕ್ಖವೇ, ‘ಇದಂ ದುಕ್ಖ’ನ್ತಿ ಯೋಗೋ ಕರಣೀಯೋ…ಪೇ॰… ‘ಅಯಂ ದುಕ್ಖನಿರೋಧಗಾಮಿನೀ ಪಟಿಪದಾ’ತಿ ಯೋಗೋ ಕರಣೀಯೋ’’ತಿ। ಅಟ್ಠಮಂ।
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Aṭṭhamaṃ.
Footnotes:
