| Library / Tipiṭaka / തിപിടക • Tipiṭaka / മഹാവിഭങ്ഗ-അട്ഠകഥാ • Mahāvibhaṅga-aṭṭhakathā |
൬. ദുതിയസഹസേയ്യസിക്ഖാപദവണ്ണനാ
6. Dutiyasahaseyyasikkhāpadavaṇṇanā
൫൫. ദുതിയസഹസേയ്യസിക്ഖാപദേ – ആവസഥാഗാരന്തി ആഗന്തുകാനം വസനാഗാരം. പഞ്ഞത്തം ഹോതീതി പുഞ്ഞകാമതായ കത്വാ ഠപിതം ഹോതി. യേന സാ ഇത്ഥീ തേനുപസങ്കമീതി അസുകസ്മിം നാമ ഠാനേ ആവസഥാഗാരം പഞ്ഞത്തം അത്ഥീതി മനുസ്സാനം സുത്വാ ഉപസങ്കമി. ഗന്ധഗന്ധിനീതി അഗരുകുങ്കുമാദീനം ഗന്ധാനം ഗന്ധോ ഗന്ധഗന്ധോ, സോ അസ്സാ അത്ഥീതി ഗന്ധഗന്ധിനീ. സാടകം നിക്ഖിപിത്വാതി അപ്പേവ നാമസ്സ ഇമമ്പി വിപ്പകാരം പസ്സന്തസ്സ രാഗോ ഉപ്പജ്ജേയ്യാതി ചിന്തേത്വാ ഏവമകാസി. ഓക്ഖിപിത്വാതി അധോ ഖിപിത്വാ. അച്ചയോതി അപരാധോ. മം അച്ചഗമാതി മം അതിക്കമ്മ അഭിഭവിത്വാ പവത്തോ. സേസം പഠമസിക്ഖാപദേ വുത്തനയേനേവ വേദിതബ്ബം. അയമേവ ഹി വിസേസോ – പഠമസിക്ഖാപദേ ചതുത്ഥദിവസേ ആപത്തി ഇധ പഠമദിവസേപി. യക്ഖീപേതീഹി ദിസ്സമാനകരൂപാഹി തിരച്ഛാനഗതിത്ഥിയാ ച മേഥുനധമ്മവത്ഥുഭൂതായ ഏവ ദുക്കടം. സേസാഹി അനാപത്തി. സമുട്ഠാനാദീനി പഠമസദിസാനേവാതി.
55. Dutiyasahaseyyasikkhāpade – āvasathāgāranti āgantukānaṃ vasanāgāraṃ. Paññattaṃ hotīti puññakāmatāya katvā ṭhapitaṃ hoti. Yena sā itthī tenupasaṅkamīti asukasmiṃ nāma ṭhāne āvasathāgāraṃ paññattaṃ atthīti manussānaṃ sutvā upasaṅkami. Gandhagandhinīti agarukuṅkumādīnaṃ gandhānaṃ gandho gandhagandho, so assā atthīti gandhagandhinī. Sāṭakaṃ nikkhipitvāti appeva nāmassa imampi vippakāraṃ passantassa rāgo uppajjeyyāti cintetvā evamakāsi. Okkhipitvāti adho khipitvā. Accayoti aparādho. Maṃ accagamāti maṃ atikkamma abhibhavitvā pavatto. Sesaṃ paṭhamasikkhāpade vuttanayeneva veditabbaṃ. Ayameva hi viseso – paṭhamasikkhāpade catutthadivase āpatti idha paṭhamadivasepi. Yakkhīpetīhi dissamānakarūpāhi tiracchānagatitthiyā ca methunadhammavatthubhūtāya eva dukkaṭaṃ. Sesāhi anāpatti. Samuṭṭhānādīni paṭhamasadisānevāti.
ദുതിയസഹസേയ്യസിക്ഖാപദം ഛട്ഠം.
Dutiyasahaseyyasikkhāpadaṃ chaṭṭhaṃ.
Related texts:
തിപിടക (മൂല) • Tipiṭaka (Mūla) / വിനയപിടക • Vinayapiṭaka / മഹാവിഭങ്ഗ • Mahāvibhaṅga / ൧. മുസാവാദവഗ്ഗോ • 1. Musāvādavaggo
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / സാരത്ഥദീപനീ-ടീകാ • Sāratthadīpanī-ṭīkā / ൬. ദുതിയസഹസേയ്യസിക്ഖാപദവണ്ണനാ • 6. Dutiyasahaseyyasikkhāpadavaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വജിരബുദ്ധി-ടീകാ • Vajirabuddhi-ṭīkā / ൬. ദുതിയസഹസേയ്യസിക്ഖാപദവണ്ണനാ • 6. Dutiyasahaseyyasikkhāpadavaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വിമതിവിനോദനീ-ടീകാ • Vimativinodanī-ṭīkā / ൬. ദുതിയസഹസേയ്യസിക്ഖാപദവണ്ണനാ • 6. Dutiyasahaseyyasikkhāpadavaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / പാചിത്യാദിയോജനാപാളി • Pācityādiyojanāpāḷi / ൬. ദുതിയസഹസേയ്യസിക്ഖാപദം • 6. Dutiyasahaseyyasikkhāpadaṃ
