| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၄. ဒုတိယပဋိပဒာသုတ္တံ
4. Dutiyapaṭipadāsuttaṃ
၂၄. သာဝတ္ထိနိဒာနံ။ ‘‘ဂိဟိနော ဝာဟံ, ဘိက္ခဝေ, ပဗ္ဗဇိတသ္သ ဝာ မိစ္ဆာပဋိပဒံ န ဝဏ္ဏေမိ။ ဂိဟိ ဝာ, ဘိက္ခဝေ, ပဗ္ဗဇိတော ဝာ မိစ္ဆာပဋိပန္နော မိစ္ဆာပဋိပတ္တာဓိကရဏဟေတု နာရာဓကော ဟောတိ ဉာယံ ဓမ္မံ ကုသလံ’’။
24. Sāvatthinidānaṃ. ‘‘Gihino vāhaṃ, bhikkhave, pabbajitassa vā micchāpaṭipadaṃ na vaṇṇemi. Gihi vā, bhikkhave, pabbajito vā micchāpaṭipanno micchāpaṭipattādhikaraṇahetu nārādhako hoti ñāyaṃ dhammaṃ kusalaṃ’’.
‘‘ကတမာ စ, ဘိက္ခဝေ, မိစ္ဆာပဋိပဒာ? သေယ္ယထိဒံ – မိစ္ဆာဒိဋ္ဌိ။ပေ.။ မိစ္ဆာသမာဓိ။ အယံ ဝုစ္စတိ, ဘိက္ခဝေ, မိစ္ဆာပဋိပဒာ။ ဂိဟိနော ဝာဟံ, ဘိက္ခဝေ, ပဗ္ဗဇိတသ္သ ဝာ မိစ္ဆာပဋိပဒံ န ဝဏ္ဏေမိ။ ဂိဟိ ဝာ, ဘိက္ခဝေ, ပဗ္ဗဇိတော ဝာ မိစ္ဆာပဋိပန္နော မိစ္ဆာပဋိပတ္တာဓိကရဏဟေတု နာရာဓကော ဟောတိ ဉာယံ ဓမ္မံ ကုသလံ။
‘‘Katamā ca, bhikkhave, micchāpaṭipadā? Seyyathidaṃ – micchādiṭṭhi…pe… micchāsamādhi. Ayaṃ vuccati, bhikkhave, micchāpaṭipadā. Gihino vāhaṃ, bhikkhave, pabbajitassa vā micchāpaṭipadaṃ na vaṇṇemi. Gihi vā, bhikkhave, pabbajito vā micchāpaṭipanno micchāpaṭipattādhikaraṇahetu nārādhako hoti ñāyaṃ dhammaṃ kusalaṃ.
‘‘ဂိဟိနော ဝာဟံ, ဘိက္ခဝေ, ပဗ္ဗဇိတသ္သ ဝာ သမ္မာပဋိပဒံ ဝဏ္ဏေမိ။ ဂိဟိ ဝာ, ဘိက္ခဝေ, ပဗ္ဗဇိတော ဝာ သမ္မာပဋိပန္နော သမ္မာပဋိပတ္တာဓိကရဏဟေတု အာရာဓကော ဟောတိ ဉာယံ ဓမ္မံ ကုသလံ။ ကတမာ စ, ဘိက္ခဝေ, သမ္မာပဋိပဒာ? သေယ္ယထိဒံ – သမ္မာဒိဋ္ဌိ။ပေ.။ သမ္မာသမာဓိ။ အယံ ဝုစ္စတိ, ဘိက္ခဝေ, သမ္မာပဋိပဒာ။ ဂိဟိနော ဝာဟံ, ဘိက္ခဝေ, ပဗ္ဗဇိတသ္သ ဝာ သမ္မာပဋိပဒံ ဝဏ္ဏေမိ။ ဂိဟိ ဝာ, ဘိက္ခဝေ , ပဗ္ဗဇိတော ဝာ သမ္မာပဋိပန္နော သမ္မာပဋိပတ္တာဓိကရဏဟေတု အာရာဓကော ဟောတိ ဉာယံ ဓမ္မံ ကုသလ’’န္တိ။ စတုတ္ထံ။
‘‘Gihino vāhaṃ, bhikkhave, pabbajitassa vā sammāpaṭipadaṃ vaṇṇemi. Gihi vā, bhikkhave, pabbajito vā sammāpaṭipanno sammāpaṭipattādhikaraṇahetu ārādhako hoti ñāyaṃ dhammaṃ kusalaṃ. Katamā ca, bhikkhave, sammāpaṭipadā? Seyyathidaṃ – sammādiṭṭhi…pe… sammāsamādhi. Ayaṃ vuccati, bhikkhave, sammāpaṭipadā. Gihino vāhaṃ, bhikkhave, pabbajitassa vā sammāpaṭipadaṃ vaṇṇemi. Gihi vā, bhikkhave , pabbajito vā sammāpaṭipanno sammāpaṭipattādhikaraṇahetu ārādhako hoti ñāyaṃ dhammaṃ kusala’’nti. Catutthaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၃. မိစ္ဆတ္တဝဂ္ဂဝဏ္ဏနာ • 3. Micchattavaggavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၃. မိစ္ဆတ္တဝဂ္ဂဝဏ္ဏနာ • 3. Micchattavaggavaṇṇanā
