| Library / Tipiṭaka / तिपिटक • Tipiṭaka / विमानवत्थुपाळि • Vimānavatthupāḷi |
१२. दुतियपतिब्बताविमानवत्थु
12. Dutiyapatibbatāvimānavatthu
१०१.
101.
‘‘वेळुरियथम्भं रुचिरं पभस्सरं, विमानमारुय्ह अनेकचित्तं।
‘‘Veḷuriyathambhaṃ ruciraṃ pabhassaraṃ, vimānamāruyha anekacittaṃ;
तत्थच्छसि देवि महानुभावे, उच्चावचा इद्धि विकुब्बमाना।
Tatthacchasi devi mahānubhāve, uccāvacā iddhi vikubbamānā;
इमा च ते अच्छरायो समन्ततो, नच्चन्ति गायन्ति पमोदयन्ति च॥
Imā ca te accharāyo samantato, naccanti gāyanti pamodayanti ca.
१०२.
102.
‘‘देविद्धिपत्तासि महानुभावे, मनुस्सभूता किमकासि पुञ्ञं।
‘‘Deviddhipattāsi mahānubhāve, manussabhūtā kimakāsi puññaṃ;
केनासि एवं जलितानुभावा, वण्णो च ते सब्बदिसा पभासती’’ति॥
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
१०३.
103.
सा देवता अत्तमना, मोग्गल्लानेन पुच्छिता।
Sā devatā attamanā, moggallānena pucchitā;
पञ्हं पुट्ठा वियाकासि, यस्स कम्मस्सिदं फलं॥
Pañhaṃ puṭṭhā viyākāsi, yassa kammassidaṃ phalaṃ.
१०४.
104.
‘‘अहं मनुस्सेसु मनुस्सभूता, उपासिका चक्खुमतो अहोसिं।
‘‘Ahaṃ manussesu manussabhūtā, upāsikā cakkhumato ahosiṃ;
पाणातिपाता विरता अहोसिं, लोके अदिन्नं परिवज्जयिस्सं॥
Pāṇātipātā viratā ahosiṃ, loke adinnaṃ parivajjayissaṃ.
१०५.
105.
अन्नञ्च पानञ्च पसन्नचित्ता, सक्कच्च दानं विपुलं अदासिं॥
Annañca pānañca pasannacittā, sakkacca dānaṃ vipulaṃ adāsiṃ.
१०६.
106.
‘‘तेन मेतादिसो वण्णो, तेन मे इध मिज्झति।
‘‘Tena metādiso vaṇṇo, tena me idha mijjhati;
उप्पज्जन्ति च मे भोगा, ये केचि मनसो पिया॥
Uppajjanti ca me bhogā, ye keci manaso piyā.
१०७.
107.
‘‘अक्खामि ते भिक्खु महानुभाव, मनुस्सभूता यमकासि पुञ्ञं।
‘‘Akkhāmi te bhikkhu mahānubhāva, manussabhūtā yamakāsi puññaṃ;
तेनम्हि एवं जलितानुभावा, वण्णो च मे सब्बदिसा पभासती’’ति॥
Tenamhi evaṃ jalitānubhāvā, vaṇṇo ca me sabbadisā pabhāsatī’’ti.
दुतियपतिब्बताविमानं द्वादसमं।
Dutiyapatibbatāvimānaṃ dvādasamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / विमानवत्थु-अट्ठकथा • Vimānavatthu-aṭṭhakathā / १२. दुतियपतिब्बताविमानवण्णना • 12. Dutiyapatibbatāvimānavaṇṇanā
