| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၂. ဒုတိယပရိမဏ္ဍလသိက္ခာပဒဝဏ္ဏနာ
2. Dutiyaparimaṇḍalasikkhāpadavaṇṇanā
ပဋိက္ခိတ္တံ ဂိဟိပာရုတန္တိ ခုဒ္ဒကဝတ္ထုခန္ဓကေ ပဋိက္ခိတ္တံ ဂိဟိပာရုတံ။ ဣဒာနိ ‘‘န, ဘိက္ခဝေ’’တိအာဒိနာ (စူဠဝ. ၂၈၀-၂၈၁) သင္ခေပေန ဝုတ္တမတ္ထမေဝ ဝိတ္ထာရေတ္ဝာ ဒသ္သေတုံ ‘‘တတ္ထာ’’တိအာဒိမာဟ။ ယံ ကိဉ္စိ အညထာ ပာရုတန္တိ သမ္ဗန္ဓော။ တသ္မာတိ ယသ္မာ သေတပဋပာရုတာဒိ ဂိဟိပာရုတံ နာမ, တသ္မာ။ သေတပဋာတိ ဧတသ္သေဝ ဝိဝရဏံ။ အဍ္ဎပာလကနိဂဏ္ဌာတိ အဍ္ဎံ ပာလေန္တီတိ အဍ္ဎပာလကာ, အဍ္ဎပာလကာ စ တေ နိဂဏ္ဌာ စာတိ အဍ္ဎပာလကနိဂဏ္ဌာ။ တေ ဟိ ဥပရိ ဧကမေဝ သေတဝတ္ထံ ဥပကစ္ဆကေ ပဝေသေတ္ဝာ ပရိဒဟန္တိ, ဟေဋ္ဌာ နဂ္ဂာပိ အဍ္ဎမေဝ ပာလေန္တိ။ ပရိဗ္ဗာဇကာတိ ဂိဟိဗန္ဓနံ ပဟာယ ပဗ္ဗဇ္ဇူပဂတာ။ ဥရံ ဝိဝရိတ္ဝာတိ ဟဒယမဇ္ဈံ ဝိဝရိတ္ဝာ။ အက္ခိတာရကာမတ္တန္တိ အက္ခိမတ္တံ။ အာရာမေ ဝာတိ ဗုဒ္ဓူပဋ္ဌာနာဒိကာလံ သန္ဓာယ ဝုတ္တံ။ အန္တရဃရေ ဝာတိ အန္တရေ ဃရာနိ ဧတ္ထ, ဧတသ္သာတိ ဝာ ‘‘အန္တရဃရ’’န္တိ လဒ္ဓနာမေ ဂာမေ။
Paṭikkhittaṃgihipārutanti khuddakavatthukhandhake paṭikkhittaṃ gihipārutaṃ. Idāni ‘‘na, bhikkhave’’tiādinā (cūḷava. 280-281) saṅkhepena vuttamatthameva vitthāretvā dassetuṃ ‘‘tatthā’’tiādimāha. Yaṃ kiñci aññathā pārutanti sambandho. Tasmāti yasmā setapaṭapārutādi gihipārutaṃ nāma, tasmā. Setapaṭāti etasseva vivaraṇaṃ. Aḍḍhapālakanigaṇṭhāti aḍḍhaṃ pālentīti aḍḍhapālakā, aḍḍhapālakā ca te nigaṇṭhā cāti aḍḍhapālakanigaṇṭhā. Te hi upari ekameva setavatthaṃ upakacchake pavesetvā paridahanti, heṭṭhā naggāpi aḍḍhameva pālenti. Paribbājakāti gihibandhanaṃ pahāya pabbajjūpagatā. Uraṃ vivaritvāti hadayamajjhaṃ vivaritvā. Akkhitārakāmattanti akkhimattaṃ. Ārāme vāti buddhūpaṭṭhānādikālaṃ sandhāya vuttaṃ. Antaraghare vāti antare gharāni ettha, etassāti vā ‘‘antaraghara’’nti laddhanāme gāme.
ဒုတိယပရိမဏ္ဍလသိက္ခာပဒဝဏ္ဏနာ နိဋ္ဌိတာ။
Dutiyaparimaṇḍalasikkhāpadavaṇṇanā niṭṭhitā.
