| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১০. দুতিযপাপণিকসুত্তং
10. Dutiyapāpaṇikasuttaṃ
২০. ‘‘তীহি , ভিক্খৰে, অঙ্গেহি সমন্নাগতো পাপণিকো নচিরস্সেৰ মহত্তং ৰেপুল্লত্তং 1 পাপুণাতি ভোগেসু। কতমেহি তীহি? ইধ, ভিক্খৰে, পাপণিকো চক্খুমা চ হোতি ৰিধুরো চ নিস্সযসম্পন্নো চ। কথঞ্চ, ভিক্খৰে, পাপণিকো চক্খুমা হোতি? ইধ, ভিক্খৰে, পাপণিকো পণিযং জানাতি – ‘ইদং পণিযং এৰং কীতং, এৰং ৰিক্কযমানং 2, এত্তকং মূলং ভৰিস্সতি, এত্তকো উদযো’তি 3। এৰং খো, ভিক্খৰে, পাপণিকো চক্খুমা হোতি।
20. ‘‘Tīhi , bhikkhave, aṅgehi samannāgato pāpaṇiko nacirasseva mahattaṃ vepullattaṃ 4 pāpuṇāti bhogesu. Katamehi tīhi? Idha, bhikkhave, pāpaṇiko cakkhumā ca hoti vidhuro ca nissayasampanno ca. Kathañca, bhikkhave, pāpaṇiko cakkhumā hoti? Idha, bhikkhave, pāpaṇiko paṇiyaṃ jānāti – ‘idaṃ paṇiyaṃ evaṃ kītaṃ, evaṃ vikkayamānaṃ 5, ettakaṃ mūlaṃ bhavissati, ettako udayo’ti 6. Evaṃ kho, bhikkhave, pāpaṇiko cakkhumā hoti.
‘‘কথঞ্চ, ভিক্খৰে, পাপণিকো ৰিধুরো হোতি? ইধ, ভিক্খৰে, পাপণিকো কুসলো হোতি পণিযং কেতুঞ্চ ৰিক্কেতুঞ্চ। এৰং খো, ভিক্খৰে, পাপণিকো ৰিধুরো হোতি।
‘‘Kathañca, bhikkhave, pāpaṇiko vidhuro hoti? Idha, bhikkhave, pāpaṇiko kusalo hoti paṇiyaṃ ketuñca vikketuñca. Evaṃ kho, bhikkhave, pāpaṇiko vidhuro hoti.
‘‘কথঞ্চ, ভিক্খৰে, পাপণিকো নিস্সযসম্পন্নো হোতি? ইধ ভিক্খৰে , পাপণিকং যে তে গহপতী ৰা গহপতিপুত্তা ৰা অড্ঢা মহদ্ধনা মহাভোগা তে এৰং জানন্তি – ‘অযং খো ভৰং পাপণিকো চক্খুমা ৰিধুরো চ পটিবলো পুত্তদারঞ্চ পোসেতুং, অম্হাকঞ্চ কালেন কালং অনুপ্পদাতু’ন্তি। তে নং ভোগেহি নিপতন্তি – ‘ইতো, সম্ম পাপণিক, ভোগে করিত্ৰা 7 পুত্তদারঞ্চ পোসেহি, অম্হাকঞ্চ কালেন কালং অনুপ্পদেহী’তি। এৰং খো, ভিক্খৰে, পাপণিকো নিস্সযসম্পন্নো হোতি। ইমেহি খো, ভিক্খৰে, তীহি অঙ্গেহি সমন্নাগতো পাপণিকো নচিরস্সেৰ মহত্তং ৰেপুল্লত্তং পাপুণাতি ভোগেসু।
‘‘Kathañca, bhikkhave, pāpaṇiko nissayasampanno hoti? Idha bhikkhave , pāpaṇikaṃ ye te gahapatī vā gahapatiputtā vā aḍḍhā mahaddhanā mahābhogā te evaṃ jānanti – ‘ayaṃ kho bhavaṃ pāpaṇiko cakkhumā vidhuro ca paṭibalo puttadārañca posetuṃ, amhākañca kālena kālaṃ anuppadātu’nti. Te naṃ bhogehi nipatanti – ‘ito, samma pāpaṇika, bhoge karitvā 8 puttadārañca posehi, amhākañca kālena kālaṃ anuppadehī’ti. Evaṃ kho, bhikkhave, pāpaṇiko nissayasampanno hoti. Imehi kho, bhikkhave, tīhi aṅgehi samannāgato pāpaṇiko nacirasseva mahattaṃ vepullattaṃ pāpuṇāti bhogesu.
‘‘এৰমেৰং খো, ভিক্খৰে, তীহি ধম্মেহি সমন্নাগতো ভিক্খু নচিরস্সেৰ মহত্তং ৰেপুল্লত্তং পাপুণাতি কুসলেসু ধম্মেসু। কতমেহি তীহি? ইধ, ভিক্খৰে, ভিক্খু চক্খুমা চ হোতি ৰিধুরো চ নিস্সযসম্পন্নো চ। কথঞ্চ, ভিক্খৰে, ভিক্খু চক্খুমা হোতি? ইধ, ভিক্খৰে, ভিক্খু ‘ইদং দুক্খ’ন্তি যথাভূতং পজানাতি, ‘অযং দুক্খসমুদযো’তি যথাভূতং পজানাতি, ‘অযং দুক্খনিরোধো’তি যথাভূতং পজানাতি, ‘অযং দুক্খনিরোধগামিনী পটিপদা’তি যথাভূতং পজানাতি। এৰং খো, ভিক্খৰে, ভিক্খু চক্খুমা হোতি।
‘‘Evamevaṃ kho, bhikkhave, tīhi dhammehi samannāgato bhikkhu nacirasseva mahattaṃ vepullattaṃ pāpuṇāti kusalesu dhammesu. Katamehi tīhi? Idha, bhikkhave, bhikkhu cakkhumā ca hoti vidhuro ca nissayasampanno ca. Kathañca, bhikkhave, bhikkhu cakkhumā hoti? Idha, bhikkhave, bhikkhu ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti. Evaṃ kho, bhikkhave, bhikkhu cakkhumā hoti.
‘‘কথঞ্চ, ভিক্খৰে, ভিক্খু ৰিধুরো হোতি? ইধ, ভিক্খৰে, ভিক্খু আরদ্ধৰীরিযো ৰিহরতি অকুসলানং ধম্মানং পহানায, কুসলানং ধম্মানং উপসম্পদায, থামৰা দল়্হপরক্কমো অনিক্খিত্তধুরো কুসলেসু ধম্মেসু। এৰং খো, ভিক্খৰে, ভিক্খু ৰিধুরো হোতি।
‘‘Kathañca, bhikkhave, bhikkhu vidhuro hoti? Idha, bhikkhave, bhikkhu āraddhavīriyo viharati akusalānaṃ dhammānaṃ pahānāya, kusalānaṃ dhammānaṃ upasampadāya, thāmavā daḷhaparakkamo anikkhittadhuro kusalesu dhammesu. Evaṃ kho, bhikkhave, bhikkhu vidhuro hoti.
‘‘কথঞ্চ, ভিক্খৰে, ভিক্খু নিস্সযসম্পন্নো হোতি? ইধ, ভিক্খৰে, ভিক্খু যে তে ভিক্খূ বহুস্সুতা আগতাগমা ধম্মধরা ৰিনযধরা মাতিকাধরা তে কালেন কালং উপসঙ্কমিত্ৰা পরিপুচ্ছতি পরিপঞ্হতি – ‘ইদং, ভন্তে, কথং, ইমস্স কো অত্থো’তি? তস্স তে আযস্মন্তো অৰিৰটঞ্চেৰ ৰিৰরন্তি, অনুত্তানীকতঞ্চ উত্তানীকরোন্তি, অনেকৰিহিতেসু চ কঙ্খাঠানিযেসু ধম্মেসু কঙ্খং পটিৰিনোদেন্তি। এৰং খো, ভিক্খৰে, ভিক্খু নিস্সযসম্পন্নো হোতি। ইমেহি খো, ভিক্খৰে, তীহি ধম্মেহি সমন্নাগতো ভিক্খু নচিরস্সেৰ মহত্তং ৰেপুল্লত্তং পাপুণাতি কুসলেসু ধম্মেসূ’’তি। দসমং।
‘‘Kathañca, bhikkhave, bhikkhu nissayasampanno hoti? Idha, bhikkhave, bhikkhu ye te bhikkhū bahussutā āgatāgamā dhammadharā vinayadharā mātikādharā te kālena kālaṃ upasaṅkamitvā paripucchati paripañhati – ‘idaṃ, bhante, kathaṃ, imassa ko attho’ti? Tassa te āyasmanto avivaṭañceva vivaranti, anuttānīkatañca uttānīkaronti, anekavihitesu ca kaṅkhāṭhāniyesu dhammesu kaṅkhaṃ paṭivinodenti. Evaṃ kho, bhikkhave, bhikkhu nissayasampanno hoti. Imehi kho, bhikkhave, tīhi dhammehi samannāgato bhikkhu nacirasseva mahattaṃ vepullattaṃ pāpuṇāti kusalesu dhammesū’’ti. Dasamaṃ.
রথকারৰগ্গো দুতিযো।
Rathakāravaggo dutiyo.
পঠমভাণৰারো নিট্ঠিতো।
Paṭhamabhāṇavāro niṭṭhito.
তস্সুদ্দানং –
Tassuddānaṃ –
অপণ্ণকত্তা দেৰো চ, দুৰে পাপণিকেন চাতি॥
Apaṇṇakattā devo ca, duve pāpaṇikena cāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১০. দুতিযপাপণিকসুত্তৰণ্ণনা • 10. Dutiyapāpaṇikasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১০. দুতিযপাপণিকসুত্তৰণ্ণনা • 10. Dutiyapāpaṇikasuttavaṇṇanā
