| Library / Tipiṭaka / តិបិដក • Tipiṭaka / កង្ខាវិតរណី-បុរាណ-ដីកា • Kaṅkhāvitaraṇī-purāṇa-ṭīkā |
២. ទុតិយានិយតសិក្ខាបទវណ្ណនា
2. Dutiyāniyatasikkhāpadavaṇṇanā
សង្ឃាទិសេសេន វាតិ កាយសំសគ្គទុដ្ឋុល្លោភាសនេន។ តស្មា ឯវំ កាយសំសគ្គវារោ បាឡិយម្បិ វុត្តោ។ អនន្ធោ អពធិរោតិ អនន្ធោ កាយសំសគ្គំ បស្សតិ, អពធិរោ ទុដ្ឋុល្លំ សុណាតិ, តស្មា ឯវ អទិន្នាទានសទិសានេវាតិ វុត្ត’’ន្តិ លិខិតំ។ ឯត្ថ ច កាយវាចាចិត្តតោ សមុដ្ឋានំ កថន្តិ ចេ? កាយសំសគ្គញ្ហិ សមាបជ្ជន្តោ ទុដ្ឋុល្លម្បិ ភណតិ, ទុដ្ឋុល្លំ ភណន្តោ និសីទតិ ចាតិ សម្ភវតិ, ទុដ្ឋុល្លមេវ វា សន្ធាយ វុត្តំ។ តញ្ហិ អទិន្នាទានសមុដ្ឋានន្តិ។
Saṅghādisesenavāti kāyasaṃsaggaduṭṭhullobhāsanena. Tasmā evaṃ kāyasaṃsaggavāro pāḷiyampi vutto. Anandho abadhiroti anandho kāyasaṃsaggaṃ passati, abadhiro duṭṭhullaṃ suṇāti, tasmā eva adinnādānasadisānevāti vutta’’nti likhitaṃ. Ettha ca kāyavācācittato samuṭṭhānaṃ kathanti ce? Kāyasaṃsaggañhi samāpajjanto duṭṭhullampi bhaṇati, duṭṭhullaṃ bhaṇanto nisīdati cāti sambhavati, duṭṭhullameva vā sandhāya vuttaṃ. Tañhi adinnādānasamuṭṭhānanti.
យោ ទេសនំ សព្ពវិទូបមោវ;
Yo desanaṃ sabbavidūpamova;
នានានយាការវិចិត្តភេទំ;
Nānānayākāravicittabhedaṃ;
ញាតុំ ឧបាយាន មនោ សតិមា;
Ñātuṃ upāyāna mano satimā;
តំ លាភហេតុំ ន ករោតិ បុញ្ញន្តិ។
Taṃ lābhahetuṃ na karoti puññanti.
ទុតិយានិយតសិក្ខាបទវណ្ណនា និដ្ឋិតា។
Dutiyāniyatasikkhāpadavaṇṇanā niṭṭhitā.
អនិយតវណ្ណនា និដ្ឋិតា។
Aniyatavaṇṇanā niṭṭhitā.
