| Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi |
៩. ទុតិយនកុហនសុត្តំ
9. Dutiyanakuhanasuttaṃ
៣៦. វុត្តញ្ហេតំ ភគវតា, វុត្តមរហតាតិ មេ សុតំ –
36. Vuttañhetaṃ bhagavatā, vuttamarahatāti me sutaṃ –
‘‘នយិទំ, ភិក្ខវេ, ព្រហ្មចរិយំ វុស្សតិ ជនកុហនត្ថំ, ន ជនលបនត្ថំ, ន លាភសក្ការសិលោកានិសំសត្ថំ, ន ‘ឥតិ មំ ជនោ ជានាតូ’តិ។ អថ ខោ ឥទំ, ភិក្ខវេ, ព្រហ្មចរិយំ វុស្សតិ អភិញ្ញត្ថញ្ចេវ បរិញ្ញត្ថញ្ចា’’តិ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –
‘‘Nayidaṃ, bhikkhave, brahmacariyaṃ vussati janakuhanatthaṃ, na janalapanatthaṃ, na lābhasakkārasilokānisaṃsatthaṃ, na ‘iti maṃ jano jānātū’ti. Atha kho idaṃ, bhikkhave, brahmacariyaṃ vussati abhiññatthañceva pariññatthañcā’’ti. Etamatthaṃ bhagavā avoca. Tatthetaṃ iti vuccati –
‘‘អភិញ្ញត្ថំ បរិញ្ញត្ថំ, ព្រហ្មចរិយំ អនីតិហំ;
‘‘Abhiññatthaṃ pariññatthaṃ, brahmacariyaṃ anītihaṃ;
អទេសយិ សោ ភគវា, និព្ពានោគធគាមិនំ។
Adesayi so bhagavā, nibbānogadhagāminaṃ.
‘‘ឯស មគ្គោ មហត្តេហិ, អនុយាតោ មហេសិភិ;
‘‘Esa maggo mahattehi, anuyāto mahesibhi;
យេ យេ តំ បដិបជ្ជន្តិ, យថា ពុទ្ធេន ទេសិតំ;
Ye ye taṃ paṭipajjanti, yathā buddhena desitaṃ;
ទុក្ខស្សន្តំ ករិស្សន្តិ, សត្ថុសាសនការិនោ’’តិ។
Dukkhassantaṃ karissanti, satthusāsanakārino’’ti.
អយម្បិ អត្ថោ វុត្តោ ភគវតា, ឥតិ មេ សុតន្តិ។ នវមំ។
Ayampi attho vutto bhagavatā, iti me sutanti. Navamaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ៩. ទុតិយនកុហនសុត្តវណ្ណនា • 9. Dutiyanakuhanasuttavaṇṇanā
