| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. দুতিযমারপাসসুত্তং
2. Dutiyamārapāsasuttaṃ
১১৫. ‘‘সন্তি, ভিক্খৰে, চক্খুৰিঞ্ঞেয্যা রূপা, ইট্ঠা কন্তা মনাপা পিযরূপা কামূপসংহিতা রজনীযা। তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি – অযং ৰুচ্চতি, ভিক্খৰে, ভিক্খু বদ্ধো চক্খুৰিঞ্ঞেয্যেসু রূপেসু, আৰাসগতো মারস্স, মারস্স ৰসং গতো, পটিমুক্কস্স মারপাসো। বদ্ধো সো মারবন্ধনেন যথাকামকরণীযো পাপিমতো…পে॰…।
115. ‘‘Santi, bhikkhave, cakkhuviññeyyā rūpā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati – ayaṃ vuccati, bhikkhave, bhikkhu baddho cakkhuviññeyyesu rūpesu, āvāsagato mārassa, mārassa vasaṃ gato, paṭimukkassa mārapāso. Baddho so mārabandhanena yathākāmakaraṇīyo pāpimato…pe….
‘‘সন্তি, ভিক্খৰে, জিৰ্হাৰিঞ্ঞেয্যা রসা…পে॰… সন্তি, ভিক্খৰে, মনোৰিঞ্ঞেয্যা ধম্মা, ইট্ঠা কন্তা মনাপা পিযরূপা কামূপসংহিতা রজনীযা। তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি – অযং ৰুচ্চতি, ভিক্খৰে, ভিক্খু বদ্ধো মনোৰিঞ্ঞেয্যেসু ধম্মেসু, আৰাসগতো মারস্স, মারস্স ৰসং গতো, পটিমুক্কস্স মারপাসো। বদ্ধো সো মারবন্ধনেন যথাকামকরণীযো পাপিমতো…পে॰…।
‘‘Santi, bhikkhave, jivhāviññeyyā rasā…pe… santi, bhikkhave, manoviññeyyā dhammā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati – ayaṃ vuccati, bhikkhave, bhikkhu baddho manoviññeyyesu dhammesu, āvāsagato mārassa, mārassa vasaṃ gato, paṭimukkassa mārapāso. Baddho so mārabandhanena yathākāmakaraṇīyo pāpimato…pe….
‘‘সন্তি চ খো, ভিক্খৰে, চক্খুৰিঞ্ঞেয্যা রূপা, ইট্ঠা কন্তা মনাপা পিযরূপা কামূপসংহিতা রজনীযা। তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি – অযং ৰুচ্চতি, ভিক্খৰে , ভিক্খু মুত্তো চক্খুৰিঞ্ঞেয্যেহি রূপেহি, নাৰাসগতো মারস্স, ন মারস্স ৰসং গতো, উম্মুক্কস্স মারপাসো। মুত্তো সো মারবন্ধনেন ন যথাকামকরণীযো পাপিমতো…পে॰…।
‘‘Santi ca kho, bhikkhave, cakkhuviññeyyā rūpā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati – ayaṃ vuccati, bhikkhave , bhikkhu mutto cakkhuviññeyyehi rūpehi, nāvāsagato mārassa, na mārassa vasaṃ gato, ummukkassa mārapāso. Mutto so mārabandhanena na yathākāmakaraṇīyo pāpimato…pe….
‘‘সন্তি, ভিক্খৰে, জিৰ্হাৰিঞ্ঞেয্যা রসা…পে॰… সন্তি, ভিক্খৰে, মনোৰিঞ্ঞেয্যা ধম্মা, ইট্ঠা কন্তা মনাপা পিযরূপা কামূপসংহিতা রজনীযা। তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি – অযং ৰুচ্চতি, ভিক্খৰে, ভিক্খু মুত্তো মনোৰিঞ্ঞেয্যেহি ধম্মেহি, নাৰাসগতো মারস্স, ন মারস্স ৰসং গতো, উম্মুক্কস্স মারপাসো। মুত্তো সো মারবন্ধনেন ন যথাকামকরণীযো পাপিমতো’’তি। দুতিযং।
‘‘Santi, bhikkhave, jivhāviññeyyā rasā…pe… santi, bhikkhave, manoviññeyyā dhammā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati – ayaṃ vuccati, bhikkhave, bhikkhu mutto manoviññeyyehi dhammehi, nāvāsagato mārassa, na mārassa vasaṃ gato, ummukkassa mārapāso. Mutto so mārabandhanena na yathākāmakaraṇīyo pāpimato’’ti. Dutiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১-২. পঠমমারপাসসুত্তাদিৰণ্ণনা • 1-2. Paṭhamamārapāsasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১-২. পঠমমারপাসসুত্তাদিৰণ্ণনা • 1-2. Paṭhamamārapāsasuttādivaṇṇanā
