| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༧. དུཏིཡཀཱལསུཏྟཾ
7. Dutiyakālasuttaṃ
༡༤༧. ‘‘ཙཏྟཱརོམེ, བྷིཀྑཝེ, ཀཱལཱ སམྨཱ བྷཱཝིཡམཱནཱ སམྨཱ ཨནུཔརིཝཏྟིཡམཱནཱ ཨནུཔུབྦེན ཨཱསཝཱནཾ ཁཡཾ པཱཔེནྟི། ཀཏམེ ཙཏྟཱརོ? ཀཱལེན དྷམྨསྶཝནཾ, ཀཱལེན དྷམྨསཱཀཙྪཱ, ཀཱལེན སམྨསནཱ, ཀཱལེན ཝིཔསྶནཱ – ཨིམེ ཁོ, བྷིཀྑཝེ, ཙཏྟཱརོ ཀཱལཱ སམྨཱ བྷཱཝིཡམཱནཱ སམྨཱ ཨནུཔརིཝཏྟིཡམཱནཱ ཨནུཔུབྦེན ཨཱསཝཱནཾ ཁཡཾ པཱཔེནྟི།
147. ‘‘Cattārome, bhikkhave, kālā sammā bhāviyamānā sammā anuparivattiyamānā anupubbena āsavānaṃ khayaṃ pāpenti. Katame cattāro? Kālena dhammassavanaṃ, kālena dhammasākacchā, kālena sammasanā, kālena vipassanā – ime kho, bhikkhave, cattāro kālā sammā bhāviyamānā sammā anuparivattiyamānā anupubbena āsavānaṃ khayaṃ pāpenti.
‘‘སེཡྻཐཱཔི, བྷིཀྑཝེ, ཨུཔརིཔབྦཏེ ཐུལླཕུསིཏཀེ དེཝེ ཝསྶནྟེ ཏཾ ཨུདཀཾ ཡཐཱནིནྣཾ པཝཏྟམཱནཾ པབྦཏཀནྡརཔདརསཱཁཱ པརིཔཱུརེཏི; པབྦཏཀནྡརཔདརསཱཁཱ པརིཔཱུརཱ ཀུསོབྦྷེ པརིཔཱུརེནྟི; ཀུསོབྦྷཱ པརིཔཱུརཱ མཧཱསོབྦྷེ པརིཔཱུརེནྟི; མཧཱསོབྦྷཱ པརིཔཱུརཱ ཀུནྣདིཡོ པརིཔཱུརེནྟི; ཀུནྣདིཡོ པརིཔཱུརཱ མཧཱནདིཡོ པརིཔཱུརེནྟི; མཧཱནདིཡོ པརིཔཱུརཱ སམུདྡཾ 1 པརིཔཱུརེནྟི། ཨེཝམེཝཾ ཁོ, བྷིཀྑཝེ, ཨིམེ ཙཏྟཱརོ ཀཱལཱ སམྨཱ བྷཱཝིཡམཱནཱ སམྨཱ ཨནུཔརིཝཏྟིཡམཱནཱ ཨནུཔུབྦེན ཨཱསཝཱནཾ ཁཡཾ པཱཔེནྟཱི’’ཏི། སཏྟམཾ།
‘‘Seyyathāpi, bhikkhave, uparipabbate thullaphusitake deve vassante taṃ udakaṃ yathāninnaṃ pavattamānaṃ pabbatakandarapadarasākhā paripūreti; pabbatakandarapadarasākhā paripūrā kusobbhe paripūrenti; kusobbhā paripūrā mahāsobbhe paripūrenti; mahāsobbhā paripūrā kunnadiyo paripūrenti; kunnadiyo paripūrā mahānadiyo paripūrenti; mahānadiyo paripūrā samuddaṃ 2 paripūrenti. Evamevaṃ kho, bhikkhave, ime cattāro kālā sammā bhāviyamānā sammā anuparivattiyamānā anupubbena āsavānaṃ khayaṃ pāpentī’’ti. Sattamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༧. དུཏིཡཀཱལསུཏྟཝཎྞནཱ • 7. Dutiyakālasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༧-༡༠. དུཏིཡཀཱལསུཏྟཱདིཝཎྞནཱ • 7-10. Dutiyakālasuttādivaṇṇanā
