| Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi |
៦. ទុតិយឯសនាសុត្តំ
6. Dutiyaesanāsuttaṃ
៥៥. វុត្តញ្ហេតំ ភគវតា, វុត្តមរហតាតិ មេ សុតំ –
55. Vuttañhetaṃ bhagavatā, vuttamarahatāti me sutaṃ –
‘‘តិស្សោ ឥមា, ភិក្ខវេ, ឯសនា។ កតមា តិស្សោ? កាមេសនា, ភវេសនា, ព្រហ្មចរិយេសនា – ឥមា ខោ, ភិក្ខវេ, តិស្សោ ឯសនា’’តិ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –
‘‘Tisso imā, bhikkhave, esanā. Katamā tisso? Kāmesanā, bhavesanā, brahmacariyesanā – imā kho, bhikkhave, tisso esanā’’ti. Etamatthaṃ bhagavā avoca. Tatthetaṃ iti vuccati –
‘‘កាមេសនា ភវេសនា, ព្រហ្មចរិយេសនា សហ;
‘‘Kāmesanā bhavesanā, brahmacariyesanā saha;
ឥតិ សច្ចបរាមាសោ, ទិដ្ឋិដ្ឋានា សមុស្សយា។
Iti saccaparāmāso, diṭṭhiṭṭhānā samussayā.
‘‘សព្ពរាគវិរត្តស្ស, តណ្ហក្ខយវិមុត្តិនោ;
‘‘Sabbarāgavirattassa, taṇhakkhayavimuttino;
ឯសនា បដិនិស្សដ្ឋា, ទិដ្ឋិដ្ឋានា សមូហតា;
Esanā paṭinissaṭṭhā, diṭṭhiṭṭhānā samūhatā;
ឯសនានំ ខយា ភិក្ខុ, និរាសោ អកថំកថី’’តិ។
Esanānaṃ khayā bhikkhu, nirāso akathaṃkathī’’ti.
អយម្បិ អត្ថោ វុត្តោ ភគវតា, ឥតិ មេ សុតន្តិ។ ឆដ្ឋំ។
Ayampi attho vutto bhagavatā, iti me sutanti. Chaṭṭhaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ៦. ទុតិយឯសនាសុត្តវណ្ណនា • 6. Dutiyaesanāsuttavaṇṇanā
