| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༤. དུཏིཡདྷམྨཀཐིཀསུཏྟཾ
4. Dutiyadhammakathikasuttaṃ
༡༡༦. སཱཝཏྠིནིདཱནཾ། ཨེཀམནྟཾ ནིསིནྣོ ཁོ སོ བྷིཀྑུ བྷགཝནྟཾ ཨེཏདཝོཙ – ‘‘‘དྷམྨཀཐིཀོ དྷམྨཀཐིཀོ’ཏི, བྷནྟེ, ཝུཙྩཏི། ཀིཏྟཱཝཏཱ ནུ ཁོ, བྷནྟེ, དྷམྨཀཐིཀོ ཧོཏི, ཀིཏྟཱཝཏཱ དྷམྨཱནུདྷམྨཔྤཊིཔནྣོ ཧོཏི, ཀིཏྟཱཝཏཱ དིཊྛདྷམྨནིབྦཱནཔྤཏྟོ ཧོཏཱི’’ཏི? ‘‘རཱུཔསྶ ཙེ, བྷིཀྑུ, ནིབྦིདཱཡ ཝིརཱགཱཡ ནིརོདྷཱཡ དྷམྨཾ དེསེཏི, ‘དྷམྨཀཐིཀོ བྷིཀྑཱུ’ཏི ཨལཾ ཝཙནཱཡ། རཱུཔསྶ ཙེ, བྷིཀྑུ, ནིབྦིདཱཡ ཝིརཱགཱཡ ནིརོདྷཱཡ པཊིཔནྣོ ཧོཏི, ‘དྷམྨཱནུདྷམྨཔྤཊིཔནྣོ བྷིཀྑཱུ’ཏི ཨལཾ ཝཙནཱཡ། རཱུཔསྶ ཙེ, བྷིཀྑུ, ནིབྦིདཱ ཝིརཱགཱ ནིརོདྷཱ ཨནུཔཱདཱཝིམུཏྟོ ཧོཏི, ‘དིཊྛདྷམྨནིབྦཱནཔྤཏྟོ བྷིཀྑཱུ’ཏི ཨལཾ ཝཙནཱཡ། ཝེདནཱཡ ཙེ, བྷིཀྑུ…པེ॰… སཉྙཱཡ ཙེ, བྷིཀྑུ… སངྑཱརཱནཾ ཙེ, བྷིཀྑུ… ཝིཉྙཱཎསྶ ཙེ, བྷིཀྑུ, ནིབྦིདཱཡ ཝིརཱགཱཡ ནིརོདྷཱཡ དྷམྨཾ དེསེཏི, ‘དྷམྨཀཐིཀོ བྷིཀྑཱུ’ཏི ཨལཾ ཝཙནཱཡ། ཝིཉྙཱཎསྶ ཙེ, བྷིཀྑུ, ནིབྦིདཱཡ ཝིརཱགཱཡ ནིརོདྷཱཡ པཊིཔནྣོ ཧོཏི, ‘དྷམྨཱནུདྷམྨཔྤཊིཔནྣོ བྷིཀྑཱུ’ཏི ཨལཾ ཝཙནཱཡ། ཝིཉྙཱཎསྶ ཙེ, བྷིཀྑུ, ནིབྦིདཱ ཝིརཱགཱ ནིརོདྷཱ ཨནུཔཱདཱཝིམུཏྟོ ཧོཏི, ‘དིཊྛདྷམྨནིབྦཱནཔྤཏྟོ བྷིཀྑཱུ’ཏི ཨལཾ ཝཙནཱཡཱ’’ཏི། ཙཏུཏྠཾ།
116. Sāvatthinidānaṃ. Ekamantaṃ nisinno kho so bhikkhu bhagavantaṃ etadavoca – ‘‘‘dhammakathiko dhammakathiko’ti, bhante, vuccati. Kittāvatā nu kho, bhante, dhammakathiko hoti, kittāvatā dhammānudhammappaṭipanno hoti, kittāvatā diṭṭhadhammanibbānappatto hotī’’ti? ‘‘Rūpassa ce, bhikkhu, nibbidāya virāgāya nirodhāya dhammaṃ deseti, ‘dhammakathiko bhikkhū’ti alaṃ vacanāya. Rūpassa ce, bhikkhu, nibbidāya virāgāya nirodhāya paṭipanno hoti, ‘dhammānudhammappaṭipanno bhikkhū’ti alaṃ vacanāya. Rūpassa ce, bhikkhu, nibbidā virāgā nirodhā anupādāvimutto hoti, ‘diṭṭhadhammanibbānappatto bhikkhū’ti alaṃ vacanāya. Vedanāya ce, bhikkhu…pe… saññāya ce, bhikkhu… saṅkhārānaṃ ce, bhikkhu… viññāṇassa ce, bhikkhu, nibbidāya virāgāya nirodhāya dhammaṃ deseti, ‘dhammakathiko bhikkhū’ti alaṃ vacanāya. Viññāṇassa ce, bhikkhu, nibbidāya virāgāya nirodhāya paṭipanno hoti, ‘dhammānudhammappaṭipanno bhikkhū’ti alaṃ vacanāya. Viññāṇassa ce, bhikkhu, nibbidā virāgā nirodhā anupādāvimutto hoti, ‘diṭṭhadhammanibbānappatto bhikkhū’ti alaṃ vacanāyā’’ti. Catutthaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༤. དུཏིཡདྷམྨཀཐིཀསུཏྟཝཎྞནཱ • 4. Dutiyadhammakathikasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༤. དུཏིཡདྷམྨཀཐིཀསུཏྟཝཎྞནཱ • 4. Dutiyadhammakathikasuttavaṇṇanā
